溝女的聖地──補習社: 78
我哋食完喱餐飯之後，無再好似以前咁，會行下其他地方……
「咁……我返去啦。」Kitty出完茶餐廳之後。
「咁快？」我仲想聚下舊…
「唔啦。」Kitty嫣然一笑，「我唔想我男朋友擔心。」
好酸……就連空氣都好似酸埋一份咁。Kitty真係好好，如果有佢做我女朋友，就好啦。
至少我會好有安全感。
可惜喱一切都唔係屬於我，所以我先酸。
老實講，我真係好葡萄。我就好似一個傻仔咁，放唔低佢。
「好啦，返去小心啲啦。」我只可以咁樣講。
「Bye bye。」佢笑道。
喱個笑容，我分得清。只係一個朋友對朋友嘅笑容，唔再好似以前咁曖昧。
原來好多嘢，自己係感覺得到架。而最恐怖嘅係，喱啲感覺唔係假嘅，確確實實咁同你講出事實。
「 Bye Bye 。」我好不情願咁講。
然後又再一次望住佢背影。
其實自己可以唔洗望，我可以好瀟灑咁擰轉個撚頭，走咗去。
但我好自然咁望住佢嘅背影，同時浮現上次係海旁嘅背影。
「係時候放低啦，陸秋水！」我同自己講。
放低啦，再望，佢都唔會返嚟架啦。
Kitty爽朗嘅短髮，伴隨住佢行路嘅姿勢，係度飄下飄下。
望住佢嘅背影，越走越遠，直到一個轉彎位，就唔見咗。
我呆咗好耐先識得反應過嚟。
「佢走咗啦……」我自言自語。
四年加多一年中六，足足五年啦。
我同Kitty只係拖咗一次手仔，錫咗一次咁大把，就鐘意咗人哋五年。
反正同Amy除咗扑嘢，差唔多咩都做曬，卻比唔上Kitty嗰幾次「溫馨」，來得更深刻。
你話人係咪犯賤呀？得到嘅嘢越少，就越想得到多啲，越係陷得深。反而咩都得到啦，又唔係自己想要嘅。
回家路上，我諗咗好多，而頭先同Kitty相處嘅畫面係咁浮下浮下咁。
已經好多年無試過咁樣啦，忽然間好懷念中學嘅時光。
人大咗，就好容易勾返起以前嘅事，會忽然間感懷身世，好似詩人咁，變得感性。
依家好多嘢煩，好多嘢等住自己面對，搵工，養家，畢業，等等。
要面對一啲我毫無準備嘅嘢，就覺得壓力好大。
啲人話中學係最開心，最無憂無慮嘅時候……我依家先深深咁有喱種體會。
我同Kitty，唔似電視劇咁，食一次飯，關係就好轉，然後好戲劇性咁發現原來Kitty仲鐘意緊我，而我又咁啱未放得低Kitty，所以就一齊咗啦。
NoNoNoNo！！！！
現實唔係咁，現實係兩個人食完一餐飯之後，就好少聯絡，大家各自有各自嘅生活，互不打擾。
我同Kitty自從嗰次食飯之後，就無再出過嚟……
但有Keep住聯絡，就好似普通朋友咁，簡唔中閒聊數句。
我自己都諗咗好多嘢架。當日我返屋企，諗起好多中學嘅回憶同埋Kitty嘅回憶。
中學嗰度光輝歲月，會成日係巴士上面，聽住歌，細味同Kitty嘅事。
小至傾計，幫我溫書，大至嗰次親吻。
一邊聽住當年火紅嘅音樂，一邊回味，依家諗返起，都覺得係一件幸福嘅事情。
上咗大學之後，就越嚟越少，連我自己都唔知點解，漸漸我都忘記嗰一種感覺。
依家就勾返起好多嘢，覺得當時，真好……
我哋過咗咁耐，一啲進展都無，可能我哋真係注定唔可能係埋一齊啦。
我無可能一直係過去中徘徊，我始終都向前行，依家…就係嗰個時候。
我慢慢一步步咁行出嚟，一步步學會放低。
一開始真係好難，就算無同自己講要放低，但其實你覺得做唔到。
當你發現，你專注係其他事上面嘅時候，你就會不知不覺，慢慢地，放過自己。
