溝女的聖地──補習社: 34

「我無事…」我細細力咁咬一咬條唎，又痛又柒，真係百感交雜啦。
 
「真係？伸條唎出嚟睇下。」Kitty一臉認真，我有啲驚親。
 
「吓？唔係好痛姐。」我除咗怕醜之外，仲感到老尷。
 
「叫你伸就伸啦！咁多嘢講。」Kitty唔耐煩。
 
我只好乖乖地伸出自己條唎出嚟，俾Kitty睇下。
 


其實點解會尷尬呀？因為Kitty企得好近！只好我捱前少少，就會錫到佢額頭。
 
「咬親邊度呀？」Kitty問我。
 
「呢度。」我指一指俾佢睇。
 
然後……
 
Kitty輕輕錫咗我條唎一啖。
Kitty輕輕錫咗我條唎一啖。


Kitty輕輕錫咗我條唎一啖。
Kitty輕輕錫咗我條唎一啖。
Kitty輕輕錫咗我條唎一啖。
Kitty輕輕錫咗我條唎一啖。
Kitty輕輕錫咗我條唎一啖。
 
呢個吻，就好似蜻蜓點水般，好快就消息無蹤。我未嚟得切感覺呢個吻，應該係話未嚟得切反應佢錫咗我，就已經走咗去。
 
「依家仲痛唔痛呀？」Kitty柔聲問。



唔知係我心理作用，定係Kitty喺我條唎上面施展咗魔法一樣，真係覺得條唎唔痛啦喎。
 
「唔痛啦，真係！」我開心到笑起上嚟。
 
即使依家周圍都好黑，只有街邊黃色嘅燈光，但我都見到Kitty臉上紅紅地。
 
今次Kitty無怕怕地醜咁別過面去，反而直視住我，問道：「梗係啦！我用咗魔法架嘛！」
 
「最好係！你係用咗魔法呀，自己就唔會肚餓啦！」我反駁佢。
 
「魔法師唔洗食飯？」Kitty又嚟一句收我皮。
 
「咁魔法師依家想食咩呀？」我輕挑地道；依家嘅輕挑可能係我太開心所致，我諗，就算Kitty唔係我女朋友又有咩所謂呀？頭先發生嘅事，對我嚟講，已經好滿足。
 
「我都唔知喎，你諗啦。」Kitty交返個波俾我。


 
「咁……不如食大排擋？」我提議，我記得前面係有大排擋係度。
 
「好好好好呀！」Kitty雙眼好似充咗電咁，不停咁眨嚟眨去。
 
「我都未食過呀！自從上次食完茶餐廳，我都係食咗幾次茶記咋！」Kitty好興奮，睇嚟佢今日都好開心呀。
 
「咁行啦，都無其他嘢俾你揀啦。」

通常啲無咩錢嘅人都往錢看，有錢嘅點會介意嗰小小錢？
 
可以搵到個女仔，肯願意陪你聖誕節食大排擋，係一種幸福。
 
仲要嗰個女仔係有錢人家。
 


我帶住Kitty去我哋窮人平時嘅集中地，雖然話無咩人嚟長洲，但呢個鐘數要搵兩個位，都唔係咁易。
 
好唔容易先搵到兩個位，一坐低，伙記求其幫我哋斟咗隻水，就走咗去，招呼都無打。但就去其他枱招呼人，完全無視我面前嘅大美人。
 
因為個伙記係個老女人。
 
「無餐牌嘅咩？」Kitty無知地問。
 
「上面嗰度咪寫咗囉，呢度無餐牌架。」我細細聲咁講。
 
「哦～」Kitty就好專心咁睇牆上面嘅菜單。
 
「咩係避風塘炒蟹？」Kitty依舊望住個菜單，但就照樣問我。
 
頂，我都唔知點解釋先好喎，我就是但解釋俾佢聽，「姐係炒蟹囉，避風塘只係佢個名姐…」


 
「咁試下啦！佢個名好似幾得意咁。」Kitty微笑咁望住我，我明…姐係叫我嗌姐……
 
「你食咁少咋？你可以嗌多啲喎。」我視線唔覺意咁掃到佢個嘴唇，就諗嚟起啱先嗰一幕。
 
真係想像唔到Kitty用咁迷人嘅雙唇去錫我呢條熱氣嘅唎，忽然覺得自己好似整污糟咗Kitty咁。