溝女的聖地──補習社: 72

係畢業之後，我有一段時間搵唔到工，但努力咗一陣先，算係有份唔錯嘅工。
 
正式成為上班族。
 
有晚放工經過旺角嘅時候，本來係車上面昏昏欲睡嘅我，一個熟悉嘅味道係我前面個位傳嚟。
 
我即刻成個人醒曬。
 
但係，屌你老味坐係前面，又睇唔到樣，但我認得呢個味道，係Kitty身上成日都聞，但事隔多年，其他人身上有都唔出奇……
 


我忽然間唔知痴撚咗邊條神經，細細聲咁嗌咗聲：
 
「Kitty？」
 
然後前面個女仔就左右搖擺咗一下，唔知發生咩事咁，唔知係咪有人嗌緊佢。
 
頂！可能佢真係唔係Kitty呢？
 
但直覺同我講係，佢就係Kitty！
 


於是我又再輕聲嗌多次，嗌到好似呻吟咁。
 
「Kitty？」
 
佢先意識到……轉身過嚟望住我。
 
此情此景，我覺得我哋好似回去以前，係補習社初初見面嘅時候咁……

前面哩位女士用奇怪嘅眼神望住我，然後開口問道：「先生你係？」
 


仆街呢刻真係柒到想搵窿捐。
 
「唔好意思……我認錯人。」我即刻縮曬水咁收咗皮，好鬼尷尬！
 
「哎……唔會。」然後就拎返轉頭啦。
 
唉……都怪自己咁心急，仲要俾希望自己，等自己嘅期望落空。
 
當我想繼續帶返個耳機聽歌嘅時候，嗰位小姐突然拎轉頭，同我講咗句嘢，但我一時之間聽唔清楚。
 
我除低個耳機。
 
「吓？」
 
佢一臉不耐煩嘅樣，再講多次，「我問你頭先叫我咩名。」


 
「哦～」我俾佢突如其來嘅不耐煩嚇親，覺得呢條女好無禮貌，啲港女味開始流出嚟。
 
「Kitty。」
 
個女仔，咪住，呢條女應該唔係女仔，從佢嘅妝容嚟睇，似女人多啲。
 
女仔同女人嘅分別係，一個係無俾人開發過，一個係俾人屌過。
 
「你同佢係咪係補習社識？」個女仔思考咗幾秒，然後輕輕道出。

「吓？」我更加驚嘆，心諗有無咁啱呀？
 
「點解你會知嘅？」我第一個反應就係噴咗呢句說話。
 


「我係Vicky呀，嗰陣時坐Kitty隔嚟嗰個。」佢把尖銳嘅死人聲，頓時勾起曬我嘅回憶。
 
「哦，係你呀？咁啱嘅？」我好有禮貌咁笑一笑。
 
但其實心諗：「你條八婆！我已經今日唔同往日，我唔再係成日俾你哋恰嘅毒撚！」
 
屌！我都覺得自己虛假。
 
其實人大咗，難免會帶返個面具做人，你係好辛苦，但你又唔除得落嚟，因為你一除低，分分鐘受傷嘅係你自己。
 
帶面具只係保護自己嘅一個方式。
 
想當年我就係唔識得帶面具做人，俾盡班閪女人恰。
 
「估唔到你仲掛住Kitty喎。」


 
睇嚟佢身上陣味，我係認錯啦。的確係佢身上係有熟悉嘅味道，但唔係咁樣，我諗係自己錯覺啦。
 
唔會佢就係Kitty然後扮佢個fd嚟玩鳩我呀！？咁撚心計？
－
「係呀，耐無見緊係想見返啦。」我緊係唔會俾你套到啦。
 
但我會套返你囉！
 
「咁依家Kitty點呀？」我發覺呢個位傾有啲老尷，於是坐係佢隔離，然後問佢。
 
好彩隔離無人咋，如果唔係都唔知點傾落去。
 
而且佢都唔同咗好多，一坐佢隔離就覺得難頂，唔知點解佢就係有一個氣場係度，令人覺得難以接近，高高在上咁。
 


佢係真係變瘦咗變靚咗，仲打扮得幾成熟，但個格同Kitty都係差幾皮，同之前無咩分別。
 
「無呀，佢呢排返咗嚟，啱啱先同佢食完飯。」佢邪邪地笑。
 
你唔係好有錢嘅咩？做咩搭巴士呀學人？貪巴士逼呀？
 
當然我無講出口，「你哋係邊度食呀？」
 
我想睇下依家過去會唔會有可能見返Kitty...
 
 
「做咩要同你講呀？都唔關你事！」
 
女人可以有幾直接得幾直接，串過馬撚。
 
但我都好聲好氣咁同佢講，「我都係想關心佢姐。」
 
不過佢下一句瞬間收咗我皮。
 
「你之前hurt到佢咁深！你諗住關心佢！？咪玩啦！」Vicky提高咗聲量，搞到全車都紛紛用奇異嘅眼光望住我，當正我係衰人咁。
 
但我駁唔到。
 
我知喱個係事實，以前嘅我，真係好on9。