一年啦，我維持喱個狀態一年，先至會對住Kitty嘅whatsapp唔亂諗嘢。
一年，Kitty仍然同個TB一齊，都仲係咁幸福。
佢用一年嘅時間去學習維持幸福，而我就用一年嘅時間去學習放低。
直至除夕，我收到Kitty哭泣嘅電話。
嗰度時間我請咗大假，同班大學朋友去旅行，我哋講咗好耐架啦，難得可以一齊出去玩。
簡除夕嗰段時間，係因為可以聖誕除夕一次過。
我哋聖誕節凌晨出發，去其他地方體驗嗰邊嘅聖誕。
反正我又係單身，嗰邊又有幾個單身嘅，又無咩好顧忌。
包括我EX，都係度。一開始好撚老尷架，係尷尬到仆街，唔知講咩好。
我啲朋友都叫我哋唔好去，但只係我哋堅持話要去，先俾我哋去。
我無諗到咁尷尬架，估唔到到機場嘅時候，會無嘢講到咁姐。
佢哋都好明顯睇得出啦，又唔係傻嘅。
Alex都走過嚟問，「你哋仲尷尬緊？」
我都唔明有咩好尷尬，都過咗去啦，咁樣落去有咩用姐。但Amy對我嘅眼神令我好唔自在。
好彩嘅係，落機食完早餐之後，就好似慢慢放低大家嘅介懷。
喱一年，我最大嘅得益，就係學識「放低」。
之後嘅旅程我哋都玩得好開心，有講有笑咁，但總有啲時候，會少不免同Amy單獨相處下。
咁廢事怕尷尬，都會R下嘢講。
「係呢…你依家……有…無男朋友呀？」我都唔係幾好意思提起。
「有呀！」
屌你呀，估唔到你咁爽快。女人係喱啲時候，就係咁豪爽，但平時呢，就咩都同你記住曬。
Amy露出一個「我活得比你好」嘅眼神，完全暴露出佢嘅心計，睇嚟佢都係等緊我問姐。
「咁你呢？」
「哈哈！」我乾笑兩聲，「無呀。」
然後Amy就展現出佢勝利嘅女神。但在我看來，其實喱啲嘢對我嚟講，真係無關緊要。
我依家只係想可以同自己鐘意嘅人一齊，就係咁簡單。
「咁耐囉，做咩唔識返個呀？」我唔知Amy喱句係想潤我定真係關心我，難分真與假。
「你估咁易咩？葉師傅。」
「可以嘅話，我都想識返個，邊似得你咁好運呀！」我擺明係暗串緊佢，但佢絲毫都聽唔出有咩問題。
「多謝！」Amy仲好真心咁講，我唔知笑唔笑好。
不過好彩無同佢一齊落去姐，原來女人報復心係如此強勁，分咗手先睇得出。
我見嘅女仔越多，就越係覺得無邊幾個女仔比得上Kitty……
一路上覺得好開心，好和諧，暫時令我忘記香港嘅忙碌，同埋壓力。
直至除夕，姐係我臨返去嘅前一晚，我收到Kitty Whatsapp call。
我係酒店入面同緊班fd玩緊狼人，喱個係我哋一齊旅行定落嚟嘅規則。
我哋大大話都去咗成4-5次旅行，每次旅行都會玩。
之前嗰幾日玩得太攰同埋太夜，一返到嚟就瞓到死撚咁，所以先拖到今日。
「天黑啦！大家合埋眼啦。」今次到Alex做MC。
鈴──鈴──鈴──
「狼人打電話嚟啦！狼人請開眼。」
仆街我咁啱係狼人，然後順手望一望前面嗰一埋電話上面，置頂嘅正正係我部電話。
佢哋話要收手機呀嘛，然後疊埋一齊。
Kitty。
手機螢幕上，寫住Kitty個名。
我個心即刻抽住抽住，因為Kitty好少打電話俾我，除非緊要事，如果唔係通常都就咁whatsapp。
如果今次係換著佢whatsapp我，我諗我會唔理，由佢。
「很好！狼人已經收咗個電話啦，佢哋已經收到命令啦！」
佢講喱句之前，個電話已經響完。
我諗都唔諗，就拎起個電話衝咗出房門，然後走落去大堂度。