溝女的聖地──補習社: 65
我好早就起咗身，我望一望個時間，只不過係早上8點左右。
對於一個無返學嘅人嚟講，8點鐘起身真係奇蹟，平時無12點都唔好叫我起身。
如果係平時返學嘅話，應該係遲咗到架啦。
之前我8點鐘醒嘅話，我會即刻瞓返。但係依家我完全醒咗，好精神。
我望住部手機，Kitty嘅icon係同一個女仔嘅合照，相片入面嘅佢，依舊清純，笑容都係咁清新甜美。
好似一切都好熟悉咁，但我哋好似靜止咗咁，郁都無郁過。
我將對話拉返上去，唔洗好多，只係小小咋。
明明之前大家仲有講有笑，仲sd個得意嘅表情符號，氣氛都幾好呀，幾甜下。
下一個回覆，已經係『唔好嬲啦。』
再下一個回覆，就係『聽日加油』
好諷刺。
我笑咗……
我連吞一啖口水都覺得苦……呼吸亦都好唔暢順，個心好似戚戚然咁，好辛苦。
呢種痛…我第一次感受，但係痛到我唔想再試多次。
我笑，係因為我心入面好苦。
我唔明點解可以咁，對話內容嘅我哋，明明都仲係好開心，點解下一個回覆就變成咁？
我好想喊，好多嘢屈咗係個心入面。
但係我喊唔出…我無辦法令淚水流出嚟。
我知道好痛…卻流唔出半滴眼淚。
我已經完全無曬心機去考試，可能你會話咁on9架，考緊試嘅時候就唔好諗埋啲兒女私情啦。
係男人嘅就生生情情，考好啲佢，咪撚係度叫春。
呢個係我係連登開post得出嚟嘅結論……
係架…我真係咁on9，理性係同我講緊要我準備好心情去考試，考返好個成績俾Kitty睇，一齊入u。
但人係感性嘅動物，心情一低落真係做咩都提唔起勁，我就係一個咁嘅人，無動力就唔想做。
如果唔係我都唔會懶足咁多年啦係咪？
但我知道，我始終都要提起精神，但當下真係做唔到──我需要時間。
係中午嘅時候，去洗個面，刷個牙，飲罐咖啡提下神。
唔知係咪呢幾個鐘有諗通下，轉一轉個心態又好返啲。
當下真係好唔開心，但慢慢諗正面啲，啲動力就慢慢返緊嚟。
我都抖擻一下精神，好有衝勁咁出門口。
但去到考場，見到好多著便服嘅學生，嗰一股緊張感，又再返過嚟。
呢個緊張感持續到我考完oral。
我出到嚟，覺得自己不過不失咁啦，有嗲過幾句，但又無係咁搶嘢講，都覺得自己有講到重點。
一出到嚟，覺得自己考得唔差呀，心中有啲放鬆嘅感覺…同有啲開心。
呢一刻…我掛住Kitty，我想同佢分享此刻嘅感受。
我拎起手機check下佢last on係幾時，再考慮下搵唔搵佢好……
一打開Kitty嘅chat room，見到Kitty係度『輸入中…』！
然後Kitty忽然間停住咗，我諗一定係佢見到我上線中，所以嚇親佢啦。
我即刻熄whatsapp，等佢唔好咁緊張先！
然後我係度等，滿心歡喜地等Kitty諗住同我講咩。
我將手機收入褲裝入面，好瀟灑咁走係回家路上。
我心裡強忍住想拎手機出嚟衝動，然後一邊諗Kitty究竟諗住同我講咩。
我瞬間諗咗好多版本，但多數都係鳩的。
我一直期待手機嘅震動，點知久久都未見有。
心諗：係咪頭先震咗，行緊路嘅時候唔覺呢？
可惜……我拎部手機出嚟，發現係咩都無。
我打開whatsapp， Kitty早係嗰個時候off咗，姐係我白等。
Whatsapp女仔，係一場攻防線，互相猜測人哋諗咩，換言之，姐係捉心理。
由MSN年代，我哋已經做緊呢樣嘢，係status上面，估人哋諗緊咩。
呢一個動作，只不過延伸落嚟whatsapp姐。
以前有忙碌中，你會諗人哋忙緊呀之類…
依家whatsapp都相類似，但係打開嘅次數多咗。
自從嗰一次之後，我都有間唔中睇下Kitty whatsapp，但係都無理到我。
直至我考完成個DSE……
DSE好快就過，中間都無咩時間俾我諗起Kitty，無時間俾到係度叫春，因為自己嘅將來更加重要。
呢段期間，我有時間休息嘅話，會上網睇下啲故事，或者係港女語錄。
對於仲係愛情新手嘅我，覺得入面有啲嘢講得幾啱。
之前Kitty係我全世界，但依家...我會識得為自己諗，我會開始為自己打算。
DSE之後，我做咗好多日廢青，終日係屋企打機。
時間就好似靈藥咁，將我之前嘅心結解開咗。
係屋企度，我已經無好似之前咁辛苦，慢慢睇得開咗。
直到關晴叫我出去，我個心又再復活過嚟。
「喂！好耐無見呀！」考緊DSE嘅時候都無點樣同呀楊佢見面，關晴自然亦少咗。
但關晴卻好似一幅悶悶不樂咁。
唔通佢同呀楊鬧交？
我見關晴臉色唔對路，我都收起咗平時嬉皮笑臉嘅模樣。
「咩事呀？搵我出嚟？」我打探一下，唔敢細問。
我哋約出嚟食個lunch，諗唔到食咩就求其話食m記...
