溝女的聖地──補習社: 59
因為係人哋件衫上面簽名，係好敏感嘅事嚟，尤其是女仔，算係一種親密接觸架啦。
我要好集中，唔諗其他嘢嘅心態，去完成呢件艱巨嘅任務。
我慢慢咁係雪白嘅校服裙上面，一筆一筆咁寫低我秀麗嘅名。
「喂呀！你細力啲啦！」睇嚟係我頭先太大力咁用筆寫落去，整到Kitty道。
「呀…Sorry。」我用返細力啲去寫，但一細力我又寫得唔好喎，真係難搞啦。
「寫好未呀？寫好就帶你去一個地方。」Kitty係背後比咗個yeah。
咁我就快快手簽好個名，然後就俾Kitty帶走咗，離開咗呢個學校。
前前後後不過10分鐘到，就要走啦，不過都好嘅，唔洗對住班死八婆。
「我知你唔想對住佢哋架啦，咪同你出嚟囉。」Kitty十分體貼。
其實佢又點會唔知班八婆把口呀，睇佢入班房無咩聲氣就知啦。
「咁你想帶我去邊？」
我唯一覺得可惜嘅係無好好地參觀女校……
「你跟我嚟咪知囉！」Kitty爛身爛勢咁出去，大搖大擺咁行出校門，而我就驚俾人捉咁，偷偷摸摸。
一出到去，Kitty就大嗌：「好爽呀！」
「可以唔洗下下咁整齊出學校，好有大人嘅感覺！」Kitty舉高雙手，學啲青春電影嘅主角咁大叫。
咁的確呢刻係幾青春嘅。
踏出呢個校園，就係我哋長大嘅證明。由一個唔成熟嘅中學生，慢慢變得成熟，當中嘅起起伏伏都係成長嘅證明。
「好有自由嘅感覺！」Kitty感概地說。
「哈哈！聽日就到我要試下呢種感覺啦。」我笑言。
「你一定會，但我咁樣好似抵咗喎，咁樣我咪感受到兩次囉！哈哈！」Kitty笑到露出雪白嘅牙齒，但唔見咗隻眼。
我哋沿路上都嘻笑咁行，講下佢學校發生嘅趣事，講下啲搞笑嘢咁。
但唔經唔覺，Kitty帶咗我行上一條山路。
行咗一段路仔之後，旁邊有一個欄位，Kitty講，「到咗啦。」
我哋行埋去，望到Kitty間中學，同後面嘅市區。
呢個情境，令我諗起哆啦A夢入面嘅後山，可以見到大雄間學校。
「點解帶我嚟呢度嘅？」我好奇一問。
「因為……」Kitty頓一頓，然後望住前面，雙手合手，「我有啲咩唔開心，都會嚟呢度。」
「但我只會嚟一陣，就要返屋企啦。加上放咗學之後好快入黑，呢度係山入面，黑媽媽好恐怖。」
我比較好奇點解Kitty會唔開心，佢幾乎可以要乜有乜，就算佢無有錢嘅背景，有個靚樣，有塊閪俾人出出入入，前路都可以暢通無阻。
有樣已經俾人順利得多，呢個係毒撚深明嘅道理，唔係！係真理。
以Kitty嘅樣貌，釣到富二代，做少奶奶根本唔係問題，仲有咩好唔開心。
同Kitty相比，我反而無咩唔開心，hea得一日得一日，日日都開開心心咁過，打機，食頹飯，對我嚟講無咩好唔開心。
我始終都打唔開Kitty嘅心扉，無法進入佢嘅內心世界。
「你可唔可以同我講，你係因咩事唔開心？」呢啲內心說話，我怕我再唔講，就再無機會講。
「唉…」Kitty長長地嘆了一聲，「好多架，總之就一言難盡。」
「但我最主要嘅，就係唔想長大，我想一直留係中學…」
「我唔想出嚟面對咁多事，好煩，好怕。我第一次咁害怕未來。」
