溝女的聖地──補習社: 69-70
其實msg唔止呢啲......我越睇就越心up。
我知...係我唔啱，難聽啲講，我好撚自私！
為咗唔好俾自己唔捨得，為咗唔好俾自己難過，就一意孤行。
完全無理過Kitty嘅感受，我真係好仆街......
『我只係想你嚟見多一面姐...咁都好難咩？』
『好憎你呀！！！！！』
『憎死你呀！』
呢句係Kitty最後sd俾我嘅whatsapp。
我個心好痛，越係愛，就越係覺得痛。
呢種痛唔係因為後悔無去見佢，而係因為見到Kitty痛，明白佢啲感受而痛心。
之後嗰幾日，我死死地氣咁溫書...但溫得好差，因為我心情好差。
最可怕嘅係，即使我見唔到Kitty，但我可以想像到Kitty嗰刻係幾咁傷心，無助，同埋...失望。
呢幾日嗰腦就係不停咁浮現起Kitty當日嘅表情，就連發夢都會夢到佢係機場屌鳩我。
我覺得Kitty嬲我係應該，講到底，只係自己無用，無用嘅人，憑咩俾幸福人？
我係度反省，點解自己可以咁廢？
同時間，我啲動力都返緊嚟，我狂讀書，化悲憤為力量，亦令我無咁多時間去諗Kitty。
有時候我都想知佢過成點，係嗰邊生活得如何，但一切都成過去，我哋都返唔到去以前咁，只能夠留下一個回憶。
一個人無辦法陪你走到最後，再美好嘅回憶，都不過是過去...
依家我只為眼前嘅retake奮鬥，同時當係我要實踐對Kitty嘅承諾。
呀楊就考得好，順利入U，雖然唔係佢自己最想讀嘅嘢，但聽佢好似都玩得幾開心咁，我都覺得幾好呀。
關晴差少少分，但都入咗asso，佢哋都仲一齊緊，無俾萬惡嘅Ocamp拆散。
中學嘅情侶，一上大學面對最大嘅難關就係Ocamp，裡面有好多洪水猛獸，佢哋會單人匹馬，亦會集結成群。
一人難敵四手，但好彩佢哋都無咩事，感情穩定。
一年啦，用咗成年嘅心機，我總算係駁返上大學，讀到啲水泡科。
我同呀楊都好耐無見，佢有佢嘅新朋友，新兄弟，而我仍舊維持現狀。
Kitty係我心入面啲份量，隨住時間慢慢減輕咗唔少，除咗大時大節，會諗起佢，但心會抽蓄一下，每重覆一次，嗰種痛楚就減少啲啲，直至完全無感覺為止。
呢一段青春嘅回憶，會俾我放係心底裡面。
間唔中會拎出嚟回味一下，然後會心一笑，會為自己曾經做過嘅傻事而覺得好on9。
但諗諗下，如果當初嘅我好成熟，咩事都會衡量一番，穩穩陣陣咁過自己嘅青春。
咁先會係遺憾。
我慶幸自己嘅青春衝動過，無腦過，on9過。
Kitty送俾我嘅頸巾，陪我渡過無Kitty嘅第一個聖誕節，我好等唔覺得孤獨。
上到大學，Ocamp呀，住hall我咩都有參加，自己本身屋企窮，唯有去返part time賺錢俾自己洗。
係好辛苦架啲日子，又要玩，又要搵錢。
一開始我好唔適應，因為自己份人又毒又唔識講嘢，所以一開始難融入啲圈子入面。
但我想大學嘅時候有所轉變，我唔想再好似中學咁做個毒撚，咩都怕事！
所以我慢慢開始同人接觸多咗，個人都大膽咗。
雖然係辛苦，但係日子總算開心。
唯一會令到我感到唔開心嘅.......係Kitty。
我順利知道自己入到U嘅時候，有種守得雲開見月明嘅感覺。
一身輕鬆曬，所有嘅包袱都無曬，長期積落嚟嘅壓力真係令我好辛苦。
今次嘅壓力，同埋緊張係比出年多，因為今年比出年更加勤力，自然想回報得更加多。
一分嘅耕耘，唔一定有半分嘅收穫。但你唔耕耘，唔好期望有收穫。
但好彩我都入啦，但唔係好好嗰隻。
呢個好消息我好想同Kitty講，但事隔一年之後，原來好多嘢已經唔同曬。
我將封印已久嘅facebook、ig都打開，本來無咩朋友嘅我，根本無咩好睇。
我唯一想睇嘅......就係Kitty。
打開fb，搜尋Kitty。
搵唔到佢。
我順住自己嘅朋友名單去搵，終於俾我搵到出嚟。
佢換咗個icon，連名都轉埋。
望住佢張新icon，一如既往咁靚。呢張相嘅背後係日落嘅黃昏，影到Kitty好唯美。
我深深俾佢呢張相吸引住，呆咗幾秒，同時間我好仔細咁睇，因為佢轉變都幾大下。
佢原本烏黑嘅秀髮，染成咖啡色；原本嘅直髮，變成曲髮。
成個人變到鬼鬼地咁。
唔知點解，心入面有股莫名嘅酸感。
好葡萄，好唔知點咁，但我又講唔出咩原因。
再去睇一睇佢ig，都幾經辛苦先搵到出嚟，換嚟嘅，係失望。
佢ig po相嘅次數，多咗，密咗。以前嘅佢，都唔會點樣po相架啦，依家佢慢慢變得開放，見識到呢個世界有幾大......
