溝女的聖地──補習社: 63

之後嘅日子，Kitty就消失咗係我生活咁……
 
無覆到我whatsapp，無再打電話俾我，facebook都無更新。
 
我生活就好似失去咗重心咁，失去曬平衡。
 
我無自己去自修室溫書，因為無咗Kitty，自己去都無癮，加上又無朋友陪我……
 
叫呀楊啦衰仔！
 


呀楊？佢自己都成日同關晴走出去溫書啦，我又廢事做人電燈膽啦係咪？
 
平時係自修室見到啲出雙入對嘅情侶，我都唔怕，因為Kitty就係我身邊。
 
如今，我怕我見到，就會無曬心情，就會變到頹曬，溫唔到書。
 
所以我決定去其他地方溫書。
 
點解唔係屋企溫呢？
 


因為Kitty上過嚟，係哩間房，都瀰漫住Kitty嘅氣味，同埋回憶。
 
回憶就好似一把刀咁，插入你個心，但唔拎返出嚟。你就一直帶住哩把帶有痛楚嘅刀，繼續生活。當你一回憶嘅時候，就拎返出嚟，感受一下無痛苦嘅美好。然後再插返入去，再痛多次。
 
我去starbucks，M記，好多唔同嘅地方溫書，四處走嚟走去。
 
過住好似流浪漢嘅生活……自己都覺得好慘，無人係身邊，孤伶伶一個。
 
但我知道，我需要發奮。
 


我唔想令Kitty失望，唔想佢見到頹廢嘅我。
 
當日Kitty失望嘅表情，一直都浮現係我腦海入面。當我無動力溫書，溫到頹嘅時候，係呢個失望嘅表情喚醒我奮鬥嘅決心。
 
好多電影嘅熱血情節，都係女主角陪男主角溫書，一齊考好個試之類嘅。
 
本來呢啲情節應該發生係我身上架嘛，我應該係同Kitty一齊溫書，有講有笑咁一齊入去自修室，然後一齊出返嚟……

但原來無哩啲情節，會更加熱血，會更加發奮圖強。
 
一開頭嗰幾日唔sad嘅話，根本就係呃你嘅！講真，嗰幾日真係sad到爆，做咩事都會諗起佢。
 
一起身第一件事就係睇whatsapp，睇佢有無覆到我，然後就抱住失落嘅心情起身。
 
跟住好頹廢咁溫書，最後就係溫唔入腦，心神都唔知飄咗去邊度。


 
我好想振作呀…唔想再咁樣落去，我痴咗線咁，成日拎起部手機，睇佢有無覆到我。
 
係間房度我不停咁諗起佢，成日幻想張床仲有Kitty嘅餘香。
 
呢種生活我持續咗幾日，一蹶不振……
 
終有一日，我頂唔順自己，因為我已經成個禮拜都無出街，連我呀媽都有問我咩事。
 
「仔呀！你呢個禮拜無出去溫書嘅？」我老母都察覺到我有異樣。
 
「下係咩？」我索性扮唔知。
 
「係咪同女朋友嗌交呀？」呀媽眼利係眼利啦，係知我哋嘈交，但Kitty唔係我女朋友…
 


「佢都唔係我女朋友。」我冷冷地回道。
 
「下？咁你又帶人返屋企？」
 
「咁人哋有事呀嘛，幫得咪幫囉！」
 
呀媽係房度拖咗我出廳，坐係凳上面，凝望住我雙眼，語重心長咁同我講：
 
「呀水，呀媽都係女人，一個女人無返咁上下信任，係唔會隨便上人屋企。」

平時滿嘴嘮叨，同我串嚟串去嘅呀媽，今日竟然煞有其事咁樣同我講正經嘢？
 
「更何況好似佢咁純品嘅女仔？」
 
「呀媽，你想講咩呀？」我唔係幾明，純品同上人屋企係咩關係？


 
「呀媽我睇得出嘅，你信呀媽就得啦！」
 
「睇得出咩呀？呀媽你講重點啦好無？」我態度十分之唔好，因為呢幾日已經sad到一個點。
 
「屌！你！真係好撚蠢呀！」呀媽忽然氣門大開，大罵一聲。
 
我當堂俾佢把聲嚇一嚇，鳩都縮一縮……
 
我老母都並非善男信女，唔惹少架，真係越老越辣。
 
「做咩呀？」我俾佢嚇到收一收啲氣燄，睇嚟火爆嘅態度即刻收咗皮。
 
「成日問有無重點有無重點咁做乜春嘢？」
 


「呯！」一聲，呀媽一掌拍落佢前面張枱度，又再嚇我一鍋甘嘅，我魂魄都俾佢拍走埋。
 
「愛情入面無咁多重點架！下下都要問人拎重點就死得啦！」
 
「你係我個仔，我點都想幫你啦！唔通我想日日見到你失魂落魄咁係間屋度走嚟走去！？你依家仲有個DSE要考呀，我先諗住點醒你！」
 
原來呀媽佢知架……
 
「但我唔可以直接同你講，你一定要自己慢慢發掘，咩都同你講，只會害咗你架咋！」
 
「有咩事，兩個人自己解決，唔得嘅，再自己諗辦法！」

呀媽未等我出聲，就自己走咗入廚房，繼續做佢嘅晚餐，日復一日。
 
雖然呀媽要我自己諗，但我一時三刻都無一條明路，唔知點樣修補我哋嘅關係……