溝女的聖地──補習社: 68
還記得當晚嘅事情，淚上面嘅痕跡，如同我心入面嘅痕跡一樣，沖唔走。
我嗰晚返到去，我同Kitty都無再聯絡。
我DSE嘅成績都出咗嚟，拎成績嘅時候好緊張，我好記得嗰陣時，我隻手係震住咁去拎成績表架！
點知，我出到嚟嘅成績不如理想，英文係肥咗。
但數學就最勁，滿等。
其他就不過不失，但都係唔過20。
拎住咁嘅成績，我唔知點算好……我心入面只有徬徨。
有人歡喜，有人愁。邊個想做愁嗰個？
偏偏自己就係愁緊嗰個，而歡喜嘅，一定係人哋。
呀楊好興奮咁走過嚟問我，「呀水！你考成點呀？」
一見到佢咁開心嘅樣，唔洗問呀，一定考得好啦，咩都寫係塊面度。
「吓？」我神情呆滯，唔知點俾反應佢。
呀楊見到我面色唔係好對路，「做咩事呀？」
再望望枱面上嘅成績表，就知咩事啦。
「嚟！唔好係度灰啦，依家陪你去ive啦！」
其實我都知，英文肥咗係得返基礎文憑可以讀。
但我唔明，我明明好俾心機讀，仲覺得自己考得唔錯，點解最後出嚟嘅成績會咁？
我睇唔透。
「屌！你係度諗有咩用呀？去報咗先最實際！一陣返嚟再上訴啦！」
今次呀楊佢唔係講講下，佢真係想幫我。
因為我見到佢摀低身，係度幫我執緊嘢，整裝待發。
老實講，雖然大家都係男人，都係麻甩佬，但我俾佢呢個舉動感動咗。
我呢世仔最徬徨無助就係呢一刻，完全唔知點算好。但有呢個朋友陪係我身邊，我好感恩。
男人之間嘅友情就係咁架啦，屌嚟屌去。
唔屌你就唔係fd啦！我依家先明白。
唔似得女人，講盡好多美好嘅說話，係紀念冊入面寫好多感性嘅嘢，咩朋友一世，我永遠係你身邊之類嘅肉麻嘢。
男人係行動為先，講咁多，走啦！
如果今日呀楊係好溫柔咁勸我，同我講解，我一定會覺得好嘔心，想一巴煎落去。
但佢走埋屌鳩我，不禁令我稍稍放心。
佢同我去ive嘅時候，無講任何嘢，我哋好靜，但又唔覺得尷尬。
的確，我依家需要人陪，但同時間我想靜下，呢樣嘢呀楊做得好好。
男人無聲嘅陪伴，勝過女人花言巧語嘅安慰十倍有多。
呀楊無問咩原因，咩都無講，就咁行係我前面，雙眼炯炯有神。
第一次，我覺得呀楊好偉大，好型。
男人，有陣時都會有佩服其他男人嘅地方。
呀楊有佢英姿嘅時候，從一開始，佢已經俾我大膽，唔會拖泥帶水，識得食住個勢上。
呢樣係我學唔嚟嘅嘢，如果我識得睇，又或者如果係呀楊溝Kitty，我諗一早已經得咗米。
但自己身邊總有呢種人存在，行係你前面。
你會好想好似佢咁，勇敢啲，大膽啲。
但自己又做唔到，所以啲人話我廢，我認架，一無是處。
考個咁撚爛嘅成續，自己仲要鳩下鳩下咁，要啲fd擔心自己。
「我依家陪緊呀水去ive度報名。」呀楊拎住個電話，同緊關晴傾緊。
我覺得自己好似個小朋友咁，咩都要人照顧......試問咁樣嘅人，點樣做人男朋友？俾到幸福人？
「嗯，好啦，報完就返嚟啦。」然後佢就收咗線。
「呀楊，我唔想做ive仔。」
我真係醒，我已經發咗太耐嘅夢啦，係時候要清醒。
我徬徨到一個點，手蕊不停咁出汗，咁大個仔，都未試過咁驚。
當你識驚嘅時候，你就識得去改變，因為你知繼績咁樣落去。
食得屎架啦!!!
「做咩呀你？」以呀楊嘅聰明才智，無理由估唔到我諗咩。
「你諗住retake多一年？」果然呀楊好快估到。
「係呀。」我停下腳步。
「你可以一邊讀ive一邊retake嘅姐，無壞架。」呀楊佢隻眼瞪到老大。
「係……但我想專心考好佢，駁返上u。」
「我講真架！我下定咗決心。」我好堅定咁望住佢，我好清楚依家嘅我做緊乜嘢。
呀楊見到我咁嘅態度，蹦緊嘅神經都稍為放鬆落嚟。
曬一年就曬一年啦，總比之後嘅日子混混噩噩咁過好。
「好啦，你都決定咗囉，做兄弟嘅，唔通唔撐你咩？」呀楊語重深長咁講。
「只不過頭先見你成個人鳩下鳩下咁，唔想見到你咁，咪過嚟屌醒你囉！」
「最緊要你自己有目標，咁樣先可以幫到你，屌！你無目標，唔知自己想點嘅，我幫個系呀？」
呀楊嘅粗口，令我感受到溫暖。
屌到我好開心！
我決咗之後，就執返之前俾我收埋咗嘅書本，拎出嚟繼續溫，由頭再溫過。
其實retake好辛苦，人哋係度玩嘅時候，自己就度溫書。
我block曬所有娛樂，唔可以俾自己心散。Facebook，ig之類嘅嘢都停咗無用，係直接del 咗佢。
Kitty佢有問我考成點，我呃佢……話自己考得幾好，會上到大學。
Kitty亦都同我講，佢幾多號會走…
我望住個whatsapp，思索緊要唔要提議話送佢機。
Kitty：『你會嚟送架呵？』
點知俾Kitty講咗先，每一次佢都好似知我想要咩咁，然後提前問我，俾足面子我。
『會呀。』我答佢。
你問我，我一定想去送佢，想去見佢最後一次。
但我依家有資格去見佢咩？自己廢到要呃佢上到大學。
從佢嘅表情符號睇得出佢真心為我考到好成績而興奮、開心，但萬一佢知道我呃佢，佢會有啲咩心情？
我真係唔敢想像……不過算啦，反正佢都唔會知。
我係想去送Kitty，但另一邊廂，我又唔想去到見到Kitty，然後會唔捨得。
好矛盾。
『但係我哋唔係……？』
『但我想見到你。』
我深呼吸咗一下，我份人最慘就係心腸軟，俾Kitty咁樣講一講，我唔想去嘅心都消磨得七七八八。
『好啦。』我就咁樣應承咗佢。
直到要送機嗰日，臨出門我都好忐忑緊要唔要去送機。
我怕，好怕……怕我見到Kitty會唔捨得，會喊。
到最後，我都係無咁嘅勇氣，應承咗佢嘅嘢，都接二連三咁做唔到。
我開住飛行模式開咗成日，然後打機都打咗成日。
到我再開返，好多個msg轟炸咁轟過嚟。
『你出咗門口未呀？』
『你到邊呀？』
『到機場未呀？』
『係邊呀？』
『我就嚟要入閘啦！你到邊呀？』
『我想見到你呀……』
『我好唔捨得你呀…』
『求下你出現啦好無？』
『我求下你……』
『你唔出現都得，你見到個msg視訊下我，可以嗎？』
『好啦，我入閘啦……』
『我好辛苦，估唔到你會咁樣對我…應承我嘅嘢都做唔到！』