溝女的聖地──補習社: 7

佢每一下嘅動作都好吸引，舉止優雅大方。
 
小光察覺到有異樣，發現係我望住佢，於是就問：「做咩事呀？係咪我邊度污糟咗？」
 
「嗯…好似係，但呢度太黑睇唔清楚，你挨埋啲睇得清楚啲。」
 
我唔知痴左邊條線講啲咁發神經嘅嘢，個tone仲有啲周星馳feel。
 
點知佢又真係挨埋嚟，俾我望清楚啲。
 


佢一挨埋嚟，我好自然咁退後，一嚟嚇一嚇，二嚟無諗過佢會真係挨埋嚟。
 
「做咩事呀？」佢眼甘甘咁望住我。
 
小光身上散發住一股迷人嘅氣息，嗯無錯！係仙氣──香氣。
 
一股只屬於女仔嘅體香，清新得嚟唔會好似成熟女人咁俗氣，成熟女人嘅香氣係好濃郁撲鼻；而未經塵世污染嘅學生妹，係伴隨住清新花香味，淡淡地，令人上癮。
 
「無呀…只係有小小突然姐…」我老實講。
 


我已經無得退後，後面已經係牆，我同小光只係得返一隻手掌嘅距離，只要我向前郁，就會錫到佢。
 
希望呢個時候地震啦。
 
「咁係咪有嘢呀？」小光碌大隻眼，眨咗數下，電親我。
 
「Er…無呀，都係咁靚。」
 
小光紅都面曬，「口花花！都唔知係真唔係！」佢細細力打咗我一下大脾，唔痛，反而帶點溫柔。
 


「梗係啦，你點會唔靚。」我好細聲講。
 
「下？你啱啱講咩？」小光似乎聽唔到。

「無呀，無嘢。」我又扮曬蟹，「係呢，你嗰兩個fd呢？」
 
「佢地本身都諗住嚟補習，係我叫佢地嚟陪我嘅，跟住佢哋話呢度無咩好男人，就話唔嚟…」
 
小光嘆咗口氣，然後又自己精神返，「算啦，佢哋唔嚟我都要自己嚟架啦…」
 
「唔怕啦，有我陪你！」我好型咁拍曬心口。
 
「哈哈哈…」小光唔小心笑出聲，「你真係好傻呀！哈哈！」
 
好彩我地喺後面，唔算影響到前面認真學習嘅學生。


 
「係呢，你叫咩名？」小光突然問我。
 
「我叫陸秋水，朋友都叫我呀水。」
 
「哈哈哈，抽水？」小光嘅笑聲吸引到前排嘅目光，有幾個男仔仲眼甘甘咁望住佢。
 
小光立即用雙手摀住自己個咀，但都難掩佢嘅國色天香。
 
「唔係掛？你成日抽水架？」雖然佢問埋曬啲低B嘢，但咁樣都幾可愛呀。
 
「梗係唔係啦，我不嬲都唔會抽人水。」我好正經咁解釋。
 
「咁又係，睇你個樣都唔似。」小光終於停止佢嘅笑聲。
 


「係呢，咁你做咩名？」無理由佢知道我個名，我唔知佢架？
 
「我叫程雪，Kitty。」佢個名都幾襯佢呀，雪白嘅膚色，性格亦是如此。至於英文名，係有啲細路女嘅感覺，不過無所謂啦，都係咁得意嘻嘻。
 
「咁你有無Facebook 呀？」我打蛇隨棍上，「下次…補習可以一齊呀嘛。」
 
我感覺到自己把聲有啲顫抖…真係股起左好大勇氣架啦。