溝女的聖地──補習社: 62

我為咗考呢個DSE，晚晚瞓唔夠5個鐘，每日都要飲咖啡提神。

我又唔似得啲有錢人，去starbucks飲咖啡，我淨係飲7仔買到嘅雀巢咖啡，仲要飲香滑。

有時同Kitty鬥操pass paper，佢話嬴咗嗰個請輸嘅飲嘢。

我知道Kitty心意，但邊有贏嘅請輸架？傻嘅都知啦下話？

但又唔係成日鬥嘅，但我都唔想Kitty請，但佢又唔俾喎，屋持要玩。咁我都無佢符啦，唯有順佢意啦。



所以間唔中Kitty都會請下我飲高級咖啡，你話啦，有咩可能唔愛佢呀？

言歸正傳，Kitty問我想讀咩。

「我想讀中文系呀。」我坦言。

「下？但係你修緊Bio喎，再加Econ喎。」Kitty有點愕然。

「修咩唔代表讀咩架，讀咩唔代表將來要做咩架，係咪？」頭一次覺得好醒，咁都駁到，同埋自己開始有啲黃子華feel啦。
 


「係叻喎，識串人啦喎。」Kitty嘅表情有啲邪惡，不懷好意。

我即刻扮死狗，「點會呀？我都唔識串人。」

「算你啦!!!」Kitty好快就會原諒人，好多次都係咁。佢好快就會無事。

「係呢，咁你點解想讀中文系嘅？」

「無呀...將來想寫故，寫我哋嘅故事。」我認真咁講。



「你估你自己那些年咩？」Kitty笑我。

「我又無諗住要出名，成名。」追名逐利從來都唔係我風格，「我只係想紀錄我哋兩個嘅事姐。

「咁你記得幫我寫到靚啲喎，性格又好咁樣，哈哈。」Kitty原來都識得FF。

「幾好呀，起碼你有目標。」打鬧過後，我哋亦沉澱好心情，「你之後寫嘅時候記得俾我睇喎!!!」

年輕，就係要用嚟討論未來。

「加油呀!!!我相信你得嘅，慢慢寫呀。」Kitty嘅鼓勵真係唔同好多。

「但係你寫故，唔一定要讀中文系姐？」

「咁中文系專業啲呀嘛。」Kitty都放棄追問落去。



「你要入呀，成績一定要好先得，所以努力讀書呀!!!」Kitty不厭其煩咁又再叮囑我溫書。
 
「我有努力架，我依家數學都好咗呀。」我希望Kitty可以見到我嘅努力。
 
係送Kitty返屋企嘅路上，我哋傾緊成績嘅問題。
 
「你唔好以為我唔知呀……你英文呀…你自己知自己事啦！」逃唔到Kitty嘅法眼。
 
你都見啦，study leave都可以打成study live，就知道有幾差啦。
 
「知啦！」有一個女仔著緊你嘅成績，其實係一件幸福嘅事。
 
「你剩底嘅時間已經唔多啦，你得返唔夠一個月嘅時間咋！」Kitty著急地說。
 


「知啦，我都有俾心機溫英文。」我嘅壓力，因此變得越嚟越大，我都好擔心自己嘅成績，但有啲嘢的確好難改變。
 
「你著緊啲得唔得呀！？」Kitty忽然間態度一百八十轉變，同以前溫和嘅佢好唔一樣。
 
我都係第一次見Kitty發咁大脾氣，以往佢都只係扭下計，笑笑口咁，我跟住就嚇親。
 
我腦海中閃過好多唔同嘅藉口，唯一目的，都係想逃避自己英文差嘅問題。
 
「我邊度有唔著緊呀？我每日都花好多時間溫英文架！」可能因為呢排壓力大，我都有少少煩躁。
 
「你再咁落去，你英文有無3都成問題呀！無3嘅話，就算你數學、其他科拎5**，都入唔到大學呀！」Kitty道出咗呢個現實。
 
香港就係一個咁On9嘅地方，一科唔掂，全部都唔掂，就算你其他點樣叻都好，都係無撚用。
 
係呢個咁荒謬嘅社會入面，我哋追求嘅係全方位精英，咩都要識不單止，仲要咩都叻，樣樣精通。


 
「唔一定要靠DSE入大學姐下話？大把人都係asso入大學啦！」我反駁佢。
 
Kitty無回應我，只係望實我，直勾勾咁望住我，想把我個心掏出嚟咁。
 
「隨便你啦……」Kitty失望嘅表情，真係好深刻。
 
我當然知道大件事啦，因為之前未曾發生過，我一時之間唔知點樣處理。
 
「唔係呀Kitty……」我開始識驚。
 
「我想靜下。」然後就無等到我，自己走咗去。
 
我只能夠呆係原地，唔識得點樣反應。
 


望住Kitty漸行漸遠嘅背影，心中有說不出嘅難過。我第一次遇到咁嘅情況，心裡面其實好驚慌，唔知點做好。
 
我係咪應該追上去同佢解釋？沙個冧咁，等我哋關係變返好啲？
 
我都好想追上去，但雙腳不由自主咁企係度，郁都唔郁。
 
有啲說話，講咗出口係返唔到轉頭；傷害咗人，個心係無咁易復原。
 
最後，我係無追到上去。
 
係我，任由呢件事情惡化。
 
我拖住頹廢嘅身軀返到屋企，壓力，唔開心，通通集於一身。
 
我第一次覺得好無助…唔知點算好，我想打電話俾呀楊或者關晴，問下佢哋應該點做。
 
但係我怕麻煩到人哋，更加唔知從何說起，只係逃避自己嘅問題。
 
『唔好嬲啦。』我sd咗呢句嘢Kitty已經成兩個鐘啦。
 
佢無覆到我，我可以做嘅，只有等…
 
我呢半年，為Kitty等咗好耐，依家都只有等。
 
了無限期地等……唔知等到何時何日。