溝女的聖地──補習社: 14

我有留意Kitty Facebook，都好多朋友同佢講生日快樂，但多數都係女仔。
 
只要我表現好啲，話唔定我有機呢！
 
「係呢？你今次返到去有無溫書呀？」Kitty唔放過一個可以溫下書嘅機會，一坐低就旋即拎咗練習出嚟溫。
 
當然有啦，呢個禮拜除咗準備份禮物之外，就係溫返上次補習社教過嘅數。
 
「有呀！」我好乖咁俾佢睇下我上次做嘅筆記同埋練習題。
 


係佢面前，我唔怕再幼稚啲。
 
「咁就好啦，咁我依家教定你一陣上堂會上嘅嘢，咁樣你就會學得更快。」Kitty霸氣得嚟而不失可愛。
 
係Kitty好專心教緊我嘅時候，我乘機偷望佢，每一個舉手投足，專注嘅眼神，都一一俾我雙眼收下。
 
直到落堂，我都沉醉係數學入面。
 
好耐無試過呢種感覺啦……嗰種忘我嘅狀態。一專心，時間就好快過。眨下眼就落堂，個feel係幾正，幾爽！
 


「你仲記得架呵？」Kitty試探地問道。
 
「梗係啦，點敢唔記得你嘅嘢？」我拍拍心口。
 
「咁就乖啦，哈哈。」Kitty好開心。
 
因為佢係咁摸我個頭，好似撚狗咁撚，我差啲就吠佢兩聲架啦。
 
我哋一齊去搭車，雖然次次落堂都係咁，但今次係去佢屋企，心情不免有點緊張…
 


一路上，我都FF緊Kitty收到份禮物嗰開心樣，同埋佢會有咩反應，開心？興奮？即刻戴？
 
嚟到佢屋企門口，就覺得輸咗一截。
 
大門金碧輝煌，同我住緊嘅公屋好唔同。入面有好幾個保安都著到西裝骨骨咁款，同我哋留下普普通通嘅制服有天壤之別。

大堂上面掛住一個巨型嘅水晶燈，更顯高貴。
 
「哇！你住呢度好靚呀。」不禁係度概歎一聲。
 
「還好啦，都慣曬。」Kitty唔放在心上。
 
對比起我依家住緊嘅地方，真係天堂與地獄：兩個唔同世界。
 
見到呢個情況，少不免會令我感到自卑。


 
忽然間覺得Kitty會睇唔上我送俾佢嘅呢條手繩…
 
佢屋企一定好多名牌呀珠寶，點會稀罕我係台灣訂返嚟嘅爛鬼手繩呀？
 
個心涼一涼，除咗傷心，更多嘅係唔甘心。
 
唔甘心又點？事實就係擺係你眼前。
 
保安好有禮咁同Kitty打聲招呼，而Kitty亦溫文有禮咁回應人，當中閒聊數句，返嚟啦？補完習之類嘅。
 
但從佢哋望過嚟眼神得知，佢哋反而好奇我係邊位。
 
上到佢屋企，係由媽咪開門，
 


「返嚟啦？全世界等緊你呀。」伯母好慈祥咁講。
 
「Hi，伯母。」我好鵪鶉咁講。
 
睇到伯母一身嘅裝扮，就連我都覺得洗唔洗咁呀？佢呢一身我知係屋企著嘅衫，但佢係屋企著嘅衫仲高貴過我啲出街衫。
 
一睇已經高下立見。
 
「呢位係…？」伯母好明顯唔知我係邊個，但笑容都唔少。
 
而且伯母笑起上嚟同Kitty有七分相似，仲要幾靚添──正人妻。想必伯母後生嘅時候，都係靚女一名。
 
「呢位係我出面識嘅朋友。」Kitty有禮咁介紹我。
 
「好啦，快啲入嚟先啦。」伯母佢開大度門，俾我哋入嚟。