溝女的聖地──補習社: 74
呀楊講完呢句之後，就俾關晴搶返返嚟。
「總之，你專心做好你想做嘅嘢，我哋都支持你！」
然後聽到「哇！！！！！！！！」一聲，就收咗我線。
我知道，我係時候約Kitty出嚟聚一聚先。
於是我返到屋企就諗緊點樣whatsapp先好。
好耐未試過因為覆一個msg而思前想後，花盡心思，彷彿令我返去舊時青蔥時代。
「嗨！喱排點呀？」好似懶係熟咁...
「得唔得閒出嚟食個飯？」好似又有啲唐突。
諗爆頭都唔知應該點開場，淨係諗都用咗成半個鐘。
最後，我都係跟返自己個心，做返自己。
『嗨，好耐無見。』
其實我打喱句「好耐無見」嘅真正意思，係我掛住你......因為太耐無見，所以會掛念。
然後我就收埋電話。
點解？因為我驚，我緊張。
我唔想面對個msg，因為我知我會忍唔住成日check佢幾時會睇，然後成個人囉囉攣。
估唔到咁多年後，我個心仍然會為Kitty而跳動，會因為Kitty而緊張。
我會唔敢睇手機，我會過一段時間再睇，好讓自己唔再受等待嘅煎熬。
我隔咗一段時間再打開手機屏幕，咩whatsapp都無，陣陣嘅失落從我心裡傳入腦中。
當年嘅感覺，好似通通都浮現上嚟咁。
原來有啲嘢唔係忘記咗，我成日有種錯覺，認為自己忘記咗Kitty，放低咗佢。
但一件又一件事提醒我，我只不過係將呢段回憶放咗係心底度，當事情再一次發生，所有嘢就好似炸彈咁，「呯！」一聲爆曬出嚟。
唔知過咗幾耐，先收到Kitty嘅回覆。
『好耐無見。』加上一個微笑嘅emoji，一切都那麼熟悉。
但同時因為耐無接觸，俾我一種莫名嘅距離感同陌生感。
熟悉係因為Kitty覆我嘅方式仍舊一樣，陌生感係因為感覺耐無見，彼此心中都有介蒂係度。
有時同fd sd whatsapp，以前通用嘅emoji都係笑喊同埋挑逗，漸漸出咗啲新emoji，紛紛轉咗其他嚟用，甚至懶得打emoji。
所以Kitty嘅回覆顯得格外珍貴。
『有時間出嚟聚下嗎？』我打出自己心聲，只係抱住同舊朋友出嚟食餐飯仔嘅心態去約佢出嚟。
『可以呀。』Kitty開始覆得我好快。
『咁你聽日得唔得閒？』
『聽日唔得呀，要到禮拜六日先得閒。』
語言間，我好似感覺到Kitty嘅冷漠，唔知係咪我諗多咗呢？
見到呢句，心中難免失落，然後猜想，佢係咪同佢男朋友出去呢？
毒撚嘅通病，又再發作起上嚟。
『好啦！咁禮拜六夜晚？』我約實佢。
『好。』
然後我哋無再講嘢。
我唔係無嘢想同Kitty講，反而係太多嘢想講，想留係禮拜六講，更加想快啲想見到佢。
就好似當初，為咗同佢一個禮拜去一次補習，每個禮拜最期待嘅，就係見到佢。
依家我都一樣，最期待係可以見到佢。
到咗嗰日，我打扮得自己成熟啲，有型啲。
我開始明白，男人真正嘅魅力，唔係在於點樣包裝自己，而係由內到外散發出嘅自信。
我花咗好多時間去建立自信。
『今晚你想食咩？』臨近夜晚嘅時候，我sd個whatsapp問Kitty。
我正諗住為自己嘅風度翩翩而沾沾自喜嘅時候，點知Kitty就打沉咗我。
『仲以為你會安排好曬去邊食添……』
我先想起，係喎！大小姐可能係嗰邊係咩都幫佢安排好曬。
其實咁樣嘅生活先可悲，咩都安排好曬。
