溝女的聖地──補習社: 29

我哋搭最近嗰一班船入長洲，一上咗船，Kitty就好似細路女咁係度跑嚟跑去。
 
我相信，就算係幾有氣質嘅女仔，都有一顆少女心；就如一個再成熟嘅男人，都會有on9嘅時候。
 
「喂，唔好周圍跑啦。」我細聲想停止呢匹脫繮嘅野馬。
 
「呀水，你過嚟睇下呀，個海好靚呀！」Kitty今日異常地開心，同喺補習社嘅佢係略判二人。
 
Kitty拉住我，本來我坐係個位度，都硬係俾佢拉咗出去。
 


「你坐係度做咩呀？平時返學，係屋企，去補習社仲坐唔夠咩？」Kitty言之有理。
 
「快啲嚟陪我睇下啦！」佢契而不捨。
 
「好啦。」我又再一次妥協，對住Kitty，我只有千依百順嘅份。
 
「你睇下，個海好靚呀……」Kitty一臉稚氣。
 
人越大，呢一份稚氣就會隨時間埋係心入面。
 


「嗯，真係好靚。」我由心地道。
 
──但你更靚。
 
呢句話我無講到出口，因為我呢一刻我真係想攬住Kitty，好好享受呢刻嘅甜蜜。
 
但可惜，我無呢一個身份。
 
「平時係電視，手機，又或者係山上面，會見到個海好大，好靚…但依家真正接觸到，更會覺得更妙。呢種感覺真係好，真係好好。」
 


「原來世界好大……」
 
Kitty感概地說，又令到我覺得自己渺小。
 
世界這麼大，但我眼裡卻只有你一個。

雖然我嘅願意好簡單，只不過係想得到你嘅心，但係要做起上嚟，卻十分困難。
 
係我上船之前，我去咗一轉廁所，已經將呀楊為我準備嘅嘢，掉咗係垃圾桶。
 
男人唔咸濕，就唔係男人啦。但喺Kitty面前，我真係無呢個想法。
 
可能我會有嘅，但點都係我得到佢之後啦。我唔係啲狗公，要得到人哋嘅身體去證明自己，成功得到佢嘅心。成件事我覺得好可悲…
 
係追到Kitty之前，我唔會有啲咩越軌嘅企圖。


 
「係咪呢度呀？呢度係長洲？」Kitty每經過一個島，都會問我。
 
「我都唔知喎，個個島都差唔多架啦。」我同Kitty就係度估，邊個島係長洲。
 
最無聊嘅係，我哋每經過一個島，都會為個島起返個名。
 
事關我哋唔知個島叫咩名，Kitty話想要記住佢喎，不如一齊幫佢起個名。
 
沿路上我哋經過嘅島，都有幫起名，起埋啲無聊名。
 
例如根據形狀起名啦，有啲似個龜殻嘅，就叫龜殻島；有啲諗唔到叫咩名嘅，就叫關島呀之類嘅；有啲搞gag嘅，就叫睇唔島。
 
「咩都叫島，好悶姐，不如好似長洲咁叫洲呀？」我提議道。
 


反正咁多島，慢慢起都未遲。我同Kitty玩玩下都投入起上嚟，認真咗。
 
「都好姐。」Kitty臉上堆起笑容，睇嚟最投入嘅，係佢。
 
「咁呢個叫短洲？有長洲就有短洲架啦。」我指住遠遠哋個島嚟講。
 
「哈哈哈，幾好喎，又幾有新意。」
 
「我頭先諗到個架，不過俾你講咗先，而且你嗰個又幾唔錯咁。」
 
Kitty撥弄一上佢凌亂嘅頭髮，係船邊，海風將Kitty又長又靚嘅秀髮吹嚟我度，經常都打到我。但我好enjoy，一嚟Kitty嘅頭髮有陣陣嘅香味，每打一次我都會深呼吸一下。
 
二嚟Kitty嘅頭髮打到我，證明我同佢企得好近，心嘅距離亦慢慢拉近。

有時最無聊嘅時刻，反而讓你記得更深刻。


 
只不過係無無聊聊咁起啲名，比著係其他人，我可能會過目即忘。但正正係因為同自己鐘意嘅人一齊，呢啲島名，不知覺地印係腦海深處。
 
「咁你諗到咩名呀？」我問Kitty。
 
「哈哈，我淨係諗到四洲咋！因為四洲紫菜呀嘛，哈哈……係咪好爛呀？」
 
真係好爛……
 
但我都係配合下，勉強打起哈哈。
 
「唔算呀，我嗰個都唔係好好姐。」我安慰返佢。
 
「超！唔洗安慰啦，我都知自己嗰個唔好。」Kitty好有自知之明……
 


我同Kitty一路打打鬧鬧咁落船，一齊幻想著未來，再嚟嘅時候實會記得呢啲島名。
 
年輕嘅時候，最開心不過嘅係可以同自己鐘意嘅人一同幻想未來。
 
即使大家係現實，係現在，都唔係一齊。但係喺未來入面，卻存在著對方。
 
毒撚最大嘅力量，就係FF。我將呢個能力發揮得淋漓盡致，FF我哋好多年後，經歷咗好多嘢，好辛苦先係埋一齊，生埋個bb，然後帶住自己同佢嘅結晶品再嚟呢度，同個仔或者女一一介紹我哋嘅島名……
 
呢一切多麼的溫馨浪漫呀… 如果咁就一世，你話幾好呢？
 
「長洲呢度真係好靚呀！細細地咁，但好舒服……」Kitty一落到去，就閉眼感受緊呢個「新」地方。
 
「最靚嘅都唔係呢度，後面嗰度仲靚呀！」我拍一拍Kitty，示意叫佢走，唔好阻住人呀嘛。