「奇幻，純愛」《我，總是會愛上妳》: 合襯
魯路修：「咁，呢段時間真係麻煩哂你啦晨哥。」
Cherry：「要你幫呢個傻佬咁多，真係唔好意思呀晨哥。」
我：「哎，講呢D，大家咁多年朋友邊有得咁計，返去喇，開開心心咁過日子啦。」
魯路修：「當然啦，死過返生喎。我而家諗起先發現自己好似仲有好多野未做。」
「我而家都有少少想睇下呢個衰仔大個會變成點。唔想咁早…係囉你明我意思啦。」
Chase：「關你咩事啫，唔好再叫我衰仔呀。」
我：「哈哈，係囉其實Chase都幾乖仔吖，唔好再叫佢衰仔啦。」
魯路修：「慣左口嘛，佢係幾好既，幾有我心。呢隻手鐲我會一直戴住架啦。」
Chase：「嘖，只係一時興起先買黎送俾你咋，唔好過分解讀好無。」
Cherry：「好啦好啦，車到左喇，唔好要人地等同阻住晨哥啦。」
魯路修：「咁好啦我地走啦，我地再聯絡啦晨哥，啊仲有Proto Zero既事..」
我：「得啦，我仲搵緊佢。搵到佢我會第一時間通知你。」
之後，佢地四個就走左，我仲一直目送佢地既背影，直至佢地架車開走。
而家再睇返佢地真係好襯。佢地兩個手拖手，一人拖一個細路，場面溫馨又感人。
好啦，唔好再出咩事啦魯路修，幸福快樂咁過埋下半世人啦。
跟住就係…
下晝兩點，我去到Ada間Café。
原本我係打算上佢屋企，因為我以為Proto Zero佢會係個度，但Ada話我知原來Proto Zero係住係café度。
理由係乜Ada佢都話唔知，話Proto Zero非常堅持，只係會住係café。
佢唔明，但係我明。都只係可以講呢一句，佢果然係魯路修既複製人。
Ada：「晨哥，黎左嗱？佢係入面…」
我：「哦，唔洗咁急，反正我都未食飯，等我係度食左野先慢慢傾啦。」
Ada：「咁好喇，不過我唔知我呢度D野食岩唔岩你心水架喎。」
我：「哈哈，我會好好期待D野食架啦，你係呢度老闆，你幫我揸主意啦。」
Ada：「明白，咁你坐下或者行下先啦，好快就有得食架啦。」
我：「嗯，麻煩你啦。」
Ada佢之後就走左入廚房，我就係間café度閒遊。
Café只有我一個客人，所以我隨便行都唔會影響到其他客人。
嘛，上次黎既時候都無好好留意呢度既裝修，原來都幾靚，俾人既感覺幾舒服。
Proto Zero隻野都幾識揀地方吖。
一陣真係要好好同佢傾下先得。啊，即講即到。
我：「喂，企係度呀，鬼鬼祟祟咁做乜啫。」
點解我會咁講？因為我一轉身就見到Proto Zero輕手輕腳咁想走出門口。
Proto Zero：「晨哥…乜咁岩呀…」
我：「咩咁岩，我係專程黎搵你架，你好野吖，拜託左我咁多野之後居然敢偷偷地走左去？」
Proto Zero：「呃…唔好意思，因為我有預感佢地會…」
我：「嗯，我當然知道啦，坐低先啦，有好多野想同你傾。」
Proto Zero：「但係…」
我：「同一句野唔好要我講兩次，同我坐低。」
佢之後終於肯乖乖咁坐低，真係吖，一早咁我咪唔洗咁勞氣囉。
佢頭dup dup，好似一個做錯事面對老母既細路咁。
我：「喂。」
Proto Zero：「係！有乜事！！」
果然好似呢，反應都一樣咁濟。唔係，而家唔應該係諗呢d野既時候。而且呢d野我一早就知架啦，做乜而家又突然有感而發。
我：「做乜啫你，反應咁大，你做錯野咩而家。」
Proto Zero：「吓唔係..我以為你會鬧我添。」
我：「鬧你？你做錯乜要我鬧你呀先生。」
Proto Zero：「因為我偷偷咁走左囉。」
我：「唉你咁大個人鐘意去邊我管鬼到你咩，不過我係有少少擔心你既。你呢幾日身體點呀。」
Proto Zero：「呃，有時會突然間想嘔，成身無乜力咁囉。」
我：「咁我之前比你D藥呢，仲有幾多。」
佢無直接答我，而係係衫袋度拎左我之前交比佢既藥盒。
藥盒入面只係得番幾粒膠囊，十隻手指數得哂。
嗯…消耗既速度比想象中既快少少。
我：「咁你覺得D藥有無用？食完有無解決到問題？」
Proto Zero：「開頭都得既..不過近呢幾日開始無乜效，所以我都開始每次食兩粒咁。」
開始出現抗藥性添呀..
