溝女的聖地──補習社: 9

「唔知點解對住你，就好似對住女仔咁，好放心，哈哈。」 Kitty揹起書包，成個人chock兩chock，揹好咗，「走未呀？」
 
聽到呢句，我心有戚戚焉，up住up住咁。原來佢只係當我係女仔咁看待……
 
只係自己諗多咗。
 
「哦，原來係咁。」除左呢句，我都唔知覆咩好。
 
我同kitty走出補習社，同佢行去搭車，大家搭嘅唔一樣。一路上都有閒談幾句，先知原來佢都要好早返到屋企，最遲唔可以超過7點半。
 


所以Kitty一放左，佢就要返屋企，想留佢食飯都難…
 
「呀水，你真係要俾心機讀書呀。」佢臨上車同我講咗呢句說話。
 
前一秒仲有講有笑，下一秒就變得咁沈重，轉變得太快，我一時之間反應唔切。
 
「吓？」
 
「無嘢呀，我講下姐。」Kitty喺書包入面拎個銀包出嚟，準備上車。
 


「我走啦，下次見啦。」佢又亮起佢嘅招牌笑容。
 
「ByeBye，小心啲呀。」我叮嚀佢，好驚我一個唔留神，佢就俾其他男仔追到手……
 
喺返屋企嘅途中，我終於可以一睇kitty嘅Facebook，心中有股莫名嘅興奮同緊張感。
 
究竟佢社交喺點，有啲咩人，會有咩男仔，仲有無其他好似佢咁靚女，又善良嘅女仔？
 
我上到車第一時間，就喺睇佢facebook。
 


一望，係有啲失望，但同時間又有點放心嘅感覺。
 
 Kitty嘅Facebook名係「程雪」，Icon係一張背影相，只係去到及腰，完全發揮唔到佢優勢。
 
封面照片係一張班相，邊會估到邊個係Kitty姐？我憑自己嘅記憶，搵到Kitty出嚟，佢唔高唔矮，企係左邊中間度，仍然笑得好燦爛。
 
我用咗15分鐘時間睇曬佢所有相同埋status， ststus都無乜嘢，循例俾朋友偷ac，
 
喺人哋度登入咗，但唔記得左登出，俾人拎咗嚟玩。
 
留言嘅都係女仔，似乎搵唔到一點男人嘅味道。睇嚟真係如Kitty所講，真係無乜男仔朋友。
 
有點慶幸之餘，又鄧小平Kitty慘，就好似我呢種毒撚無女性朋友一樣。
 
慶幸嘅係，我竟然可以做到Kitty嘅男性朋友，好運終於降臨喺我頭上啦！


 
我更想做Kitty嘅男朋友多啲，嘻嘻。
 
令我比較在意嘅係，Kitty有一個個Status係講：今日黑心巫師又嚟搵我啦……
 
黑心巫師又係邊個呢？但呢個只係好小事，無乜人理，所以我都無放係心上。
 
其實kitty個Facebook 除左幾個status同幾張相之外，都無乜嘢。但對我嚟講已經好滿足。
 
總好過我地學校啲女仔，個個P曬圖咁，又share 自己啲相呀買like，收兵派糧。
 
有時係Facebook見到都覺得佢哋好無謂，日日就係為左經營自己嘅網上生活，現實生活就一團糟。明明係學校同埋網上面係兩個唔同嘅人…
 
所以我覺得kitty Facebook空無一物反而更令我欣喜。
 


我怔怔地望住自己嘅手掌，工工整整嘅數字，好女仔feel嘅字。
 
有啲位置誇張地大，有啲位又特別字，幾有特色，整體嚟講幾得意。
 
一望到呢一連串數字，就諗嗰一幕，心入面嘅甜就會好似泉水咁湧上嚟，眼眶都會感到一熱──感動。
 
就好似Kitty一直係我身旁咁。
 
我立即輸入佢嘅電話，加左佢 whatsapp先，唔理咁多。
 
到咗聽日，我手掌上嘅筆跡，已經消去大半，只剩底淡淡嘅痕跡，慢慢退卻，消失殆盡……
                                                       
但係我哋嘅回憶，唔會因此而消失不見。