溝女的聖地──補習社: 57

中六最期待嘅，就係last  day，grad trip同埋grad din。
 
當然我都想Kitty可以同我參與呢幾個活動，只要有佢陪住就好……
 
就算唔可以三個都出席，可以有其中一個，我都心滿意足。
 
「但係你last day又唔係我last day。」好現實，我哋讀緊嘅學校都唔一樣。
 
「乜你咁架！」Kitty不滿地道，「咁你放學可以過嚟陪我架嘛！」
 


佢又講得幾有道理喎……
 
我即刻開心起上嚟，係喎！咁樣順便佢參觀佢間學校都得喎，點解我之前諗唔到嘅呢？
 
「哈哈哈！」我開心到笑咗出嚟，「得呀！梗係得閒啦！」
 
「得就好啦！」Kitty都笑住咁講。
 
當有啲事情結束嘅時候，可以令你嘅關係有新嘅開始。
 


「係呢，咁你last day係幾時呀？」Kitty問我。
 
其實last day嘅時間大家都係差唔多，都係嗰段時間，我拎出手機，搵下我哋學校嘅校歷，發現我哋last day係下禮拜五，姐係Kitty後一日。
 
「我哋係下個禮拜五，姐係遲你哋一日。」我睇住部手機，講咗出嚟。
 
依家好多事情都係最後一日，補習社最後一日，中學時間嘅最後一日……
 
忽然間覺得好不捨，好多回憶因此要停住，要結束。
 


今日我哋兩個都無心情聽書，我哋都有共識地諗住開開心心咁過埋補習社嘅最後一日。
 
「好嘢！咁我嗰日可唔可以去你間學校參觀下呀！？」佢興奮地說。
 
「梗係得啦，我哋放咗學嗰段時間你咪可以嚟囉！哈哈。」
 
有啲日子，你好期待，但同時你又唔想佢嚟，好矛盾。期待last day大家可以留個美好回憶，可以好開心，但同時間，當呢一日結束嘅時候，就少咗好多一齊嘅機會。
 
我哋約定好之後，就係度有講有笑，當然係細細聲啦，畢竟仲有人要上堂架啦。
 
但無人阻止到我哋快樂嘅時光。

我哋係補習社放咗學之後，無咁快離開，反而留低係度，懷念一下。
 
呢半年嘅時間，我哋一如既往咁坐係一開始見面嘅地方。


 
仲記得當日懵懂嘅我，見到Kitty呢個貌美如花嘅女仔，係幾咁怕醜，幾咁失禮。
 
當日坐我隔離嘅狗公，已經消失無蹤……
 
到咗依家，我都係仍舊識得怕醜嘅男仔。
 
「呢間補習社俾我嘅回憶真係多…」Kitty抬高頭，望住天花板。
 
我無出聲，只係沉醉係回憶當中，回憶就好似一道菜咁，間唔中煮返出嚟食，又別有一番風味。
 
「係呀。」良久我先回應返佢。
 
Kitty笑了笑，無出聲。呢種感覺好美好，大家唔講嘢，但卻唔覺得尷尬，反倒感到輕鬆愉快。
 


唔知點解，我想捉住Kitty嘅手，因為依家大家嘅心意，係相連。
 
我輕輕觸碰Kitty嘅小手，佢無反抗到，反而好似知我想做咩咁，順勢捉住咗我隻手。
 
成個動作一氣呵成，好自然。
 
我哋不約而同地望住大家，相視而笑。
 
係枱底下嘅雙手，十指緊扣著。
 
我哋無表白，無話正式一齊，無紀念日，唔知算唔算係情侶。
 
但可以有咁美好嘅回憶，留係自己嘅青春入面，我頓時覺得無咩所謂。
 
我慢慢大個，回頭望返，先覺得呢刻嘅光陰，真係千金難買。


 
有好多情侶有男女朋友之名，卻無男女朋友之實，只係掛住情侶個名，但感情上，存在著無數嘅空洞。
 
我寧願無情侶嘅身份，但彼此嘅感覺係靠近嘅。