溝女的聖地──補習社: 71

「你自己唔試下，無人幫得到你，因為你都唔願意踏出第一步。」呀楊每講一句，就好似支針咁，吉落個心度。
 
針同刀唔一樣，痛楚係有分別。刀嘅嘢一嘢捅入去，好深好痛，甚至可以即時死亡；但係針唔一樣，好淺咁慢慢吉入去，唔算好痛，少少痛楚咁，但你實死唔去，吊住你條命咁。
 
「你一直停留係以前，有咩用姐？我哋返唔到去架啦！我哋只可以一路向前行。」
 
「我之前唔講，係因為我知道你需要時間走出嚟，等你慢慢好返，但依家我唔係咁認為。」
 
呀楊又飲咗一啖酒，望實我，眼神係同我講，『無自己諗啦』咁嘅意思。
 


我無出聲，只係係度飲悶酒。
 
以前嘅我唔識得飲酒，覺得飲酒唔好，仲要唔識飲酒。
 
但呢幾年，我慢慢學識得飲，而且越飲越多，每次都wing住咁返去。
 
唔係呢啲係咪成長必經階段……男人識得飲酒，就係成長嘅開始。
 
唔識飲酒或者唔飲酒，證明自己真係毒。
 


人無可能一直停留係同一個位置，同一個階段，我哋總會改變。
 
原來依家回頭望一望，自己真係改變咗好多，心智都成熟咗，但對感情，我始終如一。
 
因為我走唔出嗰一步。我有膽改變自己，去試唔同嘅嘢。
 
但我就係無膽去面對感情，原來我對感情嘅處理，都係同以前一模一樣。
 
呢方面我係無變到，都係咁懦弱。
 


可能係自己性格嘅關係啦，見住自己身邊嘅朋友不停咁換畫，換男／女朋友好似食生菜咁。
 
呢啲對佢哋嚟講駕輕就熟，完全唔會好似我咁無膽，有時我都好羨慕佢哋可以咁開放，同埋直接表達自己嘅感情。
 
反而自己嘅感情卻一路原地踏步，無進步過……

伴隨著呢種尷尬嘅笑聲，我同Amy嘅關係就好似落定咗咁。
 
但我好唔適應，就算返嚟香港之後，我都唔知應該點做……
 
但Amy佢都好主動咁搵我，約我出去，食下嘢，行下街咁。
 
我哋就好似同其他情侶咁，無咩分別，但我哋從來都無話一齊，姐係無正式嘅表白都無。
 
但行動上，算係情侶掛？我都唔知，我都好迷惘。


 
我都唔想咁仆街，明明唔係話好鐘意，但又同呢個女仔發展。
 
我想逼自己試下出去第一步。
 
「我哋……係咪情侶呀？」Amy係旺角呢個人多擠逼嘅地方，拖住手問我。
 
一時之間我都唔知點答先好……
 
其實沿路上我哋都有講有笑，但唔知點解Amy會忽然間問呢條問題。
 
「哎…係掛。」我敷衍地道，因為我都唔知自己想點。
 
Amy聽到之後，神情極之落魄，我見到佢呢個表情，就好似嗰時同Kitty咁，會忍唔住心軟。
 


認真啲睇，佢同Kitty都有些少相似。
 
係我哋行緊嘅時候。
 
迎面好快咁行過一個熟悉嘅身形。
 
經過我嘅時候，有一股熟悉嘅香氣……
 
我回頭望一望，只見嗰個女仔低頭玩緊手機，好快就係人叢中穿穿插插離去了。
 「做咩呀？」Amy捉緊我隻手問。

我笑了笑，「無呀，我好似見到個熟悉嘅嘢。」

「係呀？」Amy低頭不語。



然後佢輕輕放開我隻手，然後同我講，佢夠鐘意返屋企啦。

我見佢好勉強咁牽起嘴角。

之前嘅我，傷害咗一個的鐘意嘅女仔；如今，我傷害咗一個我根本稱唔上鐘意嘅女仔。

今次嘅感覺無上次咁強烈，只帶點淡淡嘅悲傷。

「咁早就返屋企？」我望一望手機上面嘅時間，只不過係8點鐘左右。

之前我哋都會行到好耐先返去。

「其實你心入面早就住咗一個人。」Amy眼神裡沒有一絲猶豫。

「我唔會怪你……其實我都感覺到架啦，只不過係我太鐘意你，所以先咁主動。」



唔知點解，我無留住Amy嘅衝動。

我知Amy係好女仔，我都好慶幸我無遇到啲極品港女。與其話遇唔到，倒不如話我無可能同到嗰啲人做朋友，佢哋都唔會睇得上我啦。

我知道之後都未必遇到好似佢咁好嘅女仔，但我寧缺，都唔想濫。

我有自己嘅堅持，堅持等到「對」嘅人。

我無咩都講，就咁望住Amy係呢個人山人海嘅旺角消失。

我哋之後都無再聯絡。

我都好多謝Amy，係佢令我知道真正嘅答案。