亦代表，Kitty真係同我越行越遠。
係Kitty最新嘅相到，見到一張我唔想睇嘅相。
——Kitty拖住另一個人嘅手。
下面只係打咗一個emoji。
心形嘅emoji。
我好清楚，Kitty唔係啲咁隨便嘅人，佢唔會亂咁同人一齊。
如果係換著其他女仔，我可能會覺得條女係雞！係公廁！
但我深知Kitty，而且正正因為自己知，反而覺得更加痛。
甚至感到後悔。
後悔點解自己唔勇敢啲？點解拖住佢嘅唔係我？
問心，自己係葡萄，因為食唔到人係度提子。但理智咁諗，佢絕對有能力去揀個更加好嘅人，我呢種廢人，俾唔到幸福佢。
我唔識得形容呢種感覺，但後來我就明白。
呢種係叫做現實。
再多嘅悲傷，生活都係一樣照過。
時間唔會因為你係度概嘆人生，而有所停留，佢仍然會前進。
你越係感到悲傷，你擁有嘅時間就越嚟越少。青春亦一點點地流逝。
所以我好珍惜自己係大學嘅時間，可以玩嘅，就玩多啲，可以參加嘅就參加多啲，學多啲嘢。
一眨眼，好多嘢都過去，其實唔係話唔記之前嘅嘢，只不過無時間俾你打開回憶之門。
今日我難得返屋企，因為呢排都好忙，又要打工，又要搞上莊啲嘢，同埋趕project，好耐都無返屋企。
耐無見屋企人，都見到呀媽好似老咗咁，無以前咁好中氣，仲多咗幾條白頭髮咁。
我就諗返起呀媽之前同我講嗰一番說話，要靠自己。
我諗我除咗令Kitty失望，都令呀媽失望。
我入到自己間房，整齊咗，好明顯呀媽係有幫我執過間房。
我見到枱面有一堆中學啲書同埋筆記。
咁耐我都好似無整理過，就咁堆埋一齊就算。
為咗減輕呀媽嘅負擔，我就幫手執下佢。
執下下，係呢堆嘢嘅底下，我見返我同Kitty補習社嘅筆記簿。
見到呢本嘢，我知道我打開緊回憶之門，好多嘢衝緊出嚟。
但感覺上無以前咁強烈，我明白到，以前嘅我，Kitty就係我生活嘅重心，係我嘅全部。
但係依家嘅我有幾個女性朋友，有一班朋友，我嘅時間都好自然咁分配俾佢哋。
我望住呢本嘢，慢慢摺起本改變我青春啲筆記簿。
裡面有啲我同Kitty上堂無聊嘅塗鴉，一堆畫同埋啲字句。
『好想瞓呀！』
Kitty嘅字好秀麗，係我細問之下，先知佢之前有學過書法，佢屋企人都要求佢要寫出一手靚字。
『想瞓咪瞓囉』相反我嘅字就好似打風咁。
我甜甜一笑。
我都好耐未試過笑得甜...
依家睇返，甜蜜嘅回憶只有虐心嘅成份。
嗰時嘅我哋，隨意咁係筆記上面搵個空位，就寫上去。
呢啲擦唔走嘅回憶，好值得留念，一筆一筆咁寫下我哋嘅青春。
我記得Kitty之後真係瞓著咗架，仲俾我影咗相，我都一路keep到依家。
直到我摺到其中一頁，我就呆咗係度...
