溝女的聖地──補習社: 58

我同Kitty係補習社影好多張相，都係搞怪嘅多啦，事關我哋都有共識，唔好影啲親密相，點都係有避忌咁。
 
除咗學校嘅座位，帶俾我最好回憶嘅就係補習社呢個位。
 
我尾隨著Kitty出補習社，到最後，Kitty好似放低咗心中不捨咁，係補習社門前開懷地笑。
 
反而我就好依依不捨。
 
「我哋仲有機會見架嘛，咁唔開心做咩姐？」Kitty一嘢就睇穿咗我。
 


「係就係姐，但呢度始終係我哋相識嘅地方。」望住Kitty，佢同啱啱相識嘅佢一樣，都無變過。
 
一樣咁靚，性格一樣咁善良。
 
我仲記得Kitty當初開門嘅一剎那，佢係我見過最靚嘅女仔，無之一。
 
「成個老餅咁！」Kitty取笑我，「好啦，我走啦，last day見啦。」
 
就係咁，我道別咗我同Kitty嘅補習社。
 


每一個開始，都有結束嘅一日。但我哋條路仲好長，我同Kitty嘅路，亦都兜咗好耐，先返嚟正軌。
 
到咗Kitty last day嗰日，我一放咗學，就直飛去Kitty間學校，我仲要係坐的士去。
 
因為同佢相處嘅時候真係太少啦，如果俾多啲錢，換嚟同Kitty相處嘅時光，我覺得係值得。
 
因為你將來有錢，都未必買得到。
 
到咗Kitty學校，見到門口嗰度已經有好多學生出緊嚟，佢哋比我哋早放學。
 


我撥個輪俾Kitty，聽到佢好開心嘅聲音，可見佢今日玩得好開心啦。
 
佢叫我等陣，依家落嚟搵我。
 
我懷著興奮嘅心情等緊佢落嚟，個腦入面不停地幻想呢一日點樣同佢過最後一日。
 
無幾耐，就見到Kitty衣衫不整咁行嚟學校門口。上衫嘅校服無攝到入面，飛曬出嚟；校呔亦唔似平時咁整齊；對襪鬆到跌落鞋度。
 
同平時整齊嘅佢，好不一樣。

「快啲過嚟啦！」Kitty向我招招手，待我似隻狗。

我跑過去，然後佢帶我上去佢哋班房。校門嘅校工早就見怪不怪，隻眼開隻眼閉咁。

我一上到去佢哋嗰層，真係「哇」一聲——全部都係女！



好多人都好似Kitty咁，衣服不整。

然後佢哋見到Kitty帶我行入人群度，個個都發出「WOW！」嘅聲音，表情極為驚訝。

『Kitty帶仔仔嚟呀！』
『女神有仔啦！』
『大新聞呀！』

各種不同嘅聲音由我耳邊走嚟走去，俾我嘅感覺就似......八婆。

三個女人一個墟，四個女人一堆僂。

「唔好玩啦！fd嚟咋。」Kitty紅都面曬咁解釋，但逃唔過佢哋嘅法眼。



「你塊面好紅喎！真係fd咁簡單？」啲女仔係度問長問短咁。

「走啦！」Kitty最後頂唔住佢哋嘅攻勢，拉住我隻手走咗入去。

佢帶我到佢班房面前，然後入去。

佢哋班房嘅格局同我哋學校唔一樣，佢哋係一個一個咁坐，真係單行咁；但我哋就係要同人坐。

我係無朋友同我坐先自己坐最後......

佢嚟到班房右上角嘅單丁位，就係我係學校坐嘅位。

估唔到唔同校，唔同班，坐嘅位都一樣！

唔通呢種就係上天賜嘅緣份？



毒撚最可怕嘅係，小小事情可以FF到無限大。而我真係覺得同Kitty好有緣份，咁巧合都有嘅。

我可以想像到，我哋一齊返學，一齊坐係班房嘅角落，好是浪漫......

我望到班房門口有好多人望住我，而班入面都有好多對望，嗰一種唔自然係會令你覺得毛骨悚然。
 
「唔好理班人啦，佢哋不嬲都係咁嘅，小小事就大驚小怪。」Kitty雖然係責罵緊佢哋，但嘴角牽起上嚟。
 
我知道，佢都好珍惜呢一班朋友仔。
 
「嗱！」Kitty隊支筆俾我。
 
「做咩呀？」我明知故問。
 


Kitty笑了笑，拎起下方嘅衫角，搧兩搧。意思再明顯不過，就係叫我簽名。
 
我都有默契地點點頭。到咗依家，我哋有好多嘢都唔洗講出口，一個眼神就可能明對方想做乜。
 
我打開支筆，我發現我嘅惡夢又返嚟啦。
 
『有無人覺得嗰條仔好熟口面呀？』
『係咪上次生日會嗰件？』
『係呀係呀！』
『乜原來係佢呀？』
『你唔講，我真係唔認得呀！』
『係比之前型仔咗嘅，但都係好毒呀…』
『估唔到到依家都有聯絡呀，仲以為收咗皮添，無曬聲氣。』
 
班八婆又係拎返上次啲嘢嚟講。
 
無錯！就係嗰班生日會嘅八婆們！我都唔記得咗會返嚟撞到佢哋添。
 
不過就唔係頭先撞到嗰啲，而係自己班入面嘅。
 
半年無見，都係咁撚八婆！狗改不了吃屎。
 
我強忍心中嘅怒氣，因為Kitty係度等緊我幫佢簽名。
 
佢拎轉咗個身，俾個背脊我簽。我舉起自己抖震到不行嘅手，我要用左手㩒住右手，先算穩到。