溝女的聖地──補習社: 67
我哋雖然好開心，佢都無頭先嘅咁拘謹。
雖然我哋性格上面好似咩事都無，但係外型上面睇，我哋都變緊。
有陣時改變並唔係要發生好大件事，又或者成個人唔同曬，先係改變。
好多時候，改變——係累積而成。
一點點嘅改變，自己並唔發覺，當我哋察覺嘅時候，已經變咗好多。
甚至返唔到轉頭，絕大部分嘅人都唔察覺到呢啲細微嘅轉變。
好多嘢，係我哋不知不覺間，變到唔再係我哋熟悉嘅模樣。
呢餐飯，食咗我幾個月嘅零用。
但對Kitty嚟講，呢啲錢唔算得係咩。
「可唔可以陪我去行下海旁？」Kitty眼神入面流露出種種不捨。
唔知係咪我會錯意，我不敢多想，然後胡亂答應。
我哋去港澳碼頭附近嘅海旁，嗰邊有車返去佢屋佐喎，呢句Kitty講架!!
其實Kitty搭的士都得啦，咩話有無車返去呀，我覺得呢啲都係籍口姐。
有錢搭咩都得啦。
我哋肩並肩地行緊海旁，硬係覺得好唔自然，就算頭先食飯傾得幾開心都好。
一到呢啲曖昧嘅時候，都會覺得唔自然。
我第一次同女仔一齊行海旁，平時點會嚟呢啲地方呀？
嚟親都係成雙成對嘅，自己一個又無必要嚟。
係海旁度，有好多情侶依偎係彼此懷抱度，更加有啲大無廝樣咁係度錫嚟鍚去。
我哋兩個係度睇到眼都凸埋，唔知點算好。
咁都有幾對拖下手仔咁，咁咪幾好。
跑緊步嘅，都不忘望下Kitty，甚至回頭望下。
咁又係嘅，Kitty穿到咁高貴，嚟行海旁係有啲失調，難怪會引人注目。
「係呢......你會唔會再返嚟呀？」我差唔多成餐飯都無提過呢件事，但再唔問，就會有遺憾。
「會呀，但唔知幾時。」
Kitty撥一撥佢被海風吹亂嘅頭髮，加上一身雪白嘅裝扮，係呢個昏暗嘅海旁入面，更顯得鮮豔無比。
「咁我係咪再無機會見到你？」就算俾佢覺得白痴，我都忍唔住要問。
因為我唔想見佢唔到，如果唔係因為補習社，我同Kitty根本無機會接觸到。
我知道，如果之後無機會見，無機會聯絡，可能咁就一世......
「傻啦，我仲會返嚟架嘛，就算我係其他地方，都可以keep住聯絡姐。」
Kitty笑咗笑，我定神咁望住佢，佢側面都好吸引，好完美。
Kitty好似feel到我一直望住佢，「做咩事呀？」
今日，我要將我想講嘅嘢講曬出嚟，等我自己嘅青春，不留遺憾。
「我想望耐啲，等我自己永遠記住你個樣，唔好忘記呢一刻，唔好忘記我哋之間嘅事。」
「呀水......」Kitty好溫柔咁叫我個名，令我個心不自覺地為佢而跳動。
Kitty徑自行去欄杆旁邊，只見佢望住大海度，望得出神。
我都跟埋過去，但我見佢咩都無講，所以我都暫時唔講嘢住，等佢講。
好耐，我哋過咗好耐，都無講過嘢，大家只係睇下個海，感受下啲浪幾咁慢.....真浪漫。
「呀水...其實....」Kitty終於開金口。
「我都好鐘意你。」
佢講呢句嘅時候，語速係好快，但確確實實傳入我心中。
呢句嘢亦好快咁係我腦海入面播放。
喜歡你...
喜歡你...
喜歡你...
喜歡你...
喜歡你...
喜歡你...
喜歡你...
喜歡你...
喜歡你...
喜歡你...
