「奇幻,純愛」《我,總是會愛上妳》: 觸怒
家長日..一聽就覺得麻煩…
以前中學都係自己去架啦..啊屌..算啦當我無講過啦。
Cherry似乎非常緊張呢個開放日,係家長日前一日已經係屋企走黎走去,又話要揀衫又盛,搞到好似要去飲咁。
Cherry:「唉呀點算好呢聽日著邊件去家長日好呢?
![](https://lihkg.com/assets/faces/normal/cry.gif)
佢左右手各拎住兩件衫企係客廳電視機面前,遮住左大半個電視機。
啊…好想叫佢讓開。
與其叫佢讓開,不如我自己就角度好過啦。
我好似一條蛇咁,郁黎郁去,為既就係睇下電視。
結果激嬲左佢。
Cherry:「喂我同你講緊野吖!唔好掛住睇電視啦!」
我:「嘛…無所謂啦,著邊件都ok啦,去個家長日啫搞到咁麻煩為乜..」
Cherry:「咩叫去個家長日啫呀!好重要架!
![](https://lihkg.com/assets/faces/normal/angry.gif)
Chase:「麻煩死…媽咪你著乜都咁靚架啦,叫家姐幫你揀一件咪得,我想睇電視呀…
![](https://lihkg.com/assets/faces/normal/chicken.gif)
同感呀Chase,講得好。
Cherry:「兩父子一擔擔!算!我去搵Nicole!」
佢講完就拎住個一抽衫走左去,頭也不回個種。
我:「佢好似嬲?」
Chase:「好似就係啦。」
我:「你話我洗唔洗去氹下佢?」
Chase:「嘛,唔洗啦咁麻煩,不過睇黎你今晚都係要訓廳架啦。」
訓廳仲好呀,起碼我唔洗訓到咁辛苦。晚晚訓係佢隔離都好擔驚受怕,怕自己做左d過分既舉動。
不過講起又講,每朝訓醒都會發現佢攬住左我,搞到我幾鬼尷尬。
我:「喂咁我今晚同你孖鋪得唔得。」
Chase:「唔得喎,我需要私人空間。」
屌你串柒柒係咪真係未比人打過?
就係咁,我今晚最後都係做左廳長,自己一個睇睇下電視訓著左。
訓醒個陣天已經光,我仲聞到好香既早餐味。
咦,點解我身上會有張被既。
Cherry:「醒左嗱?去洗個臉之後黎食早餐啦,食完就差唔多夠鐘出發喇。」
我:「哦…」
我完全唔知發生咩事,傻下傻下咁跟佢既說話去做。
食完早餐我就諗住去換衫,點知比我見到床上面已經有一套裇衫放左係度。
睇黎係Cherry為我準備架呢…
雖然我對裇衫無乜好感,不過今日呢d日子都係要著架啦。
之後去到學校,我唔知點解望左Chase一眼,見到佢黑口黑面咁。
我:「喂你做乜野,塊臉黑過包公喎。」
Chase:「唔知咩事我硬係有種唔好既預感…
![](https://lihkg.com/assets/faces/normal/clown.gif)
家長日,可以有咩唔好既事?
我地四個人首先比人引領去到禮堂,聽個校長係度廢up。
我發現個個校長都係有同一種技能,就係催眠。
嘩屌你我真係聽到訓著左,唔係Chase拍我我真係唔知已經講完。
之後就係參觀學校,講今年學校有乜新設施咁。
Nicole就好興奮,捉住Cherry不斷睇,而Chase就完全相反,不停放蚊。
老老實實咁行都真係幾攰,行左幾層樓已經攰到嘔。
好彩既係參觀亦到此為止,終於都到今日既重頭戲,拎成績表見家長。
呢兩個細路都係讀同一班,所以可以一次過見哂,乾手淨腳。
講係咁講,都係要排隊等既。係等既時候,我再一次留意到Chase面有不悅。
我:「喂做咩啫你,好憎見家長?」
Chase:「嗯,超唔鐘意,好麻煩好尷尬。」
I know that feel bro.
Cherry:「入得去啦你兩個,仲係度傾計。」
哦?已經入得去嗱?
