溝女的聖地──補習社: 6

「呀～佢地係出面等緊我，我嚟叫一叫你炸。」小光都係咁好笑容，都係笑得咁靚，甜到入心。
 
「你真係好人。」我脫口而出，唔覺意就讚咗佢，搞到我都有啲面紅。
 
「傻啦，頭先好對唔住，我朋友講左啲咁過份嘅野。」佢剎時認真咁講。
 
其實我知，我知佢講緊咩，但我決定扮傻。
 
「下？你朋友講咗啲咩呀？」我扮唔知，大家都開心啲。
 


「你聽唔到呀？」小光皺眉頭問。
 
「聽唔到呀，我頭先唔小心又瞓咗陣，哈哈。」我尷尬地笑。
 
「咁算啦，你聽唔到就最好。」小光好似鬆左口氣咁。
 
「係呢…你好似唔係呢頭附近嘅學生喎？」小光拎起書包，準備離去，所以我都跟住拎埋野走，一齊走嘛嘻嘻。
 
小光揹住個白色Outdoor書包，上面掛住咗一個粉藍色貓公仔，唔係嗰隻無口怪物。
 


「係呀…我果頭啱我嘅時間已經full曬啦。」其實係我驚撞到熟人先去遠啲嘅地方。
 
不過估唔到佢會咁細心留意我，心中一陣竊喜。
 
「原來係咁。」小光笑住點下頭，推開左房門，出面兩隻寵物小精靈係度等緊佢。
 
依佢地嘅表情黎睇，係問『點解咁耐架？』。其厭惡、反感嘅表情簡直係做得淋漓盡致。
 
唔明點解佢地會做到朋友，明明性格上係南猿北轍。
 


同小光告別咗之後，我孤身走我路，下一次見面，又係一個星期後。

返學校嘅時候，再望一望自己學校啲女，無一個可以同小光比。
 
尤其是自己班上面嘅女，好極端。唔係男人婆四周走嚟走去，就係靜到乜咁女仔。
 
望住自己班上面啲女，只會令我更加想念小光。
 
可惜苦無小光嘅whatsapp，同唔到佢傾偈…
 
好！學呀楊話齋，夠鐘意就有辦法架啦。我實要拎到小光電話！
 
我抱住呢一種決心，無嘢可以阻到我。
 
又到左補習嘅時間，同樣嘅位置，同樣嘅時間。


 
好多人都嚟到，又係小光佢哋姍姍來遲。但係呢段時間，唔同嘅係，多左一份期待。
 
我時不時留意門口，期待打開門嘅一剎那，會係見到小光嘅身影，唔好要嗰兩隻超進化就好。
 
我差唔多每隔三至四分鐘就會望一望門口一次，我期待緊開門嗰隻「嗞…嗞…嗞」聲，咁樣我就知係佢。
 
難得我隔離同後面都無人，卻遲遲都唔嚟。
 
就嚟等到瞓著嘅時候，就係呢把「嗞、嗞」聲嘈醒咗我。
 
一打開門，只見小光開門走入嚟，超唔好意思咁閂門，然後急步行埋嚟，咩都無講就坐咗係我隔離。
 
由小光一坐低咗嗰一秒開始，我就緊張啦。
 


個人坐到直一直，雙手好規矩咁放係枱上面，個腦開始諗唔到嘢。
 
小光上氣唔接下氣，氣喘喘咁，實係啱啱跑嚟架啦。
 
我扮到好唔覺意咁望下小光，我扮架咋！瞄到佢額頭出曬大汗咁，身為一個體貼嘅男人，當然為佢準備好──紙巾。
 
我從書包拎左包紙巾，放係枱上面，伸長隻手遞俾小光。
 
小光見到後，臉上喜形於色，想收埋卻藏唔住嘅樣，好可愛。
 
「唔該。」小光笑住咁拎咗張紙巾出嚟，輕輕拭一拭額頭上既汗。
 
忽然間我有種衝動想去奶乾淨小光上面嘅汗水，一定好好味…
 
然後一路奶落去……


 
頂越諗越變態！