「奇幻，純愛」《我，總是會愛上妳》: 未來
我：「唷Ada…Hello…」
屌，聽到佢咁既開場白我就不自覺咁驚起上黎。
Ada：「Hello？你居然夠膽咁輕鬆…
」佢既說話只係講到一半就停左，被人打斷左。而打斷佢說話既人正正就係Proto Zero。
Proto Zero咩都無講，只係輕輕咁拍左Ada膊頭一下，搖一搖頭。
簡單既兩個舉動，Ada既態度就馬上軟化，無再出聲，表情亦無好似頭先咁惡。
Proto Zero亦係呢個時候行左上前，仲伸左隻手出黎，想同我握手。
我望住佢隻手，唔知點解無即刻作出反應，而係呆左係度。
Cherry：「魯路修~
」哎我知道喇，只係一時分左神啫，我咁大個人唔洗你教我禮貌。
我伸出手，好好咁同Proto Zero握左一下手。
我：「終俾我見到你，我地好耐無見啦Proto Zero。」
Proto Zero：「哈哈，咁講好似有點gay，同埋呢…」
Ada：「佢而家唔叫Proto Zero喇。」
哦？改左名？
我：「係啊？咁敢問大俠尊姓大名？」
Proto Zero：「呃，而家我叫阿新喎，佢話既。」
佢用一個好似有點勉強既表情講，仲用手指向Ada。睇得出佢好似唔多滿意呢個名。
Ada：「咩呀阿新唔好咩，新代表新人生嘛。」
我：「嘛…幾好既，唔錯唔錯。
」仆街，我都差d忍唔住笑。
Proto Zero：「算喇你地都係叫返我做Proto Zero啦，反正我都要一個英文名。
」Ada：「喂。
」見到佢地兩個咁樣打情罵俏，我覺得好開心，好似終於可以放低一塊心頭大石咁。
但都只係「好似可以」，我同Cherry最大既憂慮都仲未解決。
一陣要小心D探下佢地口風先得。
Proto Zero：「啊，係啊，有樣野之前無交返比你…
」佢一邊講一邊摷衫袋，好似係度搵緊D野咁。
「呢個。」
佢最後拎左一隻手鐲出黎，交到我手中。
我望望隻手鐲，發現上面刻有「lulu，Cherry，Chase，Nicole」四個名。
呢隻手鐲係…
Proto Zero：「呢隻係之前你生日個陣Cherry佢地打算送比你既生日禮物，但係因為當時…」
佢講到一半就無再講落去，不過唔緊要啦，都無需要講哂成句野，我明白佢既意思。
「對唔住。」
巧合地，我地一齊講左呢三個字出黎。
我地互相對望左一下，之後係度大笑。
晨哥：「有乜咁好笑呀兩位？
」What the fuck！？晨哥幾時係度架？
晨哥一副悠閒表情咁同阿欣一齊出現係Proto Zero佢地後面。
晨哥：「黎遲左少少唔好意思，我地開始啦。」
晨哥既領導力真係與生俱來，佢一句說話大家都即刻坐低，無人敢講其他野。
晨哥：「嘛，首先俾左呢兩樣野你先喇。」
晨哥將佢一直拎係手既銀色手提箱放上檯面，仲打開左佢，拎左兩樣野出黎。
一樣係passport，另一樣係身份證。
呢兩樣野好快交到去Proto Zero手上，Proto Zero拎住佢地，望到成個人入哂神。
我諗唔係Ada拍佢佢既魂魄都唔會咁快返到黎。
Proto Zero：「唔該你啊晨哥。不過你係點樣搞到手…」
晨哥：「傻啦洗乜唔該，點搞返黎？嘛呢個真係有少少麻煩，用左我唔少關係。」
「但都唔重要啦，搞掂就得啦。」
屌，睇你個得戚樣。
我偷偷咁係側邊望下晨哥個箱，想話睇下入面會唔會仲有乜野，點知入面居然乜都無。
我：「晨哥，咁大個箱就只係裝呢兩樣野？」
晨哥：「係呀，個箱係咪好型？」
唉真係無你收…
Ada：「身份證同passport，咁回鄉証呢？」
Ada講完之後晨哥都愣左一愣。
晨哥：「嘛…要申請回鄕証好容易啫，自己搞啦呢D。」
「好喇，會面我就安排好啦，你地有乜就傾啦，阿欣。」
阿欣：「Cherry，Ada，我地過去個邊啦，等佢地三個自己傾。」
Ada：「吓不過…」
Cherry：「無事既無事既，我地過去啦。」
Cherry半推半就咁帶走左Ada，佢臨走之前仲同我打左個眼色，好似叫我加油咁。
嘛，你都要加油啦。
張檯而家得返我地三個。氣氛有少少尷尬。
女仔個邊好快就傳黎笑聲，但我地呢邊卻鴉雀無聲。
先唔提晨哥啦，呢條友既姿態完全就乜都唔關我事咁坐係度。
屌點算好呢…
就係我苦惱既時候，Proto Zero咳左兩聲。
亦因為呢兩下咳，我諗起晨哥之前同我講過有關Proto Zero既情況。
我：「你既身體..最近點呀？」
Proto Zero：「無乜野既…都係咁啦，晨哥都應該有同你講架。」
晨哥：「唔？有啊我有同佢講，放心啦魯路修，我有俾藥Proto Zero食，Ellie都做緊野。」
晨哥講得咁輕鬆，但卻搞到我個心更難受。
