「奇幻，純愛」《我，總是會愛上妳》: 故事
嘛，將回憶當故事咁寫出黎，原來另有一番感覺。
麻煩啦，自己睇返都喊添。今日都係去到呢度啦，唔好再寫啦。
晨哥：「係度搞咩呀你，一日到黑都係度用電腦。」
我：「嘛，見無聊自己又有精神，咪上網寫下故囉。」
晨哥：「寫故？寫咩故咁巴閉呀大作家，個故叫咩名？等我又追下故先。」
我：「哦，個故叫「我想要你，仲有你既世界。」，希望我唔洗爛尾啦。」
晨哥：「喂你…」
我：「無野，我只係怕我懶得濟唔寫落去啫，無野我信你既。」
晨哥：「嘛，你識正面思考就好，美星姐話佢一陣會黎探你，我返過去搵Ellie先。」
美星又黎？咁麻煩架，佢係咪真係咁得閒？唔洗返café架？
我：「嗯，我唔阻你啦。」
晨哥走左之後間房又得我自己一個，反正又要等美星，再寫多陣文好了。
啊，如果而家有杯紅茶飲下就好了，日日都只係可以飲水同維他命c真係好悶。
好多野想食呀真係…唔知有無機會再食到呢…尤其係Cherry煮既卡邦尼意粉…
「喂，帶左D野食黎探你呀。」
咦，美星把聲喎，咁快黎左啦。
佢話帶左野食黎探我？正喎。
我：「唷乜咁客氣啊，有無紅茶？我想…哇屌！！點解你地！！
」我之所以突然咁大反應，係因為美星並唔係一個人黎。
佢帶左老豆老母黎。
屌…除左Cherry，我最唔想就係比兩老知道…
老豆：「係幾時既事。」
仆街..佢黎料喇...
我：「唷，乜你地都知道左啊..」
老豆：「我係問你，你搞成咁係幾時既事。」
我：「得喇得喇，我話你知啦得未？我搞成咁你都仲要咁對我。
」「係幾時呢，我都唔係記得好清楚了，好似差唔多一年前左右到喇，我見自己成日都好似唔係好舒服，咪走去check下囉。」
「之後就發現左咁啦哈哈。」
老母：「點解咁嚴重既事你仲可以講得咁輕鬆..？點解你發現左唔第一時間通知我地。」
我：「因為…」
老豆：「因為唔想Cherry擔心，係咪？」
唉，真係好怕面對老豆，咩佢都知道咁，但佢又要我講喎，感覺真係超級麻煩。
但始終都係老豆，唯有死忍啦。我都係人老豆既而家，已經唔想串自己老豆，怕有報應。
我：「嗯，同埋就算話俾你地知都無用，根本無辦法醫，不過而家就唔同講法，所以我先話俾美星知。」
我講個陣突登啤左美星一下，因為我無諗過佢會話俾老豆老母知，搞到佢地返左黎香港。
美星：「喂唔好咁啤我啦，我唔可以對老豆老母講大話架嘛，放心啦我真係無話俾Cherry佢地知，嗱Chase知唔知我就唔清楚。」
「你知啦，你個仔特別醒架嘛。」
啊，係喎佢唔知Chase已經黎過，算啦都係唔好講，廢事煩。
我：「你係先好，有無紅茶呀，整啖黎飲下啦。」
我開口都未夠三秒，老母已經遞左一杯埋黎，搞到我幾唔好意思。
不過令我估唔到既係，美星居然帶左卡邦尼意粉黎，我見到已經即刻流哂口水。
但一食落去，成個人頓時大失所望。
可能因為期望太大，所以反差先更大。
美星：「哎，我知無Cherry煮既咁好食，但都俾下臉好喎，本小姐知你鍾意卡邦尼意粉我先煮架喎。
」我：「多謝囉咁，多謝埋你帶老豆老母黎。
」美星：「你真係好小器。
」我：「大家咁話。
」老豆：「你個替身，扮得你好似。如果唔係美星話我知，我估我都會以為個個係你本人。」
係我同美星鬥嘴既時候，老豆突然插嘴，拉哂我地既注意過去佢度。
「佢而家同Cherry一齊好開心，好似你之前同Cherry既咁。」
老母：「喂Daddy..
」我：「嗯，我知道。
」老豆：「你話你知道？」
我：「嘛…叫做感覺到囉，畢竟果個都可以叫做係我黎吖嘛，我同Cherry一齊梗係開心架。
」老豆：「傻仔，想喊就喊啦做乜要忍啫，阿爸阿媽都係度，放心喊啦。
」佢一邊講一邊走埋黎坐係我床邊，仲向我伸出雙臂。
果然佢可以睇穿我…
我見到佢咁就忍唔住，衝左入去佢懷抱裏。
放聲痛哭。
我真係好憎佢，憎到佢爆。
明明我已經收得咁埋， 點解佢係都要挖出黎。我以為自己可以忍住唔係佢地面前喊架嘛。
可惡呀，點解我咁渣架。連忍喊都做唔到。
老豆：「你忍得已經夠耐啦，已經夠啦，唔洗再一個人承受架啦。」
「係我地呢d屋企人面前，根本唔需要強顏歡笑。」
「你係我個仔，你諗乜野我又點會唔知呢。」
屌…唔好再講啦好唔好呀。
其實佢講得一D都無錯，我係忍左好耐，甚至差d連自己都呃埋。
我對住佢地總係笑笑口，因為我唔想佢地擔心。不過我自己好清楚事實。
事實就係我咩都做唔到，只可以聽天由命，睇下趕唔趕得切。
當然，呢d說話點可以同晨哥講，講左咪只會令人唔好受。
最後我都係自己一個受哂，嘛，呢個本來就係我自己既事，自己面對返都係岩。
而家諗返，可能亦係因為我心入面覺得自己未必可以救得返，所以先會寫果個故啦。
用黎記低我同Cherry發生過既一切。
嘛，不過而家咁樣，我已經唔係自己一個面對，感覺好似舒服左。
老豆：「相信老豆，你一定可以好返既，之後就可以返去搵Cherry。」
我：「嗯…」
老豆：「所以你想攬到幾時？兩個男人咁好核突。」
屌，仆街，食屎啦。
我推開左佢，擦一擦眼淚，發現佢地三個都笑住咁望住我。
我：「做..做乜呀咁樣望住我。」
美星：「喊完個人有無好返d呀？」
我：「咩呀，我邊有喊啫。」
美星：「唔知頭先邊個成個人撲埋去老豆度喊呢。」
我：「你！咳咳！！
」仆街，一時激動得濟添。
老母：「哎，你兩姐弟到呢d時候仲玩，美星快D幫手執魯路修d野啦。」
我：「點解執我d野呀？大哥我仲未死架喎！！」
我見到老豆仲有美星唔知咩事開始係度幫我pack野，搞到我好愕然，唔知點好。
老母：「又亂講野！
我地接你走呀！ 」我：「接我走？去邊呀我仲未…」
美星：「接你去第二度休養呀on9仔。
」去第二度..？