溝女的聖地──補習社: 55

我望住空空蕩蕩嘅屋企，第一次係屋企覺得寂寞。

不過依家好似有Kitty陪伴咁，我就覺得好足夠。

呢一個聖誕節連假，我同Kitty嘅感情好似大進一步咁。

嗰晚我問Kitty返到去點樣，佢無答我，佢話唔想俾我知，跟住我都無再問。

但我知，佢應該唔好受......



放完假返學校，一返到去，就見到呀楊同埋關晴係度有傾有笑咁。

而我亦春風滿面咁行埋去。

「呀水！見你笑到成隻狗咁，姐係得米啦？」呀楊一嚟劈頭就問。

「你含撚啦你。」我放低個書包，醒起同呀楊含撚嘅約定。

「做咩姐，一返嚟就叫我含撚。」好明顯佢係唔記得咗成件事。



「你唔記得咗你話唔得嘅話，就要幫我含撚咩？」我提醒佢。

「屌，講下笑姐，咁認真做咩？」又走數...你老母。

「快！講下你哋聖誕節點啦。」關晴都想關心下佢朋友。

「吓？佢無同你講咩？」我猜測佢哋關係咁好，仲會同佢講咗添。

「無呀，我哋聖誕節都係講咗句聖誕快樂，講咗幾句就無啦。」關晴解釋。



我將呢幾日嘅事同曬佢哋講之後，佢哋反應都幾大下。

「哇！」兩個都係呢個反應。

「你哋依家都似拍緊拖啦！」關晴講完就到呀楊講啦，「頂！姐係我準備嘅嘢用唔到？」

「你準備咗啲咩呀？」關晴好奇地問。

「無呀，無呀！」呀楊佢耍手擰頭。

「佢準備咗個dom俾我。」我幫呀楊講。

只見呀楊用兇猛嘅眼光瞪住我。

「吓！你幫呀水準備condom～～～～？」關晴一手擰呀楊嘅耳仔。



「啊！！！！！！」之後淨係聽到呀楊嘅慘叫。

我感覺到佢哋兩個嘅氣氛，有點微妙......

我講唔出有啲咩嘢，但係我覺得佢哋好似比起以前熟咗咁。
 
「你哋依家都只不過係有名無份咋喎。」關晴唔知係以女性嘅角度講，定係以Kitty朋友身份講。
 
佢仲提醒我，「好心你呀！係畢業之前就溝到人啦！」
 
唉…我又何嘗唔想呀？呢個假期，我已經係咁諗呢個問題。
 
「但係Kitty叫我等佢呀嘛……」我都唔想講呢個事實出嚟。
 


「人哋想收你做兵咋！傻仔！」呀楊第一個反應就係呢個說話。
 
但佢講出嚟，我無從反駁。
 
「收聲啦你！Kitty都唔係啲咁嘅人。」關晴幫Kitty出聲。
 
「好啦。」呀楊見到關晴咁講，都識做咁收聲。
 
頭先關晴又真係幾恐怖嘅，事關我都係第一次見關晴發火。我不嬲都相信Kitty係好女仔嚟，因為我覺得反應係呃唔到人。
 
「Kitty屋企不嬲都好嚴，何況佢到依家都無拍拖，如果佢要收兵，都唔會收你啦！」
 
『都唔會收你啦！』呢句說話好似針咁，直插入我心。
 
我無出聲，我明…我心情一下子跌到落谷底。


 
Kitty……
 
我好掛住你……
 
我無理到佢哋，扒係張枱度，自己係度靜思緊。
 
佢哋都知我心情唔好，自己走咗去，呀楊不忘責備關晴，話佢講嘅太高份。關晴都有同我講Sorry，但我無怪到佢。
 
中學嘅時候，總會有一兩次因為想念鐘意嘅人，而扒係張枱度。

我一扒，就扒到中午放飯。
 
關晴同呀楊都叫我一齊食，我諗…唔同佢哋食，我都唔知可以同邊食啦。
 


Kitty返緊學又唔會覆我whatsapp，搞到我成日孤伶伶一個。越係孤單，想念Kitty嘅份量就越重。
 
一出學校門無耐，行係我前面嘅呀楊同關晴，係我面前拖起手上嚟！
 
我當堂呆咗，仲唔信自己隻眼，係咁揉係咁揉。
 
「你哋兩個幾時一齊架？」我指隻佢哋十指雙扣嘅手。
 
佢哋一齊舉高隻手，「一陣咪話你知。」
 
佢哋兩個嘅同步令我聯想起洛克人，同步插入。
 
我哋搵咗間唔算多人嘅茶餐廳坐低，一入嚟茶餐廳，就諗起第一次同Kitty嚟食茶記。
 
原來身邊好多事情，都可以同Kitty連接，無形間，佢變得如此重要。
 
「好啦，你哋可以講啦。」我一臉認真。
 
「哈哈哈！」佢哋俾我呢種認真嘅樣整到笑咗出嚟。
 
「放鬆啲先。」佢哋嘅嘴角仲笑緊，「我哋係聖誕節約出嘅時候一齊嘅，只係咁啱嗰個時候，有feel。」
 
呀楊幫關晴開口。
 
「吓？但係關晴唔係有仔嘅咩？」有無咁快呀？
 
「分咗手啦，係聖誕節之前。」關晴自己講，始終呢啲事由佢自己嚟講係好啲嘅。
 
「下？分咗手無耐就一齊？」我一時之間接受唔到。
 
太突然啦掛？太快啦掛？起碼曖昧下，耐啲先一齊呀？
 
咁快就一齊，俾我嘅感覺似係……水泡。