「奇幻，純愛」《我，總是會愛上妳》: 傻瓜

呢個傻佬，煮碗麵比佢食佢就開心返，早知我就唔洗麻煩Jason佢地啦。

不過可以見到佢笑返，咁就已經夠啦。

咁搞到我都好似一個傻瓜咁添。

一個傻瓜去氹另一個傻瓜開心，都唔錯啦。

家長日之後就已經係暑假，兩隻野都唔需要返學，日日係屋企痴住個傻仔lulu。





而我？我要返工架，邊好似兩個細路咁幸福。

個衰人lulu衰到每日係我返工個陣都send一大堆同兩個細路去玩既相過黎，真係豈有此理。

連續返左好多日工，今日終於有得休息，一定要同佢地出去玩下先得。

同埋我都要趁呢一日假期好好計劃一下lulu佢既生日party，去邊度搞，請咩人黎，食d乜都需要好好plan下。

我要做到一百分！一定要俾到驚喜佢！





不過..我而家真係好肚餓，都係食左野先再諗啦。

我：「喂呀lulu，我好肚餓啦…去食飯啦.. 」

lulu：「呃…但係兩個細路都仲未訓醒wor..」

我：「哎…都差唔多一點半啦，咁懶訓架。」

lulu：「哈哈..由佢地啦反正又唔洗返學，啊係喎，老豆老母佢地返左黎想搵我地飲茶。」





我：「飲茶！？好呀好呀！快d打比佢地啦！」

lulu：「你睇下你..好啦咁你去叫醒兩個細路啦。」

我：「好野！」

正呀可以去飲茶！！ 

一聽到可以去飲茶我成個人都興奮起黎，即刻跑左入房叫醒兩個細路，叫佢地快d起身換衫。

雖然佢地兩個完全唔知發生咩事，但係佢地好乖，一叫就醒完全無賴床。

亦多得咁，我地趕得切係兩點下午茶開始之前去到酒樓，仲好好彩唔洗點等位就可以入座。

由於我實在係太過肚餓，我一坐低就不停咁左剔右剔，之後就即刻遞紙入單。





跟住就係漫長既等待…

係呢段時間入面，老爺奶奶仲有家姐都到左，老爺一見到Chase同Nicole就好開心咁走埋黎摸下佢地個頭。

老爺：「好耐無見啦我兩個乖孫~又高左喎~」

Nicole：「好耐無見啦爺爺。 」

老爺：「Nicole乖~Nicole真係似足媽咪咁乖咁靚~ 」

老爺講完之後就望向Chase，應該係想睇下Chase會有咩反應。

Chase好似都意識到呢一點，斜視咁望左老爺一眼。





Chase：「嘖。 」

之後就擰轉臉望返張檯。

原本我打算話佢架啦，點知係我開聲之前老爺就搶先我一步，自己係度大笑。

老爺：「哈哈哈哈，呢邊呢個都似足個老豆。」

我：「唔好意思呀老爺，我會再好好教下呢個仔禮貌架啦.. 」

老爺：「唔係唔係，我唔介意架，反而仲覺得有份親切感，以前魯路修都係咁對我。」

「同埋Cherry啊，唔好叫我老爺啦，叫到我老哂，跟魯路修咁叫我老豆啦。 」

我：「啊…係既..老..豆。」





奶奶：「好啦唔好再掛住傾啦，野食都黎喇，一邊食一邊傾啦。」

我；「嗯！咁我唔客氣啦！ 」

聽到奶奶咁講，我就一於小理，開懷咁同兩個細路大吃大喝。

至於lulu，我見到佢係家姐黎到之後就一直同家姐傾計，好似有重要野咁。

咁我都唔好麻煩到佢地喇，由佢地兩姐弟自己傾下啦。

食呀食，我最後食到好飽，果然飲茶就係最好。

飲茶除左食野之外，另一件事就係大家一齊傾計啦。





老爺奶奶佢地因為唔係成日可以見到，所以話題都係問返我地過成點，細路讀書讀成點咁。

Lulu好流利咁回答哂所有既問題，完全唔洗我出聲，我自己都嚇左一跳。

我以為依照佢既性格，呢d問題佢肯定會拋哂俾我答添。

不過，都唔算差吖起碼唔洗我煩。

好，去個洗手間順便埋左張單先。

正當我係洗手間洗手個陣，奶奶突然出現係我旁邊，老實講我個心真係離一離。

我：「奶奶你又去洗手間吖？」

廢話喔，我居然會講呢d廢話都有。

奶奶：「嗯，算係啦，我係黎搵你。」

我：「黎搵我？係咪有乜事吖？」

奶奶：「呃…無乜特別既，只係想同你講聲辛苦哂啫，要你照顧兩個細路。」

奶奶一邊講一邊輕輕咁捉住我隻手，搞到我突然感覺有少少愕然。

我：「唔係既，lulu辛苦D，平時我返工都係佢負責照顧兩個小朋友既。」

奶奶：「魯路修…呢個仔…總知就係辛苦你啦。」

我：「唔？唔係吖佢最近都變左d吖，成熟可靠左，開始似返個爸爸。」

奶奶：「係咩…咁就好啦，唔好要佢地等啦，我地返去啦。」

我：「嗯！」

然而奶奶呢一番說話背後既含意，我要一個月後先知道。

我真係一個傻瓜。