依家嘅香港，就係咁可悲。細細個已經俾人安排好曬，去邊補習呀，考邊間學校。大個咗想做自己想做嘅事，難上加難。人生嘅目標就係為咗買樓，生活被逼變成生存。
呢啲都係我出嚟社會之後，深深體會到嘅嘢。
『講笑姐！』Kitty立馬加上呢句。
感覺佢好似同以前一樣咁鬼馬精靈。
『其實我食咩都okay，不過既然你無安排，但近排我真係有間嘢想食，只不過無時間去食！』
『啱啦，就等你陪我去，搵下啲回憶啦！』
Kitty講到咁，我大約都估到七七八八，更令我期待。
我就嚟出門口嘅時候，決心打一打俾佢。
「喂？」
一把熟悉嘅聲音，突然間暖上心頭。
Kitty把聲無以前咁甜美，多咗份滋性。
「我哋係邊度等呀？」
「嗯......」
我聽電話嘅背景聲。
「嘟嘟嘟嘟嘟......」
「你出咗去啦？」我問。
「係呀！我依家去緊啦。」
我心裡暗暗覺得奇怪，有錢人都要搭地鐵？
「好啦，我依家出門口啦。」
「咁係XX站等啦！」
傾完喱個電話，心情難得地愉快。已經好耐無咁樣嘅感覺，好似俾愛情嘅雨水打到咁，讓本來乾涸嘅生活帶嚟點點滋潤。
我都打扮好曬，就出咗門口。
好耐無咁樣期待出去。
同班大學同學出去係開心嘅，係好玩，但絕對唔係喱種感受。
我到咗約定嘅地方同埋時間，但遲遲未見人影。
但我又唔想打電話去催佢，男仔等下女仔，無咩所謂嘅。
呢個又令我諗返起之前係SOGO等佢嘅事。
回憶好似電腦檔案咁，咁啱開中咗個資料夾，入面就係你同佢之前嘅嘢，全部都係曬度。
睇返，其實都幾好笑。
終於，見到Kitty向我揮手。
講真，如果唔係Kitty揮手，我諗我真係認唔到佢。
佢變咗好多，一脫往時嘅稚氣，更添幾分成熟。
最大嘅轉變，就係佢將清秀嘅長髮，剪成清爽嘅短髮。
呢排興呢種韓式冬菇頭，行一轉銅鑼灣，一蘿都係咁嘅髮型。
不過的確係會令人覺得成熟咗，洗走咗以前嘅MK味。
嗱！我唔係話Kitty MK，佢一啲都唔MK，我係話以前啲MK妹都轉曬型姐。
不過Kitty唯一無變嘅，係佢嘅笑容，都係咁甜。
「嗨！好耐無見！」
雖然係whatsapp上有講過，但係當面見到，感覺又不一樣。
今次真係發自內心，笑言：「好耐無見！」
「哈哈！好耐無見。」Kitty笑起上嚟，有一個淺淺嘅酒窩，依舊迷人。
睇嚟佢無記恨當年我對佢做嘅事，今日一見，對上一次已經係好耐之前嘅事。
但係感覺上，彷如昨日才相見。
沿路上，我哋閒話家常，傾下近況，大家過得如何。
然後我想起一個好重要嘅問題。
「點解你突然之間會返嚟嘅？」
「唉… 」Kitty輕嘆一聲，臉上盡是苦澀。
「講起上嚟一匹布咁長……」
「關於屋企？」我猜，十居其九都係咁啦。
「嗯。」Kitty點點頭。
雖然好仆街，但係我心入面真係暗爽咗一下。
因為如果唔係佢屋企有事，我諗可能呢世都無機會再見返佢，但咁樣諗好衰。
「你笑咩呀？」Kitty問。
死！俾佢見到我偷笑添，一定笑得好樣衰。
「無，我諗返起你以前啲衰嘢咋嘛。」今次真係認真咁笑。
「咩衰嘢呀！？」Kitty瞪大隻眼，唔相信我講嘅嘢。
「我以前明明就好乖！」
其實我都係亂吹架咋，以前嘅佢，就好似溪水一樣咁清統，邊有可能會搵到佢啲衰嘢。
唯一可以當衰嘢嘅……就係…
我從手機入面翻開舊照，搵出一張收藏已久嘅相。
就算換咗手機，呢張相都一路keep到依家。