溝女的聖地──補習社: 12

細細個我讀書其實好叻，好多成績唔洗點溫都輕輕鬆鬆滿分，就算無滿分都有90幾。
 
班上面有一個同學同我好fd，但佢成績唔好，我成日都同佢出去玩，一齊打機…睇漫畫，追電視。
 
我哋仲報左同一個漫畫班，一齊學漫畫，補習社都有報，一齊去上。
 
嗰時仲有快樂龍，入面有pokemon連載，我哋死慳啲零用錢，就係為咗一個禮拜買本快樂龍一齊睇，一齊追。
 
仲一齊買咗部GBA，玩寵物小精靈，銀版金版，火紅葉綠咩都玩齊，升lv 打道館。
 


但佢屋企知我成日同佢出去玩，成績差曬，仲電話嚟我屋企同我老竇老母講。
 
細細個嘅我係度諗，成績真係咁重要咩？對我嚟講，呢個朋友比成績更加重要。
 
但好可惜，最後我哋唔似tvb 咁，解決所有難關，大團圓結局。
 
直至有一日，我返學搵佢，佢唔理我，成日有意無意迴避我。放學無再一齊放，禮拜六日無再一齊出嚟玩，佢亦都無再去補習……
 
快樂龍只剩底我自己買，後尾快樂龍由週刊變咗做雙週刊。
 


自此，我對於讀書，已經無曬衝勁，完全唔想讀。就係因為讀書，我無咗一個好好嘅朋友。
 
直到畢業，到依家，都無再聯絡。每次諗返起都隱隱作痛；失去一個朋友，有時比失戀更痛。
 
如果有得俾我揀，我寧願自己讀書唔好。
 
嗰陣時佢嘅屋企人話我帶壞佢個仔，自己成績好，周圍玩，拉埋啲成績唔好嘅人去玩，等佢無時間讀好啲書…
 
我真係百口莫辯，升上中學之後，我變得好少講嘢，亦無好似小學咁活躍，更加唔鐘意讀書，日日顧住打機。
 


直至遇上Kitty，先令我再次搵返少少讀書嘅樂趣。
 
「你唔努力過，點知無用？」Kitty終於望住我。
 
直勾勾咁望實我。
 
我明，但如果成績好而令我失去我認為重要嘅人，我寧願成績唔好。
 
我無同Kitty講返我細細個嘅嘢，每個人都有自己苦衷，唔需要咩事都向人交代。
 
我無答到佢，只係望住份練習題，我諗唔出個更好嘅答案回應Kitty。
 
中間我有唔明就問Kitty，盡量令自己學到嘢，始終我唔想俾Kitty見我咁懶散嘅款。
 
臨走之前Kitty問我，「你下次補習放咗之後得唔得閒呀？」


 
我一開始都唔信自己對耳，畢竟啱啱先經歷過嚴肅嘅事，女人話變就變。
 
上一秒有事，下一秒就無嘢啦；上一秒無嘢，下一秒就有事啦。
 
「我得呀。」我實話得，仲恨左好耐添！
 
「做咩事無啦啦約我嘅？」我估唔到第一次嘅約會係Kitty約我，頓時心花怒火。
 
「下個禮拜四係我生日呀，想邀請你嚟我屋企開Party姐。」Kitty盛意拳拳咁，我都唔忍心拒絕啦。
 
「真係？」不過估唔到咁啱撞正佢生日姐。
 
「係呀，你記得嚟呀。」佢開心到見曬牙咁。
 


「點解你會叫埋我嘅？」我真係好多嘢問，但我真係想問清楚，到時候上到去見到班唔識嘅人就尷尬啦。
 
「我男仔朋友少呀嘛…而且我想多啲人熱鬧啲。」Kitty好似好期待個生日咁。
 
「我返去啦，你記得呀。」Kitty再三叮嚀。
 
目送Kitty上車之後，我立即打電話俾呀楊。
 
「喂，呀楊，下個禮拜Kitty生日，我應該送啲咩好？」直覺同我講最靠得住嘅始終都係呀楊。