我：「Proto Zero，真係好對唔住，如果唔係我你就唔洗受咁多苦。」
終於，我終於將心底話講左出黎。
Proto Zero：「點會呢…我從來都無怪過你..我反而仲覺得係我對你唔住…」
又係咁，雙方互相道歉使得氣氛再次尷尬起來，大家又回歸沉默。
唔知晨哥係咪睇唔過眼呢個情況，佢終於主動干涉。
晨哥：「魯路修，你講先。」
我：「呃…點講好呢…死喇你咁講一講我反而唔知係邊講起好添。」
晨哥：「咪咁婆婆媽媽啦好無？有乜想講就講啦，你唔係因為咁先叫我安排今次會面架咩。」
我：「得啦我知道喇，唔洗咁惡既。」
痴線點解我過左咁多年仲要俾佢咁樣鬧？
我：「Proto Zero，如果唔係我一時既自私既決定，你就唔洗有一段咁痛苦既經歷。」
「俾左咁多野你，但轉個頭就收返哂，我真係覺得好唔好意思… 」
Proto Zero：「痛苦既經歷..啊？」
唔？
Proto Zero：「都唔算全部都係痛苦既，起碼我都有開心既時候吖。」
「代替你照顧Cherry佢地既呢段時間，儘管有時候我會覺得自己唔知點做好，好迷惘，但好多時候都係開心。」
「雖然係以你既身份去開心，但都算係開心吖。」
「而且如果唔係有你，我根本連體驗呢D感覺既機會都唔會有。」
「所以，唔好咁自責啦，要道歉既人應該係我先岩。」
我：「係喎其實點解你要道歉？」
Proto Zero：「呃…我呢，屌點講好呢，我覺得自己違反左當初應承你既野。」
「你叫我代替你去照顧住Cherry先，但我好似有少少少少鐘意左佢…」
「同佢仲有Chase Nicole一齊生活既日子，真係好開心，我甚至有過取代你既諗法…」
「不過而家無架啦！無架啦！你信我啦！」
佢用一個好慌張既語氣收尾，我同晨哥都無即刻回應佢，又陷入左deadair了。
嘛，點應佢好呢…呢件事黎講我其實又真係無怪佢既，因為我…
晨哥：「哈哈哈哈哈！有趣有趣！」
晨哥突然間大笑，嚇左我地一跳。
晨哥：「所有野都如你所料呢魯路修。」
啊，係啊。
我：「果然係我的話，就會愛上佢啊…」
聽到我咁講，佢愣左一愣。
Proto Zero：「你咁係咩意思…？」
我：「啊，抱歉我好似又用錯字，我唔應該用我呢個名詞。」
「我好早已經覺得你會鐘意佢，所以先咁放心將佢交比你照顧。」
「對唔住呀Proto Zero。我再一次誠心咁向你道歉。」
我向佢低頭以示我既歉意。
其實有乜根據？我自己都唔知，可能係直覺，又可能只係我既中二病啦。
我一直相信體內有我既細胞同有我記憶既佢一定會鐘意Cherry，畢竟…
畢竟Cherry佔據左我既半生記憶同我既一切嘛。就算只係我既複製人都好，呢份強烈既感覺一定會刻寫入佢既心入面。
只要同Cherry相遇，佢就一定會愛上Cherry。我係如此確相。
咁諗返成件事，其實我都幾賤，利用左佢既感情去達成我既目標。
Proto Zero：「係啊，所有野一早都比你估到哂呀…」
我：「真係對唔住，你要打我的話我都唔會還手。」
Proto Zero：「屌咁早知我一開始就唔洗咁煩惱啦。」
佢一邊講一邊拍自己個頭。
Proto Zero：「不過無所謂啦，反正而家你都返左黎咯。我地當打和啦。」
「照顧佢地既責任就交俾你啦，真正既魯路修。」
我：「真係可以當打和？我咁樣利用你你真係唔介意？」
Proto Zero：「少少喇，不過有個人叫我唔好再執著於過去喎。」
佢講既時候望左過去Ada佢地個邊，眼神仲相當情深。
原來係咁，咁我就放心喇，起初我仲怕…
Proto Zero：「我都開始放眼未來喇，唔會再諗返呢件事架啦，所以你都唔好咁執著啦，好好照顧佢地仲好。」
「呢兩樣野，應該係象徵著我既新開始。」
佢一邊講一邊拎出頭先晨哥俾佢既passport同身份證，自己係度望。
晨哥：「未來，仲有新開始呀？講得好！」
「你兩個都肯定會有個美好將來！我地為呢個美好將來預早慶祝先！」
晨哥唔知係邊度拎左支一睇就知係貴野既紅酒出黎，三兩下手勢就開左仲斟左三杯出黎。
我已經唔想再吐糟佢係邊度拎支紅酒出黎了。習慣了。
晨哥：「飲杯！」
最後舉杯既人就只有晨哥一個。
「你唔準飲呀！」
Cherry同Ada聽到飲杯兩隻字就即刻衝左埋黎，搶走左我同Proto Zero既酒杯。
呢個埸面都唔知係好嬲定好笑了。
不過，聽到Proto Zero佢咁講，我都覺得自己係時候要放低呢件事，向前行喇。
呢三個月以來既事，總算可以告一段落啦掛？
而家再一次回想成件事，心情仍然係複雜，仲係唔知自己下過既決定係岩定係錯。
不過，係時候走向未來喇，唔應該再停留了。
Proto Zero，唔係..應該叫你阿新先岩。
祝你地幸福。