溝女的聖地──補習社: 20

「我都係呀楊叫先會去補習社，但呢排…」我知依家要努力讀書，好似那些年咁。
 
但你要一個由0開始讀起嘅學生嚟講，就好似同保特鬥跑一百米，唔係無可能贏，但你要用時間囉──等保特老。
 
「係咪溝唔到女呢？」關晴好似一把刀咁插入心。
 
我吞一吞口水，唔想回應呢個問題。
 
「唔回應姐係中咗啦？話俾姐姐聽，話唔定姐姐幫到你呢？」關晴胸有成竹咁講。
 


「做…做咩…事想幫我？」無事不登三寶殿──非奸即盜。
 
「無呀，見大家隔離鄰舍，悶悶地咪幫你囉。」
 
「我都係女仔，又拍過幾次拖，實有啲心得俾到你嘅。」關晴突出佢就嚟撐爆件襯衫嘅珠穆朗瑪峰。
 
都係咪啦，邊有咁好死呀…一定有陰毛。
 
「我自己搞得掂架啦。」我婉拒。
 


「你依家唔信我唔緊要，你遲下就會有用得著我嘅地方。」我唔知點解佢會有咁嘅自信，但諗深一層，有一個女仔幫我分析下，話唔定真係有幫助呢？
 
雖然我唔知佢意圖係乜，但我至少知道……
 
呢個中六，係我呢世仔接觸女仔最多嘅時候！
 
跟住落嚟嘅時間，關晴無再理過我，我哋又好似變返以前咁。
 
而我，唔係補習社呢段時間，我都有同Kitty聯絡嘅，至少咁樣仲感覺Kitty係自己身邊咁。
 


呢一個禮拜，大家都有Keep住whatsapp聯絡，但係佢好耐先覆一次，有時甚至一日先覆一次。
 
而且回覆我嘅時候，都無乜表情符號，仲要加上語氣都幾淡下。
 
搞到我成日提心吊膽，諗呢樣諗嗰樣咁。
 
佢好似成日都唔會玩手機，我可以係夜晚8點幾睇佢最後上線時間，係朝早7點幾覆我嘅時候。

我成日就會好留意佢，好多時候都好想搵佢，但又怕麻到佢。嗰種想搵又唔好搵嘅感覺真係令我好煎熬。
 
我懷疑自己係咪有病……但我一見到Kitty，就好似無事咁。
 
又嚟到熟悉嘅場景，呢一個位置改寫我嘅人生，俾我遇上一個重要嘅人，可以嘅話，我一定會好好珍惜。
 
今日Kitty如常地早咗嚟到，但感覺好似無咗當初嗰股熱情咁。


 
「 Hi。」我見到Kitty好似無咩精神咁，就由我嚟打聲招呼，之前都係佢講先。
 
Kitty無應到我，只係無力咁笑一笑咁。
 
然後就喺書包拎咗本補習用嘅書俾我，我明嘅，佢係想我自己溫。
 
咁我好用心溫Kitty俾我嘅練習書，Kitty寫得好仔細，我睇得亦好快。唔洗好耐，我大概明嘅公式同點樣運用。
 
而Kitty亦唔浪費時間，係度操緊其他數。
 
佢今日無笑到……
 
我想問佢發生咩事，但Kitty唔笑嘅時候，俾人一樣無形嘅壓迫感。
 


一種威嚴，令我個心沉一沉，覺得異常地恐怖。
 
原來一個平時好好笑容，開朗嘅人，忽然間唔出聲，無曬笑容，係如此可怕。
 
可怕嘅係嗰種落差。
 
一個平常好恐怖嘅人，你已經習慣佢嘅差；但佢忽然對你好，你都會同樣感到心寒同唔適應。
 
我心跳變得好快，唔係因為見到Kitty嗰開心興奮，而係唔知一陣會發生咩事而心跳加速。
 
簡單嚟講，係不祥嘅預感。
 
Kitty今日嘅暴躁情況係超出我想像……

Kitty平時做數都好鐘意用原蕊筆，今日我已經成日聽到原蕊筆斷蕊嘅聲音。


 
平時好少做錯數嘅佢，今日竟然要係咁用擦子膠係咁改。
 
仲要用力過猛，成張紙擦爛咗。
 
我坐係佢隔離，完全唔知點好，究竟佢呢幾日發生咗咩事？
 
今日成堂就係Kitty隔離，睇住佢發脾氣，而自己又咩都做唔到。
 
係臨落堂嘅時候，Kitty講咗今日第一句說話。
 
「呀水，你可唔可以陪我去食茶餐廳？」Kitty目無表情咁講。
 
我愕然，然後問：「你唔係要趕住返屋企嘅咩？」
 


「我今日唔想返屋企……」Kitty眼神裡透露出種種嘅哀愁。
 
唔洗問呀，都估到佢同屋企人發生咗啲事架啦。
 
我又唔係社工，廢事係度問長問短，俾佢嫌煩啦。再者，Kitty約我食飯！梗係求之不得啦！
 
「好呀！」我爽快地答應。
 
跟住我哋就執好曬嘢去食飯…
 
為咗方便Kitty 返屋企，我決定係中環嗰邊食，事關佢就係住呢頭附近。
 
唔洗我講，住得係度嘅人都係非富則貴架啦。
 
「你有無心水諗住食咩？」我問Kitty。
 
其實沿路上我都有講啲笑話氹下Kitty開心架。
 
「Kitty呀，我講個笑話俾你聽呀，好無呀？」
 
無反應。
 
「從前係海入面有三隻蝦喎，佢哋一齊俾啲浪沖咗上岸，然後佢哋係岸邊大叫：『哈哈哈！』」笑話講完。
 
「哈哈哈，好無笑呀？」
 
都係無反應。
 
正係得我笑……