溝女的聖地──補習社: 18

我回眸一看，係Kitty喺後面衝咗出嚟，除咗意想不到之外，我心入面覺得幾感動下。
 
「Sorry呀，我生日請你嚟，竟然搞到你咁唔開心…」佢臉上盡是哀愁。
 
「傻啦，我都無怪到你。」我真心嘅，怪就怪佢班八婆啦！
 
Kitty係佢哋入面嘅清泉嚟。
 
「你專登跑出嚟就係為咗同我講聲Sorry？」
 


「係呀，我見你全程好似悶悶不樂咁，搞到我都有啲後悔叫咗你嚟。」
 
望多兩眼我怕我會唔捨得走，因為Kitty實在太可愛啦。
 
「我諗住大家都可以開開心心架嘛…」佢個樣就嚟喊咁，「我知就算叫返你上去都無用架啦。」
 
我唔想係Kitty生日搞到佢唔開心，於是我係書包拎咗份禮物出嚟。
 
差啲唔記得咗送，如果唔係就錯失良機。
 


「送俾你架。」我遞俾Kitty。

「吓？你竟然有準備禮物俾我？」Kitty喜出望外。
 
我仲諗住Kitty實會估到我會送禮物俾佢，點知原來佢係無諗過我會送……
 
「係呀，你生日點會唔送呀？」
 
「我咁倉卒同你講，我以為你會準備唔切呀嘛…」Kitty終於笑返，有返之前嘅笑容。
 


「點會呢？一定要準備嘅。」我搔搔頭，嗰種毒撚味又出返嚟，唔記得自己今日gel咗個靚頭。
 
「係呢…嗰個Marco係邊個嚟架？」我好想知條粉友係咩來頭。
 
「Marco係我爸爸啲朋友個仔嚟嘅…姐係世交咁啦，由細識到大。」
 
閒談間，Kitty嘅表情無太大嘅起伏，睇嚟Kitty同Marco真係無乜嘢。
 
Kitty笑一笑，令我個心安定返落嚟，至少Kitty會為咗我而追出嚟。
 
「笑返咪好囉。」我忍唔住，摸摸Kitty個頭。
 
只要氹到Kitty笑返就夠啦，見到佢笑，頭先發生嘅嘢就咩都消失曬咁。
 
我心生一念，我好想守護Kitty嘅笑容。


 
想佢一路笑落去。
 
「多謝你呀。」我期望Kitty會見到我咁有心而有所行動，呢個係我心入面嘅一絲絲盼望。
例如錫下我，攬下我咁。
 
最後當然係無啦。
 
毒撚實係唔好FF咁多，明知現實係點，但又阻止唔到自己胡思亂想。