溝女的聖地──補習社: 56

「我知係快得制，但其實我覺得感情唔一定要到好熟先一齊。」關晴佢以成熟嘅口吻同我講。
 
「吓？」對愛情只有一知半解嘅我，真係唔明呢種大道理。
 
我一啲經驗都無，我只係道聽塗說，始終認為，起碼要識好耐先一齊，咁樣先會拍得長久。
 
對於MK仔嗰種即食文化，同埋狗公嘅漁翁散網，我真係唔識欣賞。
 
「我只係覺得……只樣無咁好姐。」我將自己嘅內心想法講出嚟。
 


「如果有感覺嘅時候，諗住等耐啲時候，就錯過咗出手嘅機會啦。」關晴好認真咁同我講。
 
「好啦，我哋嗌野食先啦。」呀楊見勢頭唔對路，驚關晴好似今朝咁，越講令我越傷心。
 
關晴都識做，但佢係我哋嗌完餐之後，繼續同我講。
 
其實我知……我知關晴佢係一番苦心。
 
「呀水，本來感情行唔行得遠，根本就無人知。」關晴係我面前拖住呀楊隻手。
 


「係睇大家有無呢個心想行落去，一齊得快唔快，根本唔係重點。」
 
「如果確定咗大家都有呢個心，咁早啲一齊行落去，唔係好事嚟嘅咩？」關晴講得一臉淡然，果然佢嘅經驗真係豐富。
 
我無言以對，只能沉默地繼續聽佢講。
 
「相識得耐，的確係可以睇清楚一個人，打好感情基礎。 相識得耐，就會少咗想一齊嘅衝動，反而多咗猶豫嘅思考。」
 
「係咪有咁多嘅時間去等一個人？你估世間上嘅傻仔好多咩？」
 


係關晴身嘅呀楊都不發一言，因為係關晴面前，我哋更顯得幼稚。

我好想搵啲去反駁佢，我同Kitty嘅關係，唔係佢所講咁樣，更加想證明，我唔係佢口中嘅傻仔。
 
我真係心甘情願去等Kitty，但無得我唔認同關晴所講嘅嘢。
 
「係呀…呀水，有機會就博盡佢，追啦！」呀楊難得唔派膠，講啲正能量嘅嘢俾我。
 
我知道，佢哋兩個都好關心，我打從心底裡感激佢哋。
 
係我迷茫唔知點做嘅時候，我有佢哋做我嘅依靠，我覺得已經好足夠。
 
「好多謝你哋！」係食完餐飯，我哋返去嘅路上，我同前面嗰兩個放閃嘅情侶講。
 
佢哋愕然咁望住我，「做咩無啦啦講多謝呀？」佢哋都笑笑口咁，我知佢哋心入面笑緊我傻仔呀嘛！


 
「無呀…只係覺得…有你哋真好。」我都笑到好似個傻仔咁。
 
係佢哋身上，我真正感受到，咩叫青春。
 
唔算話好青春嘅，當然比唔上嘅熱血人士啦。我呢幾年，渾渾噩噩咁過，依家先感受到青春嘅溫暖。
 
青春係一種好美妙嘅嘢，當下感受到會覺得好開心，但長大後，反添一種悲涼。
 
「你都on99嘅！毒撚學咩人咁感性呀？」呀楊恢復返佢既有嘅本性。
 
「核突！」關晴都癲埋一份，「唔好理佢姐！我哋快啲走！」
 
然後佢哋真係跑走咗，真係屌佢老味呀……
 


仲要拖住手咁走，我都想可以同Kitty咁樣……
 
望住兩個小情侶嘅背影，我衷心咁祝福佢哋，希望佢哋可以幸福落去。
 
我都覺得自己好傻，我竟然會諗，即使自己得唔到幸福，亦都希望人哋可以幸福。
 
佢哋嘅背影漸漸遠去，兩小無猜咁，真係幸福。

係中學最後嘅歲月，我哋每日都係度打打鬧鬧，係補習社嘅日子，所剩無幾。
 
時間，除咗一路向前進之外，每日都係度倒數。
 
唔好將時間向前睇。假設一個人有八十歲命，你先前行大約四分之一嘅路，唔好諗你仲有四分三嘅路要行，因為咁樣會令你有種…仲有好多時間嘅錯覺。
 
就正如你中一嘅時候，會覺得中六畢業好遙遠。點知一眨下間就殺到埋身，你問我中一做過啲咩，我真係唔係好記得。


 
但你將時間用倒數嚟睇，你嘅人生只係剩下四分之三，已經行咗四分之一。
 
心態已經唔同咗，感覺時間已經唔夠用。
 
中六嘅我覺得，時間少得可憐，唔夠幾個月就要衝刺啦，我連自己可唔可以同Kitty升上大學都成問題。
 
我自己成績先啱啱起步，但人哋已經差唔多到終點啦！我要點追呀？
 
不過好彩有朋友，有Kitty陪住我。
 
放完假之後嘅嗰一次補習，已經係我哋嘅最後一堂。
 
呀 Sir將教嘅嘢由頭複習一次，之後呢堂補習就正式劃上句號。
 


「呀水，呢堂補習…要完啦喎。」仍舊坐係我旁邊嘅Kitty試採地問我。
 
「係呀…我知呀。」上次同你係屋企離別完，再見面嘅時候，又係離別。一早已經掩蓋咗重逢嘅喜悅啦！
 
「咁…你下個禮拜四放學得唔得閒呀？」Kitty一臉笑容咁問我。
 
其實我更加想問佢屋企嗰邊點，因為我完全唔知佢哋嗰度發生咗咩事，所以我好擔心。
 
「嗯…？做咩事呀？」我心不在焉地問佢，心裡面盤算緊點樣開口問Kitty。
 
「無呀…嗰日係我last day……」