溝女的聖地──補習社: 31

我懷著開心嘅心情，去拆開份禮物，究竟Kitty會送咩俾我呢？

一條手工粗糙嘅頸巾。

「好無睇呀？」Kitty雙眼閃爍著興奮同期待嘅目光。

一條長灰色嘅頸巾，有別於門市賣嘅頸巾。因為你有幾多錢都買唔到......

中學嘅時候，當你收到自己鍾意嘅女仔為你打造嘅頸巾，係一個榮譽嘅象徵。



不知有幾多男仔嘅聖誕願望，就係收到一條咁樣嘅頸巾，但呢一樣嘢唔係你有錢就可以買到。

你有錢，都未必買到心儀嘅女仔為你親手織一條頸巾。

「好睇呀......」我窩心地講。

我一諗起Kitty花時間為我織頸巾，我就覺得好感動...差啲就留下了男兒淚。

「咁就好啦，我織咗好耐先織好架!你都唔知呀...我又唔可以係屋企織，屋企人唔俾我織架...話無聊曬時間呀!!!我自己係學校織俾你架。」



就算Kitty唔講，我都知道佢好辛苦先織到一條，特別好似佢呢啲十指不沾陽春水嘅大小姐。

見佢肯為我付出咁多，你話唔感動就假啦。

「多謝你。」我只能夠講出呢句說話嚟表達我對佢嘅感激。

Kitty無講啲咩，只係喺度笑。

隔咗幾秒，「嚟啦，我幫你帶啦!」Kitty攞起我手上面嘅頸巾，自徑兒幫我戴起嚟。



Kitty笨拙地幫我圍，「嗯，幾好!!」

「其實我織完之後，已經覺得唔靚...我好怕你會嫌棄佢...」

Kitty幾經辛苦先講出嚟，我知佢不嬲都對自己要求都好高，無論平時上堂又或者自己操數。
 
佢唔完成到自己嘅目標，係唔會走，有好幾次佢諗唔到點做，死磨爛磨到人哋叫佢走，佢先走。
 
我問洗唔洗幫佢，佢話唔洗，要自己搞掂。
 
可見佢今次都係無叫人幫手啦，咩都自己嚟……
 
心底裡泛起想保護佢嘅慾望，唔想見到佢一個人咁辛苦，即使自己幫唔到咩忙，但我都想盡自己所能去保護佢。
 
「傻啦，我點會嫌棄佢？」我笑住同Kitty講，同時間摸摸頸上面嘅頸巾。


 
摸住佢，就好似摸緊Kitty咁，我視呢條頸巾係Kitty咁架啦！
 
「好啦！咁到你幫我戴啦。」Kitty指一指頭頂。
 
「哈哈，禮尚往來咁話啦喎？」我笑佢。
 
「梗係啦，如果唔係唔公平架嘛！要換返你幫我架。」Kitty遞頂冷帽俾我。
 
我接過嘅時候，唔小心掂到佢雪白嘅小手，如今Kitty嘅小手好冷冰，好想捉住佢隻手，俾啲溫暖佢。
 
我暗暗下了一個決定。
 
我將頂冷帽轉返正之後，好似戴皇冠咁，將冷帽戴係Kitty頭上。
 


望住此刻嘅Kitty，除咗可愛嚟形容，都係可愛……我諗唔到其他形容詞。
 
我凝望住Kitty水汪汪似的雙眼，深呼吸咗一下，重複我好耐之前問佢嘅問題。
 
「Kitty，可唔可以做我女朋友？」