溝女的聖地──補習社: 33

我諗唔透。

「點解會諗住嚟補習社搵？」天色已黑，海風嘯嘯，我哋都開始覺得凍，但都無意欲想走。

「讀得女校嘅，識嘅男仔真係好少，唯一會接觸到男仔嘅方法，就係一年一次同男校嘅聖誕聯歡晚會。」

「雖然我係眾男嘅目標...但一個都唔係我要嘅目標。」Kitty感概地望住個海洋...

「咁多個男仔都無一個啱？」我好奇。



「我淨係參加過一次，但俾我嘅感覺都係不懷好意。」

其實對住你，好難唔不懷好意喎。

「咁你覺得我......？」我小心翼翼問，我都驚自己會變得狗公...

「哈哈！你呀？」Kitty忽然間大笑起上嚟。

「我真係覺得你好毒架，哈哈哈！」佢望住我大笑，從未間斷。



我心裏一沉，但我無從反駁...因為佢真係講出咗個事實。

「我自己都知架啦......」無一個男仔聽到女仔話佢毒，會覺得開心。

「但係...哈哈，我覺得你有股熟悉感架。」Kitty收起笑容，換轉咗認嘅語氣。

「唔知你覺唔覺啦，有啲人你一識落，就會有種感覺，好有親切感，好容易將自己嘅生活同佢融入。有啲人係你覺得無論點做，都係無法靠近，到最後只會覺得唔適合。」

佢講嘅嘢我係有啲共鳴嘅，但可能我識嘅人唔多，呢種感覺無咁強烈啦。



「讀男校或者女校嘅人感覺強烈啲嘅，因為無其他異性，只有同性做朋友，是非多...就會敏銳啲，我諗。」

「果然！我嘅感覺係無錯到，嘻嘻！」Kitty笑口口咁望住我，雙眼已經無咁通紅，可能夜咗同燈光問題，唔覺得佢頭先有喊過咁...
 
「無錯到係咩意思呀...？」我唔係幾明，係咪有另一種意思...？

「嘻嘻！唔話你知！」Kitty用力咁撐起自己，企咗起身，然後吐一吐舌頭，好可愛咁嘅樣，同時又有啲嬲打...嬲屌feel咁。

「等你心思思！哈哈！」然後佢拍一拍手上面嘅沙塵，「走啦，去食飯啦，我肚餓啦。」

有陣時真係唔鐘意啲女講啲唔講啲咁，我想知呀.......

我哋去洗一洗個手，就出返去搵野食。

行返去碼頭嗰邊睇下有咩嘢食先啦我諗住，沿路上我同Kitty都行得好埋。



我哋都垂低咗雙手，我感覺到Kitty有意無意咁碰到我隻手。

佢隻手雖然只係碰到少少，但我都覺得佢隻手好嫩，好滑，好似碰一碰就滑咗出去咁。

同埋啱啱洗完手，佢隻手好冰冷。

我唔知Kitty係有心定無意，碰到我隻手嘅次數係有啲密。

但我真係好淆底，你想問我淆咩呢？

好老實講，啱啱先同我講，叫我等佢，如果依家拖咗佢，係我會錯意咁點算？

同時間，我真係想唔顧慮咁多嘢，拖咗再算。



十五十六咁，點算好？
 
正當我諗緊十五定十六好嘅時候，Kitty佢捉住咗我隻手............
























指。

Kitty捉住我隻食指，唔係捉曬成隻嘅，係捉住咗指甲嗰個位，輕輕咁捉住咗。

氣氛有啲甜，連呼吸都覺得甜，係會感覺到心嘅跳動，但身體好似僵直咗，反應唔嚟。



我見到Kitty係低頭望住地下，扁住嘴，好用力咁合埋，個樣含羞澀澀。

心入面嗰種震奮真係難以形容，比中六合彩更加開心！儘管只係捉住手指頭...

我哋行到碼頭嗰邊，短短五分鐘嘅路程，卻令我回味無窮。將來諗返起，心中都會泛起一點甜，我都會笑，笑得好甜添。

「食.........喵！」屌，我緊張到咬親到自己條唎。

「你無事呀嘛？」Kitty即刻鬆開我隻手...指！

屌！真係柒咗，仲要鬆開咗隻手，唉......

頭先諗住型型地咁問，繼續俾佢拖架嘛，早知唔問啦頂！

條唎好撚痛...