溝女的聖地──補習社: 4

直到臨落堂，我本書都一樣停留係第3頁嘅Probability度。
 
我諗唔到咩好嘅開場白可以同佢傾下偈，就算只係同佢做個朋友都好呀……
 
我溝女同狗公溝女係有分別，佢地係真心想食左條女，我係真心想對條女好。
 
因為就係頭先，隻狗公已經好幾次成日跌野，唔係跌筆就係跌擦子膠。係佢烏低身執野嘅時候，順便𥄫女！呢一切嘅惡行我全部親眼目睹。
 
咁狗公嘅野我真係做唔出…
 


係臨走前望多佢一眼已經覺得好幸福……
 
小光同水箭龜奇異花一齊走，的確可以避到唔少狂風浪蝶嘅攻勢。試問如果係小光單拖嚟？佢應該出唔到呢個門口。
 
係補習社出返嚟，已經天黑，係返屋企嘅途中，我接到呀楊嘅電話。
 
「點呀！有無料到呀？」呀楊嘅一聲問候，倍感溫暖。
 
「有呀！好多狗公。」我如實地道。
 


「正常呀有狗公，好多人搵食架。」呀楊嘅正氣令我聯想起岩先既狗公…唔通呀楊…
 
「有無靚女？」這才是重點。
 
「無……」我點會話佢知真話，等我溝到再算。「有個幾唔錯既…」
 
「有無機？」
 
「唔知點入手呀，想同佢做下朋友仔先。」
 


「你平時點樣係學校撩女仔，係補習社咪點撩囉，俾啲信心！」想知佢係點樣溝到女…
 
「我就係平時喺學校撩唔到女呀嘛屌你！」我有點灰心喪志。
 
「扮下嘢，問佢借擦子膠，筆呀紙呀之類嘅，慢慢同佢多返接觸，慢慢就有計傾架啦。」唔知佢係邊度學返嚟，但聽落好似幾得。
 
「好啦，我盡量試下啦，唔該曬。」
 
「加油啦！」
 
草草了結左個電話，就返屋企做埋啲功課。
 
我生平第一次咁期待補習，因為一個禮拜先補一堂，姐係話我一個禮拜先見到佢一次！

雖然我依家連佢姓甚名誰都唔知，但已經對佢牽腸掛肚，茶飯不思。


 
呀楊都睇得出我嘅「愁」，「我之前都好似你咁架…」
 
「下？咁你點解決呀？」佢小息嘅時候走嚟搵我。
 
「自從我補多左一堂之後，就學識咗分散投資 ……」
 
頂你，我唔係想知呢啲嘢，我淨係想要佢咋！
 
「算啦，你唔明架啦。」我繼續我嘅頹廢，佢繼續佢嘅戀愛。
 
呢一個禮拜真係好難捱，好多時候都諗起佢。你想阻止自己唔好諗起佢？你越想阻止就越係做唔到。
 
只要…只要俾個Facebook名我，我就可以搵埋佢ig，至少我可以知道佢嘅資訊呀嘛。
 


我日等夜等，苦苦地等，終於都等到禮拜四放學。
 
我興奮咁同呀楊講，「我去補習啦，你去拍拖啦！」
 
「洗乜你講，快啲去啦！」
 
同上一次差唔多嘅時候到達補習社，我專登揀返同一個位，但唔知佢會唔會…
 
好緊張呀！好想佢坐係我後面。
 
時間一秒過去，啲人就一個個咁入嚟。