我眼定定咁望住佢，我知佢仲有嘢想講。
呢一句說話，我等咗好耐。
忽然間覺得之前為Kitty做嘅嘢，全部都值得。
原來我想要嘅嘢，真係好簡單。此刻，我心中，有股滿足感。
其寊我最想嘅，唔係話想同Kitty拍拖，我知自己配唔起佢，同佢一齊，我哋會面對好多問題，萬一解決唔到，到時會仲傷心。
我心裡原來清楚得很。
我只係想知道Kitty心意，就此而已。
Kitty講一句唔鐘意，無Feel，此情此景，已經差天共地。
「但係...但我唔想一齊......」Kitty用力地捉實個欄杆。
「我知道我哋無結果......」
「呢兩個月，見唔到你，已經令我覺得好辛苦。日日都會掛住你，掛住你帶我去玩，去食啲好嘢。」
「自從.......嗰日....之後......」係呢度，Kitty講講下，好似有啲想喊咁。
但見佢都忍住，將啲淚水強收回去。
我輕撫佢嘅背脊，我嘅心情唔會比Kitty差。
「其實我只不過係關心你，想你好姐，但......但係嗰日真係好令我失望!!!」Kitty好認真咁望住我。
嗰個眼神，同當日嗰個一模一樣。
「我知，我知我令你失望，但我真係好努力，我有俾心機讀書架!!!」我試著解釋。
「我知你有努力，我係身邊都感受到，但係......我只想你對自己多返啲信心姐......」
Kitty語畢，便離開欄杆，係海旁度繼續行。
我趕緊追上去，「我有信心架，我啲信心都係你俾我嘅。」
無Kitty嘅鼓勵，我諗我DSE真係求其考過就算鳩數，點會好似依家咁認真對待？
Kitty低著頭，含蓄地笑起上嚟。
「真係？」
「係呀。」
「咁你今次有無信心先？」Kitty問我。
「有呀!!!我覺得自己考得唔錯呀。」我如實地道。
「但我對自己無信心.......」Kitty突然落莫地說。
「咩事呀？」我有點擔心。
「我唔想long d。」Kitty捉住我隻手。
Kitty嘅小手十分之柔軟，我好想捉緊佢隻手唔放。
「long d咋嘛，你有時間返嚟咪得囉。」我極力諗住說服Kitty。
「唔同架，」Kitty將我隻手捉到好緊，「long d嘅話，係我最需要你嘅時候，我無辦法捉緊你隻手。」
「我過嚟搵你咪得囉。」
年輕嘅時候，就係可以咁衝動講呢啲唔知可唔可以實現到嘅承諾，不顧後果。
Kitty輕輕搖頭，「唔係你話想過嚟就過嚟，就算係柴灣同荃灣，都要成個幾兩個鐘啦，更何況我哋天各一方？」
好多愛情，都敗給了現實。
「咁唔通就咁玩完？你甘心咩？」今次我學精啦，我唔再亂咁發脾氣，我只想理性咁溝通。
「唔甘心架。」我哋都停下腳步，唔理旁人嘅張望。
Kitty咬咬下唇，睇得出佢所講嘅，唔似係假話。
「但係我唔想long d令我一直掛心，一直痛落去。」
「我寧願長痛不如短痛。」
我唔知點答好，因為佢所講嘅都係事情。但係我唔清楚咩係long d，啱啱考完DSE嘅我，只係對呢個詞有模糊嘅概念。
並無深刻嘅體會。
天真嘅我，以為一切只要有心就可以做到。
「兩個人只要鐘意就得啦，好多嘢都做到，都可以捱過去架!!!」我好肯定咁講，而我堅信呢樣嘢係無錯。
「呀水......唔好咁啦好無？」Kitty別過面去，好明顯佢唔想我見到佢傷心。
「唔試過又點知姐？」TVB對白都出埋嚟，只係想留低佢。
「我唔想咁辛苦，我只係想拍拖可以開開心心。」
「我之所以會鐘意你，係因為同你一齊我好開心。」
「但如果同你一齊變得唔開心嘅話，咁我仲係咪鐘意你呀？」Kitty不自覺將佢嘅音量提高。
我亦都明白佢想講嘅嘢......我知佢依家想要啲咩，我明白佢嘅心情。
Kitty所講嘅，亦都算係我嘅感受。
但佢無得阻止我嘅決定，就係繼續愛佢...
「等我哋都留個美好回憶呀，好無？」Kitty降低聲線，柔聲道。
未等我回應，已經衝咗上嚟攬住我。
攬得我好實好實，過咗一陣，本來係心口嘅一道悶氣，好似釋放曬出嚟咁，心頭一軟。
我都好好哋回敬佢，攬住佢。
Kitty成個人壓埋嚟，令我感受到佢雙峰嘅型狀。
但呢種感覺一閃即逝，好快Kitty就放開咗我，然後係我臉上留下一個唇印。
係我耳邊講咗句：「再見。」
就頭也不回咁走咗........
而我，只能夠望住佢遠走嘅背影，咩都做唔到。
係Kitty臨走嘅時候，我望到，清楚咁見到。
係Kitty臉上有兩條無聲嘅淚痕。
輕輕劃過佢嘅臉龐，眼淚只係流到一半，佢就已經走咗。
只有幾秒嘅時間，但嗰個畫面能夠令我一直記住......一直留係我心入面。