溝女的聖地──補習社: 3

綠藍色格仔裙加上深藍色冷衫，無錯啦，係聖乜乜女校嘅校服。
 
我由下面開始掃視上去，見其蘆山真面目。
 
中間嗰個女仔簡直係美若天仙！但企係佢側邊嗰兩個左右門神，係寵物小精靈。
 
水箭龜同奇異花。
 
咁中間應該係小光啦，雖然呢度燈光昏暗，加上我同佢地有些小距離，但我都感覺到，佢就係我嚟呢度嘅目的。
 


相遇唔係偶然，而係必然。
 
由於成個場都無位，係得返我後面呢幾個位。
 
兩件肥野一嚟到已經坐左四個位，嬌小玲瓏嘅名校女仔只好坐最埋邊（姐係我後面。）
 
靚女嘅隔離，總有一個肥婆，呢個係定律嚟。
 
我地級又係有一個好靚女嘅，成日痴住個肥婆度，久而久之，我地一眾男仔對嗰位靚女都無曬食欲，見靚女就要見埋件豬排……買一送二。
 


本來好專心聽緊書嘅我，成副心神已經飛咗去後面。
 
正當我係度盤算緊，應該點樣同後面個女仔傾計嘅時候，我感覺到後面有人用手指戳一戳我。
 
我好奇咁轉身望去，一對水汪汪嘅眼睛望住我，眨咗數次眼。
 
係嗰個靚女！依家仔細望一望，真係好靚。雖然環境昏暗，但都覺得好靚兼好正！
 
綁住一個唔長唔短，岩岩好到膊頭既馬尾，留住偶像劇般嘅斜陰，瓜子臉，靚得嚟俾人既感覺係好可愛！
 


靚係指個樣，可愛係指個性格。
 
係黑暗中，如一顆耀眼般嘅星星，會忍唔住望多幾眼。
 
「唔該，我想問下依家講到邊呀？」柔情似水嘅聲線，連我個耳仔都就黎融化，軟埋。
 
我呆咗幾秒先識得答佢，「呀…你等…等…我一陣，好…好快。」我緊張到口震震，講嘢唔清楚。
 
我睇一睇本書，正想拎轉頭答佢嘅時候，我隔離位嗰個男仔搶先我一步。
 
「依家講到本書嘅第3頁，Probability 嗰度。」嗰狗公唔理三七二十一，搶先過我答佢。
 
係呢一個弱肉強食嘅世界，遲咗少少已經無你份。你想食，人地都想食架咋。
 
你諗住憑個心就可以溝到女？人地靠個腦溝女架……


 
我估唔到會有咁嘅情況發生，又再一次呆咗。但從嗰位狗公嘅表情嚟睇，好輕鬆，駕輕就熟。
 
「唔好意思呀，」嗰個靚女對住狗公報以微笑，「我好似唔係問緊你。」
 
（暫時稱呼住小光先啦。）
 
我第三次呆咗。
 
一山還有一山高呀，道行高深嘅狗公都食左成面灰，睇嚟呢個女仔都非等閒之輩。
 
一時之間個狗公都諗唔到更好嘅對話回敬返佢，我心入面暗暗拍手叫好。
 
「不過都多謝你答我。」小光靦腆一笑。
 


算係俾返個落台階隻狗公，隻狗公亦識趣咁講返句，「唔洗客氣。」
 
小光溫和有善咁對我笑一笑，「我有咩唔知再問你啦。」
 
我超慢動作咁轉身，而我眼角嘅餘光並無離開過佢雙眸。深遂嘅瞳孔如有魔力般拉扯住我，一定係上天派黎嘅惡魔天使！
 
當我轉身聽書嘅時候，我隔離（狗公）就以兇惡嘅目光瞪著我，好似唔明白我點解會受到咁好嘅待遇。
 
狗公呀狗公，你都有今日啦！