溝女的聖地──補習社: 54

我出返去，俾咗間房Kitty之後，就係廳度等佢出嚟。
 
無所事事嘅我，咪禁下手機囉，眨下眼之後，Kitty就著返琴日個look出嚟。
 
同琴日嘅感覺一樣，一樣咁靚，只不過臉上多咗條淚痕。
 
「我走啦。」Kitty依依不捨咁講。
 
「等我一陣，我都著返啲衫，然後送你呀。」
 


隨後我就入間，慢慢慢慢咁著返啲衫，我係自私，但至少呢種自私佢睇唔到，正常人點會特登留意呢啲位。
 
如果我可以再自私啲嘅話，我諗我可能已經同咗Kitty一齊。
 
呢一種自私，已經係我最大嘅極限。如果Kitty想要任何嘢，我會盡全力去俾佢，即使有可能做唔到。
 
我換完衫出去嘅時候，Kitty臉上就好似啱啱表演完魔術咁，旋即掛起笑容，兩條淚痕好似俾風吹走埋。
 
我嚴重懷疑Kitty頭先係咪去咗廁所洗面。
 


「換乜鬼嘢換咁耐呀？」Kitty一臉唔耐煩，但聽佢語氣，我知佢唔係真心嫌棄我，只係逗我玩姐。
 
「係入面打埋飛機呀嘛！」我無嚟正經。
 
「咦！」佢表情話俾我知，『核突』，「快啲啦，我要出門口啦。」
 
呢句說話，好似老婆同老公講咁，我嘴角嘅笑容就嚟收唔住啦。
 
我送Kitty到樓下，帶佢係呢個錯縱複雜嘅屋村迷宮入面行嚟行去。
 


「你諗住搭咩呀？」我問佢，事關你要搭咩，直接影響我哋行咩路。
 
「的士啦緊係。」Kitty理所當然咁講。
 
我心中不禁『哇』咗一聲，有錢就係任性，我終於明白呢句係點解啦。
 
「你真係有錢…」
 
「趕時間呀嘛，加上我又唔熟呢度，我都唔知點去。」Kitty解釋。

我即刻毛遂自薦，「不如我送埋你去呀？咁樣你咪唔洗搭的士囉？」
 
我無非……都係想見多你一陣姐。
 
「唔洗啦，我自己搭的士得啦，加上我依家我趕時間呀嘛。」Kitty臉上雖然係笑緊，但都透露出不捨嘅感覺。


 
因為佢，我亦識得捕捉一啲好細微嘅位，應該係話，我高度集中咁注意Kitty。
 
「咁…我帶你去的士站啦。」
 
沿路上，我都感受到其他男性唔友善嘅目光，佢哋先係望住Kitty，然後打量一下我。
 
「癩蛤蟆想食天鵝肉」最啱用嚟形容我。
 
我帶到Kitty去的士站，亦幫佢截到架的士。
 
「多謝你。」Kitty係咁眨眼，眼裡流露著戀戀不捨嘅情感。
 
「多咩謝呀！你由琴晚講到依家啦。」我無咁好氣地笑咗出嚟。
 


但其實我個心比佢更加不捨，我想捉住佢隻手唔放，可惜我無咁嘅勇氣。
 
「你自己小心啲呀……」我提醒佢。
 
「知啦。」
 
唔知點解，呢次嘅離別好沉重。
 
唔知大家有無試過，明明會再見，又或者之前都成日見，但當嗰一日發生咗好多事，要離別嘅時候，你就好唔想呢啲事情就咁結束。
 
我明明同Kitty之後都會再見，仲會有機會上補習社，但此刻個心好誠實咁同我講，唔想佢走。
 
人嘅情感係會互相感染，當一個感到傷心嘅，第二個可能會跟住sad，然後loop落去。
 
我哋依家都係一樣，都一樣好唔捨得。


 
直至個司機大哥響安，「快手啲啦！搞咁耐架！」

Kitty聽到司機大哥催促佢，然後佢望一望我，諗住上車關門。
 
我當下覺得，今次點都要我做主動啦！
 
我顧唔上咩面子，咩形象，唔俾自己諗咁多，做咗先算。
 
我捉住Kitty隻手，跟手快速係佢面上留下一個吻。
 
我就自己彈開咗，順手幫佢關門。
 
只見Kitty係的士入面對住我笑，滿足地笑。佢笑到雙眼連成一線，露出雪白亮麗嘅牙齒。
 


我都笑埋一份。至少係最後，我哋都係笑住咁道別。
 
我望住的士緩緩咁開走……伴隨住Kitty嘅遠去，我心中嘅落莫一點一點地長大。
 
係遠處嘅轉彎位度，架的士一個掟彎，就消失咗。
 
我行返屋企嘅每一步，都覺得寂寞，我沿住頭先同Kitty行過嚟嘅返去，彷彿見到頭先嘅影像咁。
 
一返到屋企，咩人都無。
 
平時呢啲時候，我會好開心咁yeah出嚟，鐘意打機就打機，鐘意睇片就睇片，鐘意打飛機就開AV。
 
但屋企好似無咁樣嘢咁…與其話屋企少咁樣嘢，不如話係我靈魂少咁樣嘢啦。
 
係我心情低落嘅時候，我收到一個whatsapp。
 
係Kitty傳過嚟──一個表情符號。
 
一個心心錫錫嘅表情符號。
 
雖然只係一個emoji，但我知包含嘅嘢其好多。
 
我已經相信Kitty係我女朋友，只不過我哋大家都無表到明。
 
但行為上，我哋已經有女朋友之實。
 
「Yes！！！！！！！！」我係屋企度大嗌出嚟。