溝女的聖地──補習社: 15

入咗嚟，我先識得後悔，因為真係好大好豪華。呢度嘅嘢，係我唔知要努力幾耐先擁有得到嘅嘢。
 
我自動自覺除咗鞋先。
 
一眼望去，成堆人坐曬係度，好似TVB咁，等緊最後的主角。
 
『乜你咁遲架？』
『差你一個咋』
『主角係要遲啲架啦。』
 


一堆人係度講嚟講去，完全無我插嘴嘅餘地。
 
佢哋坐曬係張大沙發到，而我就毒毒地咁自己搵張凳坐埋一邊。
 
鳩下鳩下咁攬住個書包，笑笑口咁坐係度。唉屌…早知唔嚟啦。
 
最攞命嘅係，水箭龜同奇異花都係度。
 
Kitty一早俾人拉走咗，無咗Kitty係身邊，我就無咗安全感咁，失曬方寸。
 


「我去一去廁所先。」Kitty有禮咁講，然後就去咗廁所。
 
伯母就係廚房度忙緊啦，世伯就唔清楚啦。
 
Kitty一去咗廁所，十幾雙眼睛就落咗係我身上，忽然間好似有射燈射係我身上咁，有好戲發生咁。
 
『邊個嚟架？』有人竊竊私語地問。
 
『係補習社識架。』個兩件死黑人憎嘅係旁邊加把嘴。
 


『我都唔知點解佢會嚟嘅。』
 
佢哋又好似先前咁，以為我聽唔到。
 
我粗略計算下，呢度大約有10個人，9女1男。
 
嗰個男仔我都唔知點解佢會出現係度，據我所知Kitty好少男性朋友架，唔通係唔知邊個女仔嘅男朋友？
 
呢度除咗嗰兩隻寵物小精靈之除，其他嘅質素都唔差嘅。

個男仔啲頭髮好似無整理過咁，仲要油油地，成面暗瘡咁唔打理。
 
個男仔身型瘦骨嶙峋，猶如一條電燈柱。
 
「係呢…你叫咩名呀？」其中一個女仔好nice咁問我。


 
「Er…」我一時口啞啞。
 
「有無咩英文咁呀？」個女仔都OK 嘅，但對比起Kitty，真係差一大截，「等我哋易記啲。」
 
「我叫Water。」，我好有禮咁企起身，伸隻手出去，諗住同佢握手，「Water Luk。」
 
個女仔先是一怔，繼而一縮，最後爆笑。
 
「哈哈哈哈哈哈哈哈哈哈哈！」我完全唔知發生咗咩事。
 
「你真係講得無錯，佢份人真係好搞笑！哈哈哈！」個女仔同水箭龜講。
 
「係呀呢？」
 


此時我先發現，佢地手上都拎住部手機…我諗佢哋就係用whatsapp聯絡。
 
心計真係重，就係為咗要潤鳩我。
 
「呀Water係咪呀？」個女仔問我，笑到標眼水。
 
我遲疑咗一陣，話係又死，話唔係又死…
 
「嗯…」我已經無地自容。
 
「哈哈！」佢繼續笑多兩聲，「你讀邊間學校呀？」
 
我已經俾佢哋笑到無咩所謂，就嗡咗我間學校俾佢哋知。
 
「嗰間學校？Band3？」佢好直接咁問。


 
今次我無應到佢，塊面已經黑黑地。