溝女的聖地──補習社: 16

「 挑！Band3學校點同我哋啲 Band1學校比呀？」個女仔講完，成班八婆開始嚟料。
 
點解Kitty咁耐仲未返嚟？
 
「方死唔係為咗要溝Kitty咩？」八婆一號開始轟炸。
 
「又係Kitty呀？乜咁多人鐘意佢架？」八婆二號呷醋。
 
「佢點會溝到Kitty呀？Macro好佢咁多。」八婆三號講道。
 


「係呢？Marco你今次DSE諗住有幾多科5*呀？」八婆四號講。
 
Marco托一托佢副眼鏡，正想開口嘅時候，Kitty由廁所度返嚟。
 
「咁開心嘅？你哋傾緊咩呀？」佢坐係班八婆為佢準備咗嘅位，Marco隔離…
 
我見到Kitty有望一望我，對我笑一笑。
 
「無呀，傾緊Marco今年諗住拎幾多個5*咋嘛。」八婆四號又重複。
 


Kitty笑笑口講道：「Marco點會淨係得5*呀？」
 
佢再望一望Marco，「佢實5**啦，係咪？Marco？」
 
我觀看Kitty表情，唔似係串緊Marco，揶揄緊佢，而係好認真。
 
Marco點點頭，眾女嘩然。
 
『咁有信心考到？！』
『唔係掛？』


 
Macro淨係坐係度咋，我都會feel到班女濕曬咁制。
 
「俊男配才女，天作之合呀！」八婆三號講道。
 
「係呀！人哋真係門當戶對啦，唔似得有人想癩蛤蟆想食天鵝肉啦！」奇異花講完之後，有意咁望下我。
 
我明白咩叫書到用時方恨少，【那些年】、【我的少女時代】，都係為咗要溝女而發奮讀書。
 
而我，係俾情敵激發而決心發奮讀書！（仲有班八婆。）
班八婆繼續係度吹噓Kitty同Marco，無視我嘅存在，我就好似透明人一樣。
 
「Kitty，我帶咗份生日禮物俾你呀。」Marco起身準備去拎份禮物。
 
「WOW！」眾女開始起哄，「好型呀！好Man呀！」


 
班女係咪未撚見過男人？
 
得罪講句，我覺得呀楊仲型仔過呢件Marco。你真係俾件米8男神，知書識禮，又讀到書嘅做我對手，我真心認輸。
 
但我唔想輸俾呢件油頭暗瘡撚樣！
 
班女係度拍曬手咁，我都唔知佢哋做咩係度叫囂，但呢度無我出聲嘅餘地。
 
Marco係個紙袋度拎咗一set練習書出嚟，雙手咁遞俾Kitty。
 
全場靜咗。
 
我用力合埋個口，忍住笑，如果唔係我應該會大大聲笑咗出嚟。
 


「多謝！」Kitty依然笑容可掬。
 
「Marco真係貼心啦，知道Kitty就嚟考DSE，專登買練習書俾佢！」水箭龜出嚟打圓場。
 
「係囉係囉，我哋恨唔嚟架啦。」八婆唔知幾多號走出嚟附和。
 
「我依家入去擺低份禮物先。」Kitty又走咗去。
 
跟手成班女走咗去拎禮物，諗住等Kitty出嚟再一齊送。
 
係咪多舊魚？點解頭先唔一次過送埋？
 
我無諗住一陣送埋，反正遲下再送都無問題。
 
「Water呀，你平時係學校考開咩成績架？」佢哋將目光轉移到我呢個透明人身上。


 
「我都想知喎， Band3嘅人係咩料。」八婆一號問道。
 
彷彿係佢哋眼中，成績就係生命的一切。
 
Kitty放完嘢返嚟，我就股起勇氣，我唔想一直衰俾Kitty睇。