「奇幻，純愛」《我，總是會愛上妳》: 中止
我：「唷兩位，Party等緊你地開始呀。」
魯路修同Cherry兩個見到呢片㬌象之後都呆左係度，嘛佢地會有咁既反應我都預左。
去完沙灘拍拖返黎間屋就多左咁多人，一般人都會嚇親啦。
魯路修：「喂晨哥呢D係…」
我：「你既康復party囉。大家都好擔心你。」
呢句說話一半係真，一半係假啦，其實呢個party亦都係魯路修既生日party。
不過對Jason佢地當然話係康復party啦。因為生日Party對佢地黎講已經搞左。
Proto Zero既事都係唔好俾佢地知好D，免得有乜麻煩。
始終佢既事都係愈少人知愈好。
講開又講…
我：「你想抱住芷晴抱到幾時？你唔攰架咩？」
魯路修：「啊係喎，你講起我先覺攰添哈哈。」
佢一邊講一邊放低Cherry，Cherry落左地之後仲打左佢心口一下，大家見到咁都笑左出黎。
我：「好啦咁事不宜遲，大家開始啦。」
大家：「好！」
同上次一樣，大家都係圍住魯路修係度把酒當歌，談天說地咁。
而魯路修既反應都相當正面，同Jason佢地玩得好顛啦。
嗯，大家都咁開心就夠了。
阿明：「晨哥。」
我：「阿明？有咩事。」
阿明：「無乜特別既，只係Ellie有野想同你商量，叫我請你入去傾啫，話呢度唔係好方便。」
啊係想搵我傾個件事，係喇，都係時候要處理下，搞埋D手尾佢。
我跟住阿明，走到去屋既地下室，呢度放滿哂醫療用既器材。
呢D野原本係放滿係全屋既，不過而家已經用唔著，加上又要開party，俾佢地見到呢d野就唔好啦，所以我先收埋哂佢。
我：「點呀Ellie，阿明話你有事想搵我商量，係咪關於細胞既事？」
Ellie：「嗯，同埋我想同你傾下關於處理呢D野既事…」
Ellie一邊講一邊慢慢行開，展示俾我睇一直放係佢後方張檯上面既野。
檯上面放既係一個個樽，而樽入面既係一個又一個器官。
無錯，呢D全部都係為魯路修做既器官，之前為左縮短實驗時間所以係同一時間用唔同既協議排序做左一堆出黎。
估唔到仲有一批係無出現排斥反應。
我：「呢D都係用beta verison整既？」
Ellie：「正確D黎講應該係beta 0.3，，用既排序同beta有少少唔同。」
我：「哦，咁你仲有無對呢幾個做觀察？」
Ellie：「有啊，因為呢幾款係完全無用到魯路修先生既細胞去製造，所以我係特別留意佢地。」
「呢幾款係輸入左生物協議成型做器官之後完全無出現之前既排斥同自我分解既情況，可以話係完成品。」
完成品呀。不過而家都無用啦，因為移植去魯路修身體既器官情況都已經穩定落黎啦。
Ellie：「晨哥，呢d器官應該點處理好？就算係用呢款培養液都無可能永久保存…」
我：「咁呀，反正而家都無用，銷毀左佢地啦，留低數據同記錄做記錄就可以啦。」
Ellie：「明白喇，講起數據記錄，Proto Zero之前既身體狀況我已經做左記錄同分析，以便…」
我：「唔可以，呢項實驗要中止。」
Ellie：「吓？」
我：「我地以後都唔會再做複製人，我應承左佢。」
「係啦Ellie，我想你用呢份記錄去諗辦法根絕Proto Zero體內既分解情況。」
Ellie：「只不過Proto Zero既情況唔同，佢體內已經鎖死左細胞既排序，要改變的話會好大風險…」
「而且要做到你既要求的話就可能需要長時間既注射或者食藥…」
我：「唔緊要，最重要係有用。」
Ellie：「咁我明白啦，我今晚就返去著手研究，一陣我就會帶哂呢D設備返去研究所架啦。」
我：「咁又唔洗咁趕，至少享受埋今晚呢個party先啦，難得大家咁開心。」
Ellie：「之但係…」
阿明：「晨哥講得岩，享受下先啦，你成日逼到自己咁緊我好心痛架你知唔知。」
Ellie：「咁好喇..」
阿明氹女真係有一手，唔怪得佢可以享齊人之福啦。
好喇，之後就係搵Proto Zero出黎，計下日子之前俾佢既藥佢都應該差唔多食哂…
一定要儘快搵到佢出黎…
我一直係度諗呢件事，搞到Party個陣一直心不在焉，人地拍我個陣我仲幾乎倒瀉杯酒。
拍我既人係Ada。
我：「咩事呢靚女。」
Ada：「呃…點講好呢。」
我：「大家識左咁多年，有咩唔怕講喎。」
我講完就飲左啖酒。
斷估你唔會好似某個白癡咁叫我幫你做個複製人掛。
Ada：「另一個魯路修係我度…」
酒都幾乎噴左出黎，好彩無失禮。
佢知道左Proto Zero既事？有必要好好問清楚佢，睇下佢到底知道幾多先。
我：「另一個魯路修？我唔係好明你講乜喎，魯路修邊有兩個呀。」
Ada：「呃…點講好呢，我其實早幾日去過醫院探魯路修。」
「佢突然求我叫我收留佢，話唔想見到Cherry，我估佢可能只係一時諗唔通，唔想面對Cherry住，大家又咁多年朋友，所以我咪收留左佢。」
「不過前日我居然收到你既message話要同魯路修搞咩出院party，我覺得好奇怪…」
「明明我收埋左佢，你地仲點幫佢搞出院Party？」
哦，原來件事係咁，問埋佢睇下Proto Zero有無同佢講D乜先。
我：「咁…你收埋個個魯路修有無同你講D乜？」
Ada：「無啊，我都試過問佢幾次，但佢咩都唔肯講，仲話如果我再問的話佢就會走人。」
唔？Proto Zero咩都唔肯講？我仲以為佢會搵人講哂自己既事添。
Ada：「晨哥，到底邊個先係真既魯路修？我真係好混亂…」
係喎，咁不如將Proto Zero交比Ada照顧？反正Ada…
咁對Proto Zero黎講可能都係一件好事，起碼佢可以有人照顧。
不過到底要佢以魯路修既身份定係用佢自己既身份俾Ada照顧呢。
呢樣野唔輪到我決定，都係留俾佢自己決定啦。
佢想點做都好，我都係要見左佢先。
我：「件事比較複雜，我遲D同你解釋。係同你解釋件事之前，我想見下佢。聽日你方唔方便？」
唔知係因為今日太高興定係一時諗唔到，我當下居然意識唔到自己其實只有一個選擇。
唔係，正確黎講係我地連選擇都無，只可以被現實吞沒。