溝女的聖地──補習社: 30

冬天嘅長洲，特別凍。但勝在陽光普照。

我諗住帶Kitty沿路行下，帶Kitty去食咗大魚蛋先，最尾先帶佢去食糯米滋。

「不如食m記囉！？」Kitty一路船就見到間m 記。

吓？入嚟長洲食m記？

「就嚟夜晚啦喎Kitty，不如食其他呀？」入到嚟都就6點啦小姐，唔好唔記得你仲要遲到……



「吓～但係我未食過喎…」Kitty扮出一副可憐樣，左手食指碰右手食指，楚楚可憐咁望住我。

又嚟呢招？扭計？

唉…「好啦好啦。」我每次都敵唔過Kitty。

「一係食個包，我帶你去踩單車啦？」我問Kitty。

「真係？我都想試下踩喎！」一講到玩佢就好興奮，好似成世未玩過咁。



我諗，入嚟長洲真係一個好選擇嚟嘅，唔洗係大時大節同人逼，依家差唔多成個長洲都係我嘅。

最尾Kitty係無買到個包，係買咗盒麥樂雞。

去到租單車嗰度，先知道原來閂咗…

咁又係，都成6點幾，聖誕節去同人哋過都好正常姐，唔差在做呢一日生意。

但係我屌你老母咩？同我閂門？搞到我美夢落空。



我有點心灰意冷，我嘅劇本係寫好曬架嘛，諗住車呀Kitty周圍去，Kitty係我後面輕輕咁摟著我……而我一邊踩一邊哼著歌，多麼的寫意同浪漫呀？？？

「唔緊要啦，遲下再去踩囉。」我見Kitty臉上閃過一絲不快，但都要安慰我……

雖然係有啲sad，但同kitty嘅時光用嚟sad，確係有啲浪費。

我帶住kitty去吃大大粒魚蛋，佢話第一次食咁大粒魚蛋，望住佢滿足嘅樣，好難想像佢係擁有世界上一切嘅人......

係心入面已經種下咗情根，慢慢萌牙。

嚟到海邊，太陽唔係對住個海面，睇唔到日落嘅浪漫。

「呢個海好靚...」Kitty咬住佢串大魚蛋，邊食邊講。

「嗯。」Kitty遞佢串魚蛋過嚟，示意叫我食。



Kitty口中仲含住粒...唔係，係嘴嚼緊粒魚蛋。樣子十分可愛，漲卜卜咁，好想......好想佢係我條女！直接錫落去。

我真係有咁嘅衝動......

「快啲食啦！」佢催促我。

然後我哋坐係沙灘上面，望下個海，靜靜地咁，幾舒服。

「呀，係呀...呀水，聖誕快樂！」Kitty從佢個食入面拎出份聖誕禮物俾我。

「哇！多謝曬，原來你有準備俾我架？」我諗以為得我整俾佢添......

「哈哈，估唔到呢？」佢推一推我。女仔真係鐘意郁手郁腳，關晴又係...



「真係無諗過呀嘛......」

「咁我嗰份呢？」Kitty伸隻手出嚟，大條道理咁問我拎。

「嗱！係度呀。」其實我一直都拎緊，佢點會估唔到呀？

「我哋一齊拆呀...好無呀？」Kitty開心咁講。

我第一次聽人係沙灘上面交換聖誕節禮物...

我哋係望住大家拆禮物，呢種溫馨嘅氣氛……我第一次感受到溫暖嘅聖誕。
 
「哇！你送冷帽俾我？」Kitty拎起個冷帽，問我。
 
「點呀…鐘唔鐘意呀？！」我比較關心呢個問題，我專登買咗頂白色嘅俾佢，襯返佢白色天使嘅形象。


 
「嗯……好核突。」Kitty一臉嫌棄。
 
「吓？白色都核突？」我驚訝地道。
 
「講笑姐，你送咩都鐘意架啦，我咪講過囉，嘻嘻。」Kitty臉上泛起陣陣紅暈。
 
「好彩你唔係送綠色嘅俾我姐…」Kitty講完呢句我都唔知點接添，我又唔係佢邊個…
 
「點會呀…綠色都唔襯你。」我隨便講咗句。
 
「作死你呀！我今日先著咗件綠色衫囉！姐係話呢件衫唔襯我啦！？」Kitty過嚟扭我耳仔，真心痛…
 
──卻真心甜。
 


「痛痛痛……」我想掙扎但又唔敢掙扎。
 
「算啦，放過你！快啲拆啦… 」Kitty臉上好期待咁款，搞到我都有啲期待佢送咗啲咩俾我。