我一邊諗緊野一邊係衫袋拎野出黎。
無錯，我拎出黎既野都係藥盒。
我：「嗱，俾你既，差唔多食哂或者食完都仲係覺得自己好唔舒服就打俾我啦。」
「啊講起打俾我，呢個俾埋你，已經入左我電話入去架啦，SET左做晨。」
我一邊講一邊再係另一邊既衫袋度拎出一部電話俾佢。
我：「放心喇，我已經叫左Ellie著手研究點樣去…唔？」
我講講下停左，因為我察覺到佢既反應有D奇怪。
與其話反應奇怪，倒不如話佢對我講既野無反應，成個人呆左咁望住我放低俾佢既電話同藥盒。
我：「喂，你有無聽我講野？」
Proto Zero：「啊…有…」
我：「搞乜呀你，講緊正經野架。」
Proto Zero：「唔係，只係點解你要對我咁好，明明我既任務已經完成，你地大可以由我自生自滅…」
我：「白癡，我似D用完即棄既人咩。」
Proto Zero：「唔係…只係我其實又唔係真係魯路修，你會唔會投射左你平時對魯路修既態度落我度？」
我：「我好清楚你係邊個，你同我定。我要救你就要救，你理得我有乜動機。」
「而且，佢都好想你可以健健康康咁開心過生活。」
Proto Zero：「係啊…我都好似係第一次有人對我咁好，對真正既我好…」
呢番說話，明白一切來龍去脈既人聽落特別難受。
我開始明白點解當初魯路修會咁關心Proto Zero既心情，佢真係有先見之明。
我：「好喇，正經野都講左一半啦，你可唔可以話我知點解你會叫Ada收留你既，明明之前你已經叫左我送你走。」
Proto Zero：「其實…」
Ada：「要你等咁耐唔好意思，野食黎啦。」
嘖，黎得真係唔係時候。
Ada係我同Proto Zero中間放低左一碟意粉同一杯飲品。
Ada：「意粉係黑松露忌廉蘑菇意大利粉，飲品就係熱情果梳打。」
我：「嗯，賣相好好，聞落都好香，我估一定好好食。」
Ada：「哈哈，多謝喎，快D試下先講啦。」
「eh…你呢？你洗唔洗都食D野咁啊？」
呢句說話當然唔係同我講啦，同既係Proto Zero講。
Proto Zero：「呃..eh..」
面對Cherry以外既其他女人既態度都同魯路修一樣，猶豫不決。
我：「我地share食啦，Ada你可唔可以叫廚房整另一款意粉或者其他野食？」
Ada：「當然可以啦，我而家就去。」
咁就駛走左佢。
Proto Zero：「呃，唔該你。」
我：「小事啫，快D話我知點解你會叫Ada收留你。」
Proto Zero：「哦..其實我自己都唔知，我係醫院個陣都有好多魯路修既朋友黎探我，但係當我見到佢既時候，唔知點解個腦就有呢個諗法。」
「開頭我都係打算自己一個遠走高飛架。但見到佢，唔知點解就想倚靠佢。」
我：「原來係咁。」
Proto Zero：「吓？你話原來係咁…？你知道點解我會咁做？」
我：「因為Ada係你最徬徨無助個陣開解過你囉。你就因為咁記住左，到你再見到佢既時候，你咪想再倚靠佢囉。」
Proto Zero：「我好似明你講乜，但又唔係好明咁。」
我：「嘛，我都預左，不過Ada其實都算係一個好女仔，你打算點做？」
「你想點同佢解釋？」
Proto Zero：「吓…點解釋我都仲明白，但你話咩佢都算係一個好女仔，我打算點做又係咩意思…」
唉，呢條友真係遲鈍到一個地步。
我：「你自己都話你既任務已完成，咁你有無諗下你自己既將來？」