因為我見一張紀念冊。
而張紀念冊姓名嗰攔，係寫住：
程雪。
我心諗，我幾時收到呢張嘢架？而我唔知？
點解Kitty唔同我講聲嘅？我心裡有千百個問號。
只見張紀念冊係Kitty親手設計，因為好多嘢都似係佢自己畫。
係嗰陣，肯花心機設計紀念冊嘅人唔多，一嚟無咁多心機，懶啦，二嚟都要忙住溫書，邊有時間整呢啲嘢。
所以我覺得Kitty肯設計紀念冊，已經令我十分佩服。
而我收到Kitty親手做嘅紀念冊，係榮幸。
可惜，一切只係浮雲，好多事情已經過咗去，返唔到轉頭。
往事只能回味。
路只可以回頭看，唔可以回頭走。
但呢個紀念冊真係好懷念，憶起我同佢好多回憶。
係紀念冊上，寫咗好多Kitty鐘意嘅嘢，搞下gag嘅對白。
例如：最想去嘅國家，係「美麗而神秘嘅國度」之類嘅嘢，膠膠地，低低bb咁。
但反而咁樣更顯得佢可愛，天真。
Kitty仲有附上佢嘅個人照，係佢出去玩嘅自拍照嚟。
好清純，仲帶咗幅好得意嘅黑色粗權眼鏡。同佢依家嘅感覺，好不一樣。
哩個紀念冊好值得我懷念......而且睇得出Kitty真係好用心。
就算我之前做到幾錯幾on9都好，我依家會覺得係年少輕狂。
因為年輕，就係可以俾你用嚟當做錯嘢嘅籍口。
係我睇完呢張紀念冊後，我諗住拎去收藏佢。
我一翻開背面，見到一堆密密碼碼嘅字。
而呢堆字嘅頭頂，寫住：致陸秋水
我拎起張紀念冊，真係好仔細咁一隻一隻字咁睇，直到我睇曬成篇嘢，先有一種釋懷嘅感覺。
呀水，一路以嚟你都俾咗好多嘢我，好多謝你。
你帶俾我好多嘅第一次，好多嘅回憶。對你嚟講，可能只係好普通嘅事，但對我嚟講卻好珍貴。
茶餐廳，好平，好cheap。但同你一齊食，食得好開心，而且我覺得好好食！我可以用好多嘢換嚟呢一刻快樂嘅時光。
每個人認為嘅嘢唔一樣，每一樣嘢都有佢唔同嘅價值。所以唔好認為自己唔好，你係我心目中已經好好。
我之所以想你等我，係因為想我哋都有一個目標，一齊進步。其實唔係淨係得你等緊我，其實我都一樣等緊。
等我哋一齊成長，一齊上大學，有自己嘅時間。
雖然我擁有好多嘢，但係我想要嘅嘢好簡單。
只係想要一個我鐘意人，佢又鐘意我，咁簡單。
但其實做落去好難。
鐘意，唔係我哋諗得咁簡單，做起上嚟好複雜。
我好珍惜有你係我身邊嘅日子，但我哋行得幾遠，就幾遠啦。
無論結果係點都好，係happy ending又好，sad ending又好。
曾經有過美好回憶就好，總比遺憾好。
呀水，多謝你出現係我青春入面，豐富我嘅人生。
我好感激你對我咁好，我會記得架！XD
Kitty上。
睇完之後，我覺得個心好似抽畜緊咁，好充實。
可能我想要嘅，並唔係我哋係咪一齊到，我只係想要一個答案，一個答覆。
我擁有一個美好回憶。
但同時間，有種反差感。佢呢篇文係多謝我，但臨別時卻好憎我。
我一諗起嗰種轉變，就好搥心口。
因為由此到終，佢都好著緊我，係我自己無用。
人唔到走咗嘅時候，無唔會識得珍惜。
我都係一樣，一樣無好好珍惜Kitty係自己身邊嘅時候，唔識得係感情上學得聰明啲。
我等到Kitty唔係身邊啦，先識得珍惜，你話犯唔犯賤啦？
係呢段關係入面，雖然結果唔好，但至少學到嘢。每段關係，都會令自己係不知不覺中成長。
珍惜眼前人，好老土，但好有用。
就好似啲涼茶，好苦架，次次飲都覺得難頂，但真係有用！
我暗暗同自己講，如果將來我遇到個好女仔，我一定會好好珍惜！唔會俾佢走！
初戀，有幾多個係美好收場呀？
真實嘅故事，好多都係殘酷。但經得起殘酷嘅磨練，長出嚟嘅果實會份外甜美。
四年嘅時間，好快就過去，中間發生咗好多事。
要講嘅話，唔係一時三刻可以講得清楚，呢啲都係正常人會發生嘅事。
係每經歷一啲事情之後，我都會學到啲嘢，慢慢變得識諗，變得成熟。
