溝女的聖地──補習社: 64

我知我係間房度係諗唔到咩辦法架啦，所以我決定出去行下放鬆一下心情。

我換好曬衫嘅時候，我望到我掛係度嘅頸巾。

我毫不猶疑咁拎起咗佢，圍係自己條頸度，然後出門口。

臨出門口嘅時候我仲對住係廚房入面嘅老母大嗌，「我出去啦，一陣返嚟食。」

「小心啲呀，早啲返呀，啲嘢凍咗就唔好食架啦!!」



頓時心頭一暖，原來有陣時，微小嘅舉動，都會令人暖在心中。

我先明白，原來係自己太過粗心大意。

我走在夜晚嘅街道上，冷風瀟瀟，著住件單薄嘅U記外套，更添幾分寒意。

但我條頸完全感覺唔到凍......唔係因為Kitty送，所以有喱種錯覺。

我係真真實實咁覺得唔凍，仲好暖添......



我仔細望一望條頸巾，只見織到密密麻麻，無機會俾啲風吹入嚟。

由此可見Kitty係幾用心織喱條頸巾......

我坐係屋企樓下嘅瀡滑梯度，一邊諗起Kitty一針一針咁織呢條頸巾俾我，係幾咁辛苦嘅一件事。

如果係我...我無咁嘅恆心去織呢條頸巾。

究竟Kitty點樣可以堅持到？佢究竟織咗幾耐？



一諗起佢為我做咁多嘢，幻想到Kitty為我咁辛苦，將條頸巾一針一針咁連起上嚟。

我眼眶就濕成一片，視線慢慢變得模糊，任由啲淚珠趺落嚟......

我越係諗起Kitty為我做咁多嘢，Kitty當日失望嘅表情，就越係令我心痛。

我咁大個仔，第一次為一個女仔喊...我諗，我真係好愛Kitty。

佢真係做咗好多嘢，佢會咁失望，都係情有可源......

怪就怪自己廢，與人無尤。

連親口應承咗人嘅諾言都做唔到，我憑咩做人男朋友？我憑咩俾到幸福人？

我用手擦一擦雙眼流出嚟嘅眼淚，下定決心，唔可以再頹廢落去。



我去行一行，吹一吹風，去散走自己呢一個禮拜嘅陰霾。

順便吹乾自己啲眼淚，等屋企人唔好發覺到，原來自己喊過。

女人隨時鐘意幾時喊就幾時喊，男人再想喊都要忍住，然後去個無人嘅地方，先喊。

喊完，就舒服曬。但人哋唔會知背後嘅悲傷，只有自己知。

呢啲先係真男人。

跟住嗰啲日子，我都好專心咁溫書。

成個中學，最瘋狂讀書嘅時候，就係呢段時光。



學櫻木花道話齋，「我最光輝的時間，只有現在。」

我荒廢咗中學大部份嘅時間，去到最後先識得努力，已經為時已晚。

呢個世界無咁多臨時抱彿腳，基礎就係基礎，有幾多料就有幾多料，呃唔到人。

聽日，就係我第一科嘅考試，心中有說不出嘅緊張。

嗰種程度，同第一次見Kitty嘅時候差唔多啦，不過再多少少咁啦。

嗰一晚，我緊張到瞓唔著，雖然我係下就考，但係都緊張架......

係我輾轉反側嘅時候，我手機傳嚟一聲震動。

我以為係啲遊戲訊息，然後無理到，繼續係張床度碌。



我碌咗成個鐘，都係瞓唔著，於是忍唔到拎部手機出嚟，諗住上下連登，等自己眼瞓啲。

點知一拎起部手機，就見到一個小時前，Kitty傳來一個訊息。

「我屌!!!!!!!」

雖然係幾大聲下，但都不足以嘈醒冬眠緊嘅老豆老母。

心諗今次仆街啦!!! Miss咗Kitty訊息。

我即刻打開手機，Kitty嘅上線時間，係sd完呢條msg之後嘅一分鐘，然後再無on過。

『聽日加油』



只有短短四隻字。

我見到呢4隻字，本來有些少睡意嘅，變到成個人精神曬。

我唔知點解佢會知我係聽日開考，可能係關晴同佢講都唔定，但我無深究落去。

我唯一著緊嘅係，原來Kitty都仲係關心我。

我有好多嘢想同Kitty講，但又唔知從何說起好...

我只係打咗句，『多謝!!你都要加油。』

我好慚愧，因為我連Kitty邊日考oral都唔知......

我唔敢問，我驚我一問，佢又再嬲多次，依家喱個時期好敏感。

每行一步都要小心翼翼，生怕行差半步。

就好似玩緊地雷遊戲咁，每撳一下，都要諗過計過，仲要估嚟估去，睇下邊個最大機會中伏。

然後......我更加難瞓著。

我有留意Kitty有無再上線，但可惜無...

睇嚟佢已經瞓著咗，我等下等下都瞓著咗。可能精神過去，同面對喱啲嘢特別攰啦，都算好快瞓著。

一瞓醒，第一時間load到琴晚嘅事。

眼都未睜得開，就已經拎部手機嚟睇whatsapp。

Kitty係幾分鐘前on過，亦都睇過我嘅訊息......

但係無覆我。