溝女的聖地──補習社: 76

我帶住種種疑問入去茶餐廳。
 
我跟係Kitty身後，見到個唔知係咪老闆嘅人問Kitty：「咦！今日唔帶男朋友嚟呀？」
 
屌！喱個呀叔係咪睇電視睇上腦，問啲問題可以咁戇鳩都有？
 
Kitty一臉尷尬，「佢今日唔得閒呀。」
 
都好嘅，雖然戇鳩（姐係唔識做），但都俾我套到料。
 


睇嚟佢哋之前係成日嚟喱度食嘢。
 
你話我心入面唔介意就有鬼啦。如果今時今日，聽到自己曾經鐘意過，深愛過嘅女仔有男朋友，心入面唔再有介意嘅感覺……我諗，就真係放低咗。
 
可惜，我無。
 
我哋搵咗個位坐低，Kitty熟悉咁拎張餐牌俾我，而且仲拎埋需要用嘅餐具，用紙巾小心翼翼咁包好，放係我面前。
 
一間平民茶餐廳，係佢面前，好似有緊高級餐廳嘅享受。
 


只可以話，佢仍然係咁高貴。
 
「想食咩呀？」Kitty一身優雅嘅打扮，咁多年嚟都係同茶餐廳格格不入。
 
可以說明係一件好事，如果夾嘅話，證明佢過得唔好。
 
「食返我第一次同你食茶餐廳嘅嘢。」我故事考下佢。
 
Kitty笑了笑，一舉手，就即刻有伙計嚟招呼佢。
 


「一碟乾炒牛河，一個豆腐火腩飯，兩杯凍奶茶呀唔該。」
 
當年嘅嘢，佢仲記得一清二楚。
 
落完單之後，我就即刻問，「你同你男朋友成日嚟架？」
 
今日我嘅目標就係打聽所有消息！
 
有無試過一種感覺，多年無見，即使環境一樣，但其實感覺…卻返唔到去從前？
 
當環境不變，隨住時間流逝，人會改變。
 
呢條叫做「成長定律」。
 
「又唔係嘅，間唔中咁啦。」Kitty冷淡地回道，好明顯佢係想避開喱個話題。



我都識做，佢唔想講嘅話，就講下其他先。

但唔代表我會咁樣放棄，我只係想拉下其他地方，等佢放下介懷。

「係呢...你返咗好耐？」

「嗯......都係啦...都有成大半年啦。」

雖然Kitty係笑住咁講，但都睇得出佢份尷尬。

我個心當堂灰咗。

返咗嚟咁耐都唔講聲......



唔單止Kitty，我有啲朋友都去咗外國都一樣，明明幾fd，但返嚟講都無講聲。

係ig上面見到佢同自己識嘅朋友一齊，然後下面打：好耐無見。

感覺就係，返嚟都唔講聲，都唔知有無當我係朋友。

而Kitty喱種感覺仲要強烈得多。

「係呀......」我頭先都有問佢點解返嚟，但佢都無講到，就算啦。

「唔好講我啦，講下你呀。」勢估唔到一路俾我食住嘅話題，俾Kitty食返轉頭。

「你喱排點呀？有無識到女朋友呀？」

Kitty換一換個眼神，眼神帶刀，鋒利，有點見紅...



Kitty喱個問題大有玄機。
 
「嗯……唔知算唔算有，可以話有，可以話無咁啦。」
 
我咁樣答無錯呀，我都唔知自己嗰次算唔算得上拍拖。
 
「哦～」係Kitty臉上好快咁閃走一絲絲不快。
 
「可以同你一齊嘅女仔，一定好好啦。」
 
唔知點解，我從Kitty口中好似聞到啲酸味咁。
 
我估大約係我聞錯啦，我好怕自己又諗多咗，會錯意。
 


「邊係呀，我只係想要個普通嘅愛情就夠。」
 
「乾炒牛炒邊位？」伙計好快就上菜。
 
同上次一樣，我都係諗唔明點解乾炒嘅會快過豆腐火腩飯。
 
「哈哈，又係我先喎！」佢好可愛咁側一側頭，斜斜地凝望住我。
 
「你好彩姐！」我會心一笑。
 
世間上嘅巧合究竟可以係幾多次？上一次如是，今次如是。
 
唔通真係天賜良緣？
 
「今次你食先啦。」我真心無所謂。

一如既往，Kitty都係選擇等埋我。
 
「話過要同你一齊嚟食回憶架嘛。」動人如佢嘅女仔，真係少有。
 
就算係大學入面美女如雲，都好難再搵到好似Kitty咁完美聖潔嘅女仔。
 
一個香港女仔，唔貪新鮮，唔成日試新嘢，已經非常難得。遇到都要謝天謝地，扣三個響頭。
 
更何況好似Kitty喱種女仔會陪你食回憶？
 
我都由佢，無出聲，默默地享受當下嘅愉快。
 
──已經好耐無試過啦。
 
喱種愉快，輕輕的，無咩重量，感覺好微薄，份量好少。
 
但每一秒都好開心，亦因為份量少，微薄，而顯得格外珍貴。
 
「係呢，你頭先話你想要咩愛情話？」Kitty又再拎返頭先未完嘅話題嚟講。
 
「普通嘅愛情。」我照返之前個答案話俾佢知，我！陸秋水，始終如一。