溝女的聖地──補習社: 19

「咁我上返去啦，你自己返去小心啲。」Kitty轉身就走。
 
「Kitty！」我叫住佢，我想再望多佢一眼。
 
「嗯？」夠啦，心足啦！
 
我依家先發覺，補習社溝女唔同學校溝女，學校溝唔成功，起碼可以成日見到；但補習社溝唔到，你想見都無得見……
 
「唔好對份禮物有太高期望喎，哈哈。」
 


「我從來都唔介意人哋送咩俾我，每一份我都好重視。」然後Kitty對我揮揮手，行入大堂電梯入面。
 
我目睹Kitty關上電梯門嗰一刻，佢仲同我揮手說再見。
 
我返去嘅時候，心入面好忐忑，唔知點算好。
 
我同Kitty嘅差距實在太大，無論家境、相貌、學業成績，我都無一樣嘢比得上佢。
 
我只可以俾到我自己認為最好嘅佢。
 


依家我期望下一次補習嘅來臨。
 
第二朝呀楊問我如何，我垂頭喪氣，由琴晚開始，我個心都仲好忐忑，灰機到依家。
 
雖然返到去Kitty都有whatsapp我，講返聲多謝，同埋我會嚟參加佢嘅生日Party佢感到好開心。
 
我問佢拆咗禮物未，佢都話未，遲下先拆。遲遲下又好似無咗件事，我都唔知佢有無拆到。
 
但係佢越係對我好，我就越覺得配佢唔起。
 


──Kitty太完美。我將琴日嗰件事同咗呀楊講。
 
呀楊聽完之後，第一個反應就係：「屌！你係咪男人嚟架？」
 
「吓？做咩？」我呆咗，無啦啦俾人屌。
 
「你老閪都唔好同人講你得3同4啦，人哋都話咗會拎5**，你仲話自己得3同4，抵你俾人笑！」
 
「…」我無言以對。
 
「但係我份人不嬲都唔講大話架嘛，你都係架。」以我熟悉嘅呀楊，都係唔識得講大話嘅死毒撚。
 
「你呢個時候梗係要吹大啲，話自己都有5*，起碼感覺都同條Marco平起平坐呀。」
 
呀楊講嘅嘢係幾中Point，人會變，月會圓。做朋友嘅，都唔想見到身邊嘅朋友一直做毒撚嘅。


 
「唉…我依家唔知點做好呀…」如果可以，我都想直接縮短個距離，等我可以容易啲溝到Kitty。
 
「呀楊，你認真答我。」
 
我好認真咁望住呀楊，我唔係講笑。
 
「我靚唔靚仔？」我Chock一Chock。
 
「噗！」討厭嘅笑聲又再奏起。
 
笑聲係由坐係我前面嘅關晴發出嚟，我忍唔住開條八婆波，我已經見識過八婆嘅威力，我頂唔順啦！
 
「笑咩姐你！」我話完條八婆，跟手呀楊又笑埋一份。
 


「你又笑咩呀？」我發火般咆哮。
 
呀楊開始感受到我嘅怒氣，「咪嬲住先，係朋友先咁玩你咋，你唔係我朋友，我理你都有味啦。」
 
關晴擰轉個頭，過嚟同我講，「你個樣呢，就真係唔靚仔啦，你起碼可以好似子華咁，做個有才華嘅人溝死女好過啦！」

估唔到平時無兩句計傾嘅同學，都會關心下我，忽然間我覺得人間有情。
 
「嗱！我就覺得佢講得幾啱嘅。」呀楊拍一拍我膊頭。
 
「有時呢，係要認清下個事實，先至會睇清楚個現實。」
 
「你依家不如真係俾心機讀好啲書，仲有機會追嘅。」
 
「追咩先？」我唔明，係追Kitty呀，定係追返啲成績？


 
「梗係追返啲成績啦！你要追到Kitty，呢啲嘢順其自然啦。」呀楊講完就走咗去，手中不忘拎住部手機。
 
「乜你依家有去補習社呀？」關晴雖然係八咗啲，但至少無琴日班八婆咁黑人憎。
 
「係呀。」我收一收頭先發嬲嘅口氣。
 
「係嗰度識咗個女仔？」睇關晴個樣都意圖不善咁，唔方有好嘢。
 
關晴同普通女仔差唔多，但發育良好嘅佢有一個傲人嘅雙峰， 韓風all back嘅發型，係班上面嘅人緣亦都唔差。
 
「嗯…」我唔係幾想透露太多，我謹記住呀楊嘅教訓。
 
再嚟我怕佢係啲大聲公，周圍講。
 


雖然我無咩人氣，只係毒撚一名，但都唔想俾人唱通街。
 
「搞到我都想去補習識返個男仔添！」關晴托住頭，係度思索緊。
 
「唔係掛？你去識男仔？」估唔到佢會咁講，有點訝異，「你已經算係好多仔溝架啦喎？」
 
依家狗公當道，呢種女仔身邊已經好多狗公汪汪汪。
 
「呢度無咩啱自己心水呢…」
 
估唔到關晴會係我中學肯自動同我傾偈嘅人…
 
係架啦！我中學真係無女仔fd架啦，唔俾咩？