溝女的聖地──補習社: 23

Kitty係度洗耳恭聽，一臉認真，收起咗頭先嘅嬉皮笑臉。
 
我唔知係呢個時候講出自己嘅心意，係咪一個好時機，但我唔想呃Kitty，既然佢遲早都要知，咁早少少無咩所謂姐。
 
「我之所以會買情侶手繩俾你，其實只係因為鐘意你。」一句普通不過嘅表白，了無新意。
 
但Kitty卻曖昧一笑，仍然專心聽緊。
 
中間只係用咗幾秒鐘嘅時間咋，原來愛情真係需要衝動，好似頭先咁，唔好諗咁多。
 


呢個Moment係我咁大個人第一次經歷，我係股起咗畢生嘅勇氣，用盡畢生嘅精力。
 
「嘻嘻！」個衰鬼伙記聽到之後，笑咗笑。
 
屌你老味，就因為佢咁樣笑，搞到我霸氣盡失，乜撚嘢信心都無曬。
 
我猶如一個洩咗氣嘅氣球。
 
我靜咗係度，本來想講嘅嘢都講唔出口。
 


「就係咁？無啦？」Kitty語氣略帶失望。
 
我眼神閃閃縮縮，一方面諗緊點知，另一方面唔想俾個仆街伙記笑！
 
「鐘意一個人要幾複雜呀？」情急之下我衝口而出。
 
本來愛情就係一個有獎問答遊戲，答中咗對方心中面嘅答案，加一分，反之扣一分。
 
「算你啦。」Kitty笑笑口講，我唔明呢句係咩意思，原來頭先係考驗我？
 


「我夠鐘要走啦，你唔洗送我啦，呢餐當我請啦。」Kitty拎起書包，「我唔鐘意人求其鐘意我架！」
 
「嘻嘻…」佢搣一搣我塊面。
 
完全無我挽留嘅餘地就走咗去，但我都無好似之前咁呆下呆下，都跟住拎起書包，行出門口。
 
好彩Kitty係度俾緊錢，我偷偷地拎咗張50蚊塞係Kitty個書包出面，然後同佢講，「我係出面等你。」
 
Kitty出嚟後，我問佢「你唔鐘意人求其鐘意你係咩意思？」
 
「你話咩意思咪咩意思囉。」佢白哲嘅皮膚裡透出一點紅。

「吓？」姐係點？好高深測。
 
「呀水！」Kitty忽然間發曬脾氣咁，「你真係好蠢呀！」


 
「我真係唔知喎…」我腦海一片混亂，不停咁猜想佢究竟想點。
 
「唔同你講啦！你返去慢慢諗啦，我返屋企啦！」然後就轉身走咗去。
 
Kitty怒氣沖沖咁走，我本能反應地追咗上去。
 
「做咩事呀Kitty？」我柔聲問佢。
 
「無事呀！」Kitty好明顯仲嬲緊。
 
相處咁耐以嚟，Kitty第一次對我發脾氣，但唔知點解，覺得佢發脾氣好似無咩威力咁。
 
「唔好嬲啦，我份人不嬲都做嘢都唔會求其嘅。」我解釋道，我唔會算唔算氹返佢，因為我真係唔識氹人，我只不過係將我內心感受同Kitty講，就係咁簡單。
 


「吓？你讀書又咁求其？好難睇得出你唔求其喎！」Kitty邊行邊講。
 
「讀書點同呢？我又唔鐘意讀書，但我鐘意你呀嘛！」如果唔係一心要氹返Kitty，我諗我真係講唔出呢啲說話。
 
Kitty無出聲，我偷偷望下佢，Kitty見到立即別過面，我稱呢個行為叫怕醜！
 
我偷望到Kitty嘴角係牽起咗，證明佢係喺度笑緊。
 
「咁你仲嬲呀…？」我小心翼翼咁問佢。
 
「你真係做到我咪唔嬲囉……」今次嘅語氣已經放軟咗好多。
 
「你話架！」我立定決心。
 
「我真係做俾你睇架！」我信誓旦旦。


「你做到再算啦，我放長雙眼睇住啦，哈哈。」
 
呢一個約定我到依家都仲做緊，就係鐘意佢…估唔到一做就做咗咁耐。
 
嗰一日返咗去之後，Kitty覆我們whatsapp多咗同快咗，補習嘅時候都好開心咁坐係我隔離。
 
雖然只係每個禮拜見一次面，但我哋都已成為習慣。
 
我都有開始努力讀書，但唔係進步神速，只係龜速咁樣前進。
 
我哋無去咩自修室進展下感情，一嚟佢屋企人唔俾，二嚟無咁多時間。
 
雖然我哋唔係日日見，但係感情卻穩穩定定。嗱，我無話我哋拍緊拖緊，依家只係屬於溝緊佢嘅階段。
 
中學嘅時候，你唔會介意花大量時間投資係一個身上，但當你越嚟越大，你仲有無咁多時間投放係一個你唔知溝唔溝到嘅人身上？


 
我依家係抱住「有福趁命享」嘅心態。
 
呀楊好穩定呀，同佢條女，但呢排佢同我講，有啲厭，唔係幾想對住條女。令我當初有點慶幸無追到Kitty，如果唔係厭咗都唔知點算。
 
我有見過呀楊條女，食過一次飯啦，普普通通，但好似幾玩得，我唔知呀楊有帽事。
 
關晴係有去補習社，仲係補習社溝咗條仔…唔係溝嘅，係人哋嚟溝佢。
 
仲要俾我係補習社撞到佢。
 
嗰一晚同Kitty落堂後，係門口撞到關晴拖住條仔。
 
「Hi，咁啱嘅？」
 
「係囉，真係好啱喎！」關晴好興奮咁講。
 
我呆撚咗係度，因為同關晴say hi嘅，唔係我。
 
而係身邊嘅Kitty，發生緊咩生？做緊愛回家？
 
「乜你哋識架？」我問關晴。