「有無打算搵個人一齊行落去？你應該都知道..」
Proto Zero：「晨哥，你咁講即係又要我去用佢既身份去過活？」
佢咁樣講一講我先記起問題所在之處。
就算佢向Ada坦白講出一切，之後再同Ada一齊都好，都好難避免到Ada會以對魯路修既態度對待佢。
我明白點解佢咩都唔肯同Ada講啦。
不過咁樣落去始終唔係一個辦法，日子耐左點都要面對。無可能一直咁蒙混落去。
唯一既選擇就只有…但咁做對佢又未免太殘忍…
我：「咁你想點？真係打算走？去個無人識你既地方？」
Proto Zero：「哈…與其話去個無人識我既地方，倒不如話係去個無人識魯路修既地方仲好啦。」
字裏行間充滿傷感。但佢既表情仍然好平靜。
Proto Zero：「我都唔知呀，我自己到底想點我已經唔知啦，我明明想走，但我居然又叫Ada收留我。」
「明明咁做係好有可能見到佢地，我到底係度做乜…」
聽到我都有少少心痛。
Proto Zero：「不過晨哥你提醒左我，岩，要同佢講清楚，呃佢始終唔岩。」
我有唔好既預感。佢好似有d唔妥。
Ada：「黎啦黎啦，今次我叫左廚房整左兩款，一款係大蝦忌廉扁意粉，一款係蒜香煙肉意粉~」
偏偏又係呢個時候黎？廚房你係咪有心同我過唔去？
唔好做傻事呀Proto Zero，而家唔係一個好時候呀，至少都等我黎講啦，我可以處理。
係Ada上菜既期間，我一直向Proto Zero打眼色，但都無用。佢根本收唔到，佢一直都望住Ada。
Ada：「好啦，我地三個一齊share食啦，試下我地既出品啦。」
佢一邊講一邊拉張櫈過黎，之後就開始自己係度分意粉。
我地咩都無講，只係係度等。
等D乜？可能係等Ada分好D意粉，又或者等其中一個開口啦。
總言之，敵不動就我不動。咁先係萬全之策。
Ada：「每人三碟仔，我唔客氣啦。」
我：「好，我都期待左好耐。」
就係我拎起左隻叉，準備圈起一小撮個碟黑松露忌廉蘑菇意大利粉既時候，Proto Zero突然開口。
Proto Zero：「係食之前，我有D野想同你講。」
其實係佢句野講到一半既時候我就已經作出反應，打算㩒住佢，但結果俾人㩒住既人卻係我。
Ada用手擋左係我面前。
Ada：「你講啦。」
Proto Zero呆左一呆，之後又繼續講落去。
Proto Zero：「呃左你咁耐唔好意思，其實我唔係魯路修。」
「滴答，滴答，滴答」
大家再次沉默，café靜到可以聽到吊鐘既聲音。
要即刻諗下點解釋啦，話Proto Zero係我專登搵返黎扮魯路修既人？唔得，太牽強。
唯一既選擇就真係只有全盤托出，不過風險真係好大，如果複製人既事傳左出去…
Ada：「我一早就知啦。」
！？
Ada：「魯路修就只係得一個，而晨哥又幫果一個咁鋪張搞Party，咁即係你唔係魯路修啦。」
佢尋日唔係咁同我講架？
我：「Ada咁你尋日又…」
Ada：「唔好意思呀晨哥，借左你過橋，因為我覺得你可以令佢自己講出黎，所以先咁同你講，真係唔好意思。」
我：「唉，估唔到我都會有咁俾人呃既一日。」
Ada：「哈哈，所以我咪話左唔好意思囉。」
Proto Zero：「咁你明知我唔係魯路修都仲收留我唔趕我走..？」
呢個問題我都想問。
Ada：「um…我都唔知呀，不過我見到你個個頽廢既樣就放心唔落喇。」
