溝女的聖地──補習社: 22

Kitty聽完個電話，愁眉苦臉咁返埋嚟，慢慢咁食埋未食完嘅嘢。
 
「屋企人叫你返去？」我明知故問。
 
Kitty默默地點頭，然後又加快速度，眨下間功夫就清曬。
 
同時間我都食完，「我送你返去呀？」
 
「唔洗啦，廢事俾我屋企人見到啦。」佢開心得嗰一陣又sad返。
 


不過我唔係身處佢嘅家庭，好難真正體會Kitty嘅感受。
 
「不過多謝你！」Kitty衷心地說。
 
Kitty轉得快到我有啲跟唔上，「多謝我啲咩？」
 
「多謝你好多嘢呀……」佢開始如數家珍。
 
「多謝你頭先講笑話俾我聽，其實…我聽到架，但…真係唔好笑，哈哈。」佢瞬間打走曬心入面唔開心嘅嘢，笑住咁拍住我膊頭。
 


我跟唔上，但點都好，有笑總好過無笑。
 
「仲有呀……多謝你陪我嚟食茶餐廳！對我嚟講係個好好嘅回憶嚟！」
 
我笑而不語，對我嚟講，呢啲只不過係小事。
 
「最後呀……」
 
「登登！！」
 


Kitty拎高佢件長袖襯衫，露出如雪一般白滑嘅手臂，同埋我送俾佢嘅手繩！
 
原來Kitty一直都帶住，只不過係遮住咗，我睇唔到咋！
 
「哇……你，原來你一直戴住？」我好開心，我以為佢會唔記得咗架。
 
心裡暗暗高興著，原來Kitty都幾重視我。
 
當你好用心送一樣嘢俾人，而人哋又好好珍惜，無論中間花咗幾多功夫，幾多錢都好，你都會打從心底覺得值得。

「每個人送嘅嘢俾我，我都會用架。」Kitty講完呢一番說話，令我心頭一暖。
 
忽然間Kitty捉住咗我隻手，拉高咗我件衫袖，「問，你嗰條呢？」
 
我俾佢呢條問題嚇親，點解佢會知嘅？


 
正當我感到奇怪嘅時候，佢開聲解答我心中嘅疑惑。
 
「睇你個樣，就知我估啱咗啦！」
 
「吓？」發生咗咩事？
 
「你條手繩，係咪有出情侶款呀？」佢擺出一個輕挑嘅表情。
 
「你點知架？」我開始緊張啦，驚啦。
 
我驚Kitty會估到我心意……然後俾個令我失望嘅答案……
 
「我本來想查下條手繩大約幾錢嘅，點知俾我搵搵下，搵到同一條，先知原來佢本身係情侶款嚟。」
 


唉…我大意咗添。
 
我俾老母捉到我睇咸片打飛機都無咁淆底，依家俾佢知道曬，感覺好瘀，好羞家。
 
「Er…」我支吾以對。
 
Kitty一臉食花生咁嘅樣，望住我，唔出聲。
 
「嗯…我見到個情侶款幾靚，咪買咗條俾你囉，我都無買自己嗰條…」我胡亂作個藉口。
 
「真係？」佢呢句話唔似係猜疑，而係肯定。
 
我敗俾冰雪聰明嘅Kitty。
 
「其實唔係……」