溝女的聖地──補習社: 17

「都有3有4架！」我好大聲咁講。
 
其實我知自己未必有3添…可唔可以全2都成問題。
 
又靜咗。
 
『人哋得3同4咋…』
『對佢哋嚟講算勁架啦。』
『如果我得3同4，我一早去咗跳樓啦。』
 


「乜你係補習社識埋呢啲人架？」水箭龜同Kitty講。
 
根本佢哋打從心底裡睇我唔起！
 
伯母佢係廚房度拎啲餸出嚟，咁啱聽到「補習社」呢三個字。
 
就問道：「Kitty你係咪有去補習呀？」
 
「Er…」連水箭龜都知道奶嘢了，收收地皮。
 


「係呀媽咪。」Kitty處變不驚，神態自若。「因為近排想衝好啲數，咪去補習囉。」
 
「你啲數一向都唔差架…」伯母好似要開戰啦…
 
「算啦，我明嘅。」然後就返咗入廚房。
 
眾女就一窩蜂送禮物俾Kitty，個場面就好似見到韓國明星，衝上去拎簽名咁。
 
「乜原來你媽咪唔知架？」水箭龜好驚奇咁問。
 


「唔知架，我都無同佢講。」Kitty若無其事咁講，「因為我不嬲都唔洗補習嘅。」
 
「咁你又去補習嘅？」Marco問。
 
眾人嘅眼光望落我度，盯住我。我估到啦，佢哋猜想緊，我係咪Kitty去補習嘅原因。
 
我先前都有咁嘅疑惑，點解Kitty成績咁好，仲要去補習社？
 
「唔關呀水事，係我自己想去姐。」Kitty塊臉沉咗落嚟，「我想試多啲嘢。」

我就坐係Kitty對面，所以Kitty嘅神情動作都走唔甩我對眼。
 
Kitty望住我，呢一個眼神好複雜，我拆解唔透。
 
「唔好再去補習社啦。」八婆四號語重心長咁講，「再去多幾次，遇埋呢啲怪人就唔好啦。」


 
我真係頂唔順，人嘅忍耐係有限度。我唔係橡膠，唔係任踩都無事，上一次係補習社單嘢我已經無計，今次唔會再忍！
 
咁都忍到，屎都食得啦！
 
「唔好意思，我忽然間有事要做，走先。」我企咗起身，往門口方向走去。
 
係臨走前嘅一剎那，再次靜咗。
 
老老竇竇，道不同不相為謀，我同入面班友仔都唔啱Key，點講都係兩個世界嘅人嚟，狗眼看人低。
 
我離開咗Kitty屋企之後，諗咗好多嘢，自己係咪唔啱Kitty呢？
 
我係咪唔應該再打擾Kitty嘅生活呢？
 


我今日先感受到我同Kitty嘅差距，我可能要奮鬥唔知幾多年先可以同佢門當戶對。
 
就算俾我有朝一日奮鬥到，Kitty會唔會鐘意自己都係一個問題。
 
我陷入沉思嘅漩渦當中，就快步出呢個輝煌大堂嘅時候，忽然聽到後面有人大嗌：「呀水～～～！」