「你既然同得我求助，叫我收留你，咁即係話你可能真係無其他地方可以去，如果我趕你走，你又可以去邊？訓街？」
「而且我仲見你有食藥，咁即係話你身體應該有D事啦，一個有病而又無處可去既人，我邊可以趕你走？所以我咪繼續收留你囉。」
大家都靜左落黎。
唔係，唔可以完全話靜左落黎，因為有個人喊緊。
Proto Zero喊緊。
Proto Zero：「點解要對我咁好…明明我唔係個個你鐘意過既人…」
「我只係一個不被需要既人…一個只係為左少少事而誕..而存在既人..」
Ada：「點會不被需要呢，一定唔會既。而我咁對你，同魯路修一D關係都無架。」
「只係因為我想幫你啫。」
聽到Ada咁講，Proto Zero喊得更加大聲。
可能係因為佢終於感覺到有人對真正既佢好啦。
Ada：「反正你都開左個頭咯，不如講埋落去？」
Proto Zero並無即刻答Ada，而係先望住我，好似係度等我指示咁。
而家先向我尋求指示有乜用，你都已經講左出黎啦。
我：「算喇，你都講左咁多咯，繼續講埋佢啦，唔需要再隱瞞D乜。」
聽到我咁講，Proto Zero先開始一五一十咁講佢既故事出黎。
由於佢既經歷比較多比較複雜，加上佢講既時候又夾雜左個人既感情描述，所以所費既時間比較多。
反正已經無野需要隱瞞，所以我選擇唔理佢地既交談，自己先享受D食物。
嘛，ok喎D野食，三款意粉都幾好食，我幾欣賞個黑松露忌廉蘑菇意大利粉，好香。
我突然都想開返間餐廳，可以招待下朋友屋企人，等大家可以有個地方聚下，飲下酒食下飯傾下計，諗起都寫意。
「嘭！」
邊個拍檯。居然夠膽係我面前拍檯，好大膽啊。
我放低手上既叉，終於將目光放返係佢地度。
哦？Proto Zero你講左D乜？居然可以搞到平時好少會嬲既Ada嬲到七情上面？
Ada：「晨哥！」
我：「咩事。」
Ada：「點解你會應承魯路修呢個咁過份既要求！」
「咩野叫做幫佢照顧住Cherry？咁而家佢可以點？你地當人係即棄餐具？」
「點解你地可以因為一d咁自私既理由就擅自去創造一個生命出黎？」
哦，我而家有個諗法喇。一個可以令Ada接受呢一切既方法。
我：「嗯，我地的確好自私。魯路修同我都知道呢一點，所以我地而家先盡我地既可能去幫佢，希望佢可以幸福快樂咁生活落去。」
「如果係你，又可唔可以令佢開心生活？令佢唔再活係魯路修既影子下？」
Ada：「我可以！」
呢三個字響徹成間Café。
我：「哈哈，非常好非常好，你聽到啦Proto Zero，佢會俾幸福你架。」
Ada：「呀！我..我唔係個個意思，我意思係..呀！晨哥！！」
Ada好似明白到我既真正意思，塊臉開始紅起上黎。不過今次係怕羞既紅。
我：「Proto Zero就交俾你啦Ada。」
Ada：「好啦…」
Proto Zero：「其實可以唔洗勉強…真係無必要為左我..」
Ada：「你咁講係咪即係唔想留係我呢度呀？」
Proto Zero：「唔係，我唔係咁既意思，只係..」
Ada：「唔係就得啦。以後就等我帶住你啦。」
見到佢地咁樣既互動，我忍唔住笑左一下。
其實佢地都幾襯吖，從各方面黎睇都。
咁樣的話，大家都可以幸福啦掛。
魯路修，咁樣你就可以安心啦？
屌，真係好攰...
咁樣所有野都可以完美地結束啦掛...