溝女的聖地──補習社: 11

「咁琴日條數係咪識咗啦？」我估唔到佢有此一問。
 
「係呀，識咗啦，哈哈。」我亂咁嗡。
 
「吓？真係？琴日條數好難喎。」Kitty有啲唔係幾信咁，眼神透露出一份猜疑。
 
「係呀，你教完點會唔識呀？」我口氣開始大起上嚟。
 
「咁好啦，一陣俾一條類似嘅數俾你做啦，睇下你係咪真係識。」Kitty放返低個背包，係書包拎左本厚厚嘅數學書。
 


我開始有啲淆底…老實講，我琴日問嗰條數，連咩類型都唔知，正係知好多字，好似好複雜咁，就sd咗出去。
 
正當我盤算緊點算嘅時候，佢已經搵好咗嗰一題數，指一指，「你試下好似琴日我寫俾你嘅步驟，睇下做唔做到。」
 
此刻佢忽然間變得好嚴厲…令我有種威逼感。
 
我投降…我認輸…「其實我琴日嗰條數唔係幾識…唔係幾明…」
 
我唔敢望住Kitty，我害怕見到佢失望嗰種眼神。
 


「抽水，我都估到架啦。」Kitty「唉」咗一聲，「呢條數，我琴晚做都用咗一段時間先計到出嚟，一係你本來數學就好勁，一係你其實都唔識。」
 
「我都係一半一半，睇下你程度去到邊，但無論結果係點，都係我預料之內。」
 
「咁，你可唔可以答我點解要問呢條數嘅？」Kitty一臉認真，似乎唔係講笑。
 
我只好講返個真相出嚟…
 
「其實我只係想同你傾偈先會咁做……」我後尾越講越細聲，因為越講就覺得自己越柒。
 


「抽水，呢個時候…」我大約估到Kitty想講咩，但我唔想再聽落去。
 
「得啦！我明啦，我知道…」我怕佢講出嚟我承受唔住…
 
「不如你教我前排補習嘅嘢呀？」我急中生智，轉一轉個話題。
 
「都好嘅，當係順便複習下。」Kitty又回復返笑容，拎我哋本補習書出嚟。

Kitty慢慢一個步驟一個步驟咁教我，係佢細心嘅教導下，我開始慢慢識做。
 
其實我細個成績唔差，只不過搵唔到讀書嘅理由。依家Kitty教一教，細細個嘅記憶就俾人call返出嚟。
 
雖然無咁快學識，但都算係有進步。
 
跟住落嚟嘅補習，我都好專心咁聽咁抄，一入咗個mode，就停唔到，出奇地認真。


 
「抽水。」Kitty忽然間叫一叫我。
 
「嗯？」我係聽書mode入面抽離咗出嚟，望一望Kitty。
 
Kitty認真咁抄緊嘢，正眼都無望過我，但佢認真嘅樣都係咁迷人。
 
「其實你唔係蠢，你只係懶姐。」佢繼續埋頭苦幹咁抄筆記。
 
「只要你肯努力，依家都未遲。」
 
呢一番說話，老師、屋企人、私補老師都同我講咗好多次。
 
但無一次好似Kitty咁，講得咁有震撼力，震入我心。
 


「就算努力咁又點？」我諗返起自己細細個嘅事。
 
「有啲人點努力都無用…」