「我有啲嘢想同你講...」關晴嘅語氣好沈重。
「關於呀楊嘅？」我好小心咁講。
「唔係...係關於Kitty。」佢板起臉孔，好認真。
「咩.......咩事？」我有一種不祥嘅預感。
「Kitty佢要離開香港。」
「下！？」我聽到唔係覺得唔相信，而係咁突然？
我仲有好多嘢未同Kitty講，我仲想見到佢。
我個腦忽然間轉得好快，好多問題想問，好多嘢想講，但又唔知從何說起。
但我正係想眼前嘅人，係Kitty，唔係關晴。
「點解咁突然嘅？」我盡量撳住自己嘅情緒。
「Kitty同我講，佢一家要移民去外國，我有問佢去邊架，但佢無講道。」關晴鬆鬆膊頭。
「做咩事無啦啦要走嘅？Kitty成績又唔係唔好！」係咪Kitty入唔到大學先送佢走咋？
咁同啲女仔去外國留學有咩分別？分分鐘俾條洋腸晚晚吉鮑魚啦。
移民係仲嚴重啲，姐係唔知幾時返，有可能唔返添。但係留學起碼放假都會返嚟呀。
嗰種會令人窒息嘅感覺……又再返嚟啦。
「哩層我都唔知，淨係知佢屋企人要移民。」睇嚟關晴都所知不多。
但我好感激佢咩事都幫我嘅哩份心意。
「咁佢有無講幾時飛呀？」至少俾我送佢呀……
「8月XX號」
「都仲有兩個月嘅…」我細細聲道。
「其實，你係咪同Kitty發生咗啲咩事呀？」關晴問道。
我都知瞞唔過佢，因為佢係女人，直覺準呀嘛。
「你點知呀？」我好on9咁問。
「見到Kitty同我講要走，無同你講，都估到啲咁啦。」關晴呢次真係醒。
我唔知應該用咩心情去面對呢件事，只係覺得，點解自己咁不幸？
明明過埋DSE，我哋就應該順理成章咁係埋一齊。
關晴不停係度安慰，叫我唔好諗咁多啦，都係啲鬼唔知你呀嘛係女人嘅說話。
不過我都體諒佢，唔講呢啲可以講啲咩先得架？
我低頭望望枱上面嘅麥樂雞餐，心裡面諗起我哋有陣時補習完，都會偷偷地食個m記餐，食完先返屋企。
Kitty每次都話食少少咋，因為一陣返屋企要再食嘢。
次次都要我食埋佢啲手尾，我就覺得……好有拍拖嘅感覺。
我睇住呢個餐，我食唔落……
「要走點解唔自己同我講聲？」我帶住呢個疑惑走出m記。
關晴一直跟係我身邊，以佢性格，點會靜靜咁陪住我
佢一直係我身邊講嚟講去，仲話我無禮貌唔理佢，但我無心情同佢辯駁落去。
「俾我靜下啦好無？」我用哀求嘅眼神望住佢。
從關晴嘅臉上，我睇出有一絲絲嘅掛心。
「我知架啦，我唔會做傻事，更加唔會搵佢。」我保證。
「但要放低一個人，唔係一件容易嘅事……」
「我知，可以嘅話，我都想你哋可以修成正果，你哋其實幾夾架。」關晴拍一拍我膊頭。
我知佢已經幫咗我哋好多，我都好感激佢。
然後關晴就轉身走咗。
夾咁都又點？唔可以一齊又有鳩用咩？