溝女的聖地──補習社: 10

呢個世界其實無啲咩咁美好嘅事，女神唔會主動搵自己，唔好當自己係電影入面嘅靚仔男主角，總係有女撩你。
 
現實生活入面，好多事情都需要自己爭取，人哋請唔請你，都要自己爭取機會面試，表現自己。
 
而愛情亦同見工一樣，人哋會唔會接受，都要睇你點樣表現自己，你嘅全部係咪人哋想要嘅。
 
感覺就好似機會一樣，都要去爭取，唔係係度等，感覺就會嚟到。
 
以上嘅嘢我係用左成個禮拜嚟諗，就係為左要唔要sd 個 whatsapp俾人。
 


諗左好耐，先說服到自己sd個whatsapp俾人。
 
好幼稚呀呵？我都覺呀…
 
仲幼稚嘅係，我用咗一個連自己都覺得柒嘅方法──問數。
 
『Hallo，我係呀水呀。我有條數唔識呀想問下你…你得唔得閒呀？』
 
我覺得我真係應該上連登開Post問，「如何向女神問數而不失霸氣」
 


總之柒咗就柒咗…一時情急就返唔到轉頭。
 
點知Kitty又好快覆我喎，不禁令我喜出望外。
 
 Kitty：你係抽水呀？
 
我又點會覆得慢呀？
 
我：係呀。
 


Kitty：我依家唔得閒住呀…我依家就要去練琴啦，一係你sd咗俾我先，我一陣再覆你啦。（再加個微笑嘅emoji。）
 
雖然我係幾憎呢個個emoji，覺得佢好做作，假到死。但Kitty sd過嚟就完全唔一樣，忽然間好有畫面，好match返 kitty嘅樣同性格。
 
當然Kitty無笑得好似個emoji咁膠啦。
 
我：好啦，等你。
 
幾好，感覺幾好！
 
其實我係無咩唔識，純粹係想同佢傾下偈，所以我求其係書入面揀咗題算係最多字嘅俾佢，當係考下佢。
 
呢段時間我除咗成日睇部手機，就無所事事，等msg嘅時候真係好空虛。
 
不停拎起個電話，打開螢幕，咩都無，熄返，隔一段時間，再開，又係咩都無。


 
你想同自己講，放低啦，等一陣啦。但你又會手癮癮，去㩒電話。

叮咚…
 
終有一次你係會等到嘅，成功就係你眼前。
 
屌你… 呀楊嚟，whatsapp我問我打唔打機…搞到我空歡喜一場。打打打，打你老母呀，依家我要讀書呀，等待kitty覆我。
 
又返去輪迴嘅節奏。
 
下一次收到kitty嘅whatsapp，已經係連答案sd咗過嚟，再外加句早抖，聽日要返學。
 
瞬間由期待嘅心情跌咗落谷底。
 


 Kitty：聽日見。
 
見到呢句先醒起，係喎！聽日禮拜四！又可以見到底Kitty，又係谷底升返上嚟，就好似玩完過山車咁。
 
每個禮拜可以見上Kitty一面，係我覺得最開心嘅時候。
 
今次我無好似平時咁，放咗學去食少少嘢，再去補習社。而係一放學就揹起書包，以最快速度去補習社。
 
無他，就係為咗快啲見Kitty。
 
比著係我平時返屋企補習，我一定拖得就拖！最好遲嗰5分鐘返去，咁就會覺得自己賺咗，依家係快啲去到會係自己賺咗。
 
愛情嘅魔力真係強大，如果世間上無咗愛情，一定好寂寞…
 
我嚟到無耐，揀返原位，Kitty就嚟到啦。


 
「抽水，咁早嘅？」Kitty問道。
 
「係呀，早啲嚟溫書呀嘛…」我求其諗咗個藉口，其實係司馬貂之心，路人皆知。