「細細個嘅時候，我好期待未來架，想做好多嘢，因為有好多嘢要大個咗先做得啦，但無人話俾我知，原來做呢啲嘢，係有後果，而且後果唔一定係好。」
「所以變相大個咗，有啲事情你明明係想做，想試，但一諗到個後果，你就會退縮。」
每次係呢啲時候，我都唔知點樣覆Kitty好，因為Kitty嘅成熟，我無辦法招架得住。
「你咁講，我又何嘗唔係呀？我比你更加唔想長大。」好認真，我都好認同架。
「做男人更加大壓力，咩都要靠自己，起碼你有個好嘅屋企，唔洗為三餐走嚟走去。」
「我好多嘢都要靠自己，我淨係要處理根本需求都成問題，衣食住行，樣樣都要諗，依家我係唔洗面對姐，但將來我點都要面對。」
我真係諗都唔敢諗，我將來可以點算。
考到大學又點？出到嚟做嘢有好好多咩？又未必見得，反而上到大學負擔更加大。
「所以我都想你讀好啲書。」Kitty語重深長咁講，呢一次係我哋第一次傾到咁深入嘅問題。
「呀水，我信你得架！」Kitty好肯定咁講。
「其實你唔係差架，你又唔係蠢，你肯努力嘅，其實好多事都會成功。」
無嘢俾Kitty嘅肯定更令我感到自豪，想要發奮。
一個毒撚，有人鼓勵佢，終有一日，佢唔會再係毒撚！
「但我讀書真係唔掂喎。」我真心地說，臨考DSE，自己有幾多斤兩，自己唔知咩？
「一個人成唔成功，唔係用佢讀書嘅成績嚟衡量；而係睇佢擁有幾多。」
Kitty嘅呢一番說話，令我暗暗係山腰度發誓，「我一定要發奮！」
就算最後不如理想，至少自己努力過。
更加唔想俾自己後悔，但同時間，唔知點解我覺得Kitty好似離我越嚟越遠咁……
一但愛情入面插入咗現實嘅元素，就好容易令一段關係越走越遠。
我送埋Kitty返屋企，然後返去嘅時候諗咗好多嘢，關於將來嘅事。
到咗我last day嗰日，啲同學好似癲曬咁，玩得就玩，喪得就喪。
我見住啲fd去捉住個男老師，corner鳩佢，笑到我同呀楊仆街。
個呀Sir仲要好唔忿氣咁四圍捉啲學生返嚟，諗住報復返，但最後都係徒勞無功。
我件純白嘅校服，寫滿咗密密麻麻嘅字，有啲唔係好熟嘅朋友，都走埋嚟問你要簽名，大家簽俾大家咁樣。
呢一日，真係好開心，好青春。
呀楊同關晴就拖住手，明目張膽咁係學校入面四圍走，睇嚟佢哋都預咗今日係拍拖架啦！
放學嘅時候，好多人都留係學校唔捨得走，係呢個時候，我收到Kitty嘅電話。
「喂！呀水，我到咗你學校啦。」Kitty把聲好興奮咁。
佢終於嚟到啦！琴晚已經諗咗好多將來嘅嘢，難得一起身可以忘記唔開心嘅事，再諗返起今日last day，就開心返曬。
聽Kitty把聲都一樣，嗰種成熟嘅面孔又俾佢收埋咗，又換返以前Kai Kai地嘅佢。
我用九秒九嘅速度跑落去，遠遠已經見到Kitty係門口等緊我。
今日嘅佢身穿便服，穿得十分之平民，唔同上次聖誕節嘅佢。聖誕節嗰日，一睇就知Kitty係悉心打扮過啦。
Kitty上身一份白色puma帽T，下身一條簡單嘅藍色牛仔褲，加對superstar。
真係銅鑼灣常見嘅打扮，但反而咁樣嘅Kitty，更加親民。如果我唔知Kitty係有錢女嘅話，我一睇就會覺得佢只係一個普通嘅靚女。
然而咁樣都無減低佢清純嘅氣質。