溝女的聖地──補習社: 5

果然，同上次一樣，佢地又係遲黎，又係無位，要坐係我後面。
 
只不過無咗嗰隻狗公，佢好似坐咗去前排獵食。
 
嗰一種雀躍，係好多嘢都俾唔到我嘅一種感覺。打機嘅興奮，只係簡單而短暫嘅快感。
 
而呢種，雖然唔係咩好大件事，但就係因為好微不足道，反而令你覺得係上天俾你嘅機會。
 
心中帶有一點甜，能夠俾我細細品嘗好耐架啦。
 


佢再一次見我，臉上帶點興奮，「咁啱嘅？又係你？」小光細細聲咁講，因為廢事怕嘈到其他專心聽書嘅人。
 
佢對住我笑容滿面，但相比起隔離嘅寵物小精靈就相差甚遠。嗰兩隻超進化係咁黑我面，都唔知邊度得罪佢地。
 
毒撚會仇視肥婆，唔係無道理架，因為毒撚成日都俾肥婆恰！
 
「係呀。」我怕怕地醜，搔搔頭，個人坐到直一直。
 
「你真係可愛。」佢似係發自內心咁讚我，但我知俾女仔讚你可愛，其實唔係啲咩咁值得高興嘅事。
 


「係呢？今日講到邊呀？」佢又用甜到漏嘅聲線問我。
 
「Er……講緊第11頁嘅立體。」我都估到又會問呢條，所以一早記住左個答案。
 
佢笑住咁答我，「唔該曬。」
 
博得姑娘紅顏一笑，此生又何憾？我心都融化了。
 
佢地3個一齊打開左第11頁，初初都無乜嘢，大家好專心咁樣聽書。
 


隔左一陣，我聽到水箭龜細細聲咁同小光講，「做咩要問佢呀？佢成個毒撚咁款，縮頭縮尾咁。」
 
唔知佢係咪咁On9以為我聽唔到啦，但我聽到真係無名火起之餘，個心仲係度淌血…就連肥婆都咁樣話我……
 
「佢好好人呀，我覺得佢幾好笑咁喎。」小光路見不平，拔刀相助。
 
我唔知佢係想挽回我面子先咁講，定係真心咁認為，但我聽落真係心頭一暖。
 
我係度呼籲在場所有人士，講多啲好聽嘅話無壞架，世界上要多返啲善意嘅謊言。

「唔係呢…你搵都搵個好啲嘅黎問呀。」奇異花附和道。
 
呢個奇異花就最仆街，講嘢就雷公咁大聲，方死人地聽唔到咁。
 
前排嘅人就聽唔到，但中間嘅人都望過黎後面。我瞬間用手托住個頭扮訓教，塊臉對住個牆，避過一劫。


 
「噓…！細聲啲啦，方死人聽唔到咩？」小光尷尷尬尬咁講。
 
兩隻超進化好似知道自己搞大咗，收曬爹唔敢出聲。
 
「問人野都要睇樣？依家係我地有求於人呀！」小光盡力壓低個聲線，但唔難聽得出佢嘅憤怒。
 
「好啦好啦。」兩件肥野終於識得死死地氣收埋把口。
 
我不禁對小光心生敬意，睇嚟小光除咗有樣貌之外，性格都咁唔話得…
 
課堂嘅最後，我忍受唔到睡魔嘅襲擊，瞓著咗。
 
直至到有人拍醒我，叫我起身…「起身啦。」
 


天籟之聲呼喚著我，美妙而動人，直叫人沉醉。
 
「起身啦…… 」我徐徐睜開雙眼，天使呀！
 
雪白嘅襯衫令我以為係天使既衣裳，天光板上嘅白色燈光令我以為身處天堂。
 
小光除左件深藍色嘅冷衫，只係著咗件白色襯衫，呢個誘惑真係不得了，雖然身材唔算出眾，亦唔似得AV咁成熟，但係嗰一種若隱若現最吊人胃口。
 
我吞一吞口水，望望四周，剩底一兩個人仲執緊嘢，原來已經落堂啦。
 
而其中執緊嘢嘅一個，係條狗公。佢執好曬嘢之後，就拖住佢隔離嗰條女走出房門口，沿途動作親暱，並向我投以勝利嘅目光。條女麻麻地，普通啦，但都可以一戰。
 
又多一條狗公成功溝走咗條女……
 
我係唔會俾狗公溝走小光架！！


 
呢一種決心使我燃燒起嚟，感覺真係幾青春。
 
「唔好意思呀， Sorry。」我抖擻一下精神，即刻彈左起身執嘢，將枱面所有嘢都掃曬入書包就算。
 
佢嗰兩隻小精靈唔見左，於是我好奇地問，「你嗰兩個朋友呢？」
 
我滿臉睡意，但努力堆起笑容。