無咗以前會做傻事嘅衝勁，做事之前會諗清諗楚，一諗到啲on9嘢都會bam自己。
係呢幾年入面，呀楊同關晴都恩恩愛愛，佢哋都無再提起過Kitty。
佢哋都話我變咗好多，變得成熟咗，同埋開朗咗，個人無之前咁沉悶。
呢一番說話佢哋係我生日嘅時候講。
上到大家，時間少咗咁，可以聚埋一齊嘅機會難得，有時都係約下夜晚得唔得閒食個宵夜，飲下酒咁。
「都咁耐啦，做咩仲唔搵返個女朋友？」呀楊帶點醉意地說。
但其實佢唔係醉嘅，我清楚。
只不過佢兩邊臉紅曬姐。
佢同關晴少不免會嗌交架啦，試問有邊對情侶未試過嗌交呀？咁呀楊咪會搵我吐下苦水囉。
今日只不過係好耐無見，約出嚟飲下嘢姐。
Year1嘅時候，到佢year2，都仲會成日見下。但到咗final year，就佢出嚟做嘢，大家見嘅次數都少，好耐先見一次。
「其實你都唔差姐，肯搵實到女嘅...嗱！你唔好同我講你仲掛住嗰個Kitty呀！」
呀楊拎起罐啤酒，咕嚕咕嚕咁飲咗幾啖。
不愧係呀楊，一嚟就已經戳中我心事。
其實我都有啲女仔朋友嘅，有啲都暗示得好明顯，我自己心裡最清楚。
但依家呢種感覺，同Kitty係無得比，同樣地都係暗示，但你會覺得好攰......無咁嘅心機。
依家諗返，Kitty真係俾咗好多機會我，係我自己無好好珍惜。
怪就只能怪自己，而且我怕自己俾唔到幸福人。
「我心入面仲係有Kitty......」我如誠地講。
「你真係好長情。」
「我都無計架。」我百般無奈，可以嘅，我都想放低一切回憶，從頭嚟過。
但我放唔低，因為我覺得回憶好美好，我唔捨得放低呢段咁美好青春。
放低，換之言姐係選擇性忘記。
當我等返一個人嘅時候，例如返屋企，行路去上堂之類嘅時間，聽聽下歌就會諗返去佢。
唔知你哋有無試過，但我係成日都試。
當你聽返一首熟悉嘅音樂，你會記起你幾時聽過，嗰下嘅moment係咩感受，都會瞬間浮返上嚟。
就會諗起Kitty。
如果我放低咗，我就唔會再咁經常記起呢啲事，我做唔到。
「長情嘅人姐係自虐狂，鐘意自殘。」
「你咁同自殘有咩分別？」
飲過酒嘅呀楊更加兇狠，語氣更強硬。
我清楚，因為我依家真係係度自殘緊，一直都走唔出個傷痛。
一路回憶過去，每次從回憶嗰邊返嚟，都會傷痕纍纍。
但你又控制唔到自己唔返去回憶入面，每次都情不自禁咁走入去。
「我都無辦法...」你要知道，我講呢句說話係幾咁無奈。
可以揀，我都唔想咁。
我都唔想咁痛苦，咁辛苦。
人已經唔係自己身邊，仲要間唔中諗起Kitty，就會去睇佢ig facebook嘅最新動態。
雖然唔係話好曬，但都會打啲好甜蜜嘅字句，一句起兩句止咁。
但啲字句越短，你會猜測嘅嘢就多咗，會亂咁諗嘢。
所以每次見到都會心痛一番，好辛苦。
一開始係成日都係咁，但隨時間慢慢咁走，會諗起，會打開ig嘅次數就越嚟越少。
「我知呢啲嘢你都控制唔到，但係做兄弟嘅，唔通一路睇住你咁樣落去咩？」
呀楊講嘅嘢唔係無道理，我都知自己唔可以再繼續咁落去，係時候要走出嚟。
「我見住你四年啦！四年都忘記唔到Kitty，大佬呀！有幾多個四年俾你揮霍呀？係你大學生活唔好好拍返次拖，你出嚟做嘢更加難呀！」
「你覺得好女仔嘅，通常都俾人預訂咗架啦，剩底嘅咩料你都知啦！」
「我唔想見到你行錯咁多路。」
我舉起罐啤酒，一嘢大啖咁飲落去，發洩自己內心嘅不滿。
我知道呀楊講得啱，講得無錯呀，我只怪自己點解好似同五年前一樣，都係咁無膽！
我以為自己進步咗，大膽咗勇敢咗，無咩嘢自己會驚。
但原來面對感情事嘅時候，自己都係咁軟弱。
「你知要搵個啱嘅女仔，其實好難。」
「我要拍拖，都想搵個投契嘅女仔，但我都遇唔到。」我搵唔返好似Kitty咁好嘅女仔。
「你唔係搵唔到，你係唔想搵姐！」呀楊斬釘截鐵地道。
頂！可唔可以唔好咁清楚我？
呀楊又試一嘢戳中死穴，我連俾自己搵籍口都唔得。