原本都無緊張既感覺,點知一坐低係個老師面前種緊張感就黎料。
點解而家種感覺搞到好似係我去見工咁既..?
老師:「好喇多謝兩位百忙中都抽時間黎,你地想聽邊位小朋友既情況先?Chase定係Nicole?」
要揀呀?咁…
Cherry:「我想聽Chase先呀,呢個仔成日都令我擔心。」
我都未諗好,Cherry就已經搶先開口。
個老師可能都無諗過Cherry咁快就作出決定,見佢聽完之後呆左幾秒,之後先急急腳係身邊拎d文件出黎。
老師:「eh…Chase的話,啊先講佢好既方面先喇!Chase呢個小朋友可以話非常聰明,思緒好清晰而且頭腦亦轉得好快。」
「同同學仔相處都好好,成日都一大班人一齊玩,好歡樂,係囉係咁上下囉。」
呢個miss佢講咁耐都無同過我地有過任何眼神接觸,只係一味望住自己檯面上份文件。
直至佢講左一句說話,佢講完呢句之後就即刻抬頭望住我地。
Miss:「好啦,有好就自然有壞架啦,Chase佢既問題其實都好多下,身為佢班主任我都幾頭痛。」
果然,老師係家長面前挑剔學生個陣係特別起勁,簡直好似一年入面就係等呢一刻咁。
Chase之前講既唔好既預感應該就係指呢樣啦我諗,好,即管睇下佢有乜衰野比人講。
Miss:「Chase佢的確係好叻仔好聰明,但係佢有個好大既問題,就係懶。」
「上堂訓覺,功課交唔齊,連考試都係hea下hea下就算,搞到成績好差。」
好聰明但係成績好差?咁既事我都係第一次聽,搞到我打左個突。
Cherrry好似都有相同既感覺,即刻出聲。
Cherry:「你話Chase佢成績好差?差成點…?」
Miss:「嗱俾張成績表你地睇下先,留意返個名次,Chase佢既名次係全班好低。」
佢遞左張成績表過黎,正當我想拎黎話睇下到底有幾差個陣,Cherry粒聲唔出搶左去睇,睇完之後成塊臉黑哂。
我出於好奇都拎左份成績表睇下,哇屌你吖…
最差個科係英文,78分,全班排名係16/30。
其他科都有80分以上,全班排名都有十名內。
咁樣都叫成績好差?老師你到底係咩標準?
咦咁點解Cherry會黑哂臉?
Miss:「希望你地平時可以好好咁睇住Chase佢,等佢可以努力D。」
「佢咁樣落去真係好令人擔心,遲下會唔夠人鬥。」
What The Fuck我忍唔住要出聲喇真係。
我:「唔好意思Miss,我無辦法同意你既講法。」
我咁講完之後大家都望住我,Cherry甚至拉左我一下。
但我無理,我一定要講出黎。
魯路修同我講過,我要順從自己個心。
呢個miss講既野,我覺得直頭係歪理。
Miss:「咁…唔知我頭先講既野入面邊度令你覺得唔同意呢?不如講俾我知等大家討論下?」
我:「你話Chase成績好差,我想問下你對於好既標準係乜,100分先叫好?」
Miss:「咁又唔係,之不過你睇下Chase佢既名次..」
我:「名次呢家野就一定有高低架啦,個個都可以第一咩唔通。」
「雖然Chase佢英文科名次係得16名,但我見佢個分其實並唔差,都有78分。」
Miss:「咁即係話有15位小朋友..」
我:「當然你可以咁講,你可以話有其他同學好過Chase,鼓勵佢要加油,如果你咁講我無就問題。」
「但係我唔認為Chase要用個差字去對待囉,我認為你咁講好傷害到小朋友。」
「同埋你提到擔心Chase將來唔夠人鬥?鬥乜?咁細個就向小朋友灌輸鬥呢個概念我認為並唔妥當。」
「我希望兩位小朋友係呢間學校係學習知識,認識朋友同埋學習做人應有既態度同禮貌,而唔係同人鬥同人爭。」
個Miss完全無聲出,呆左咁望住我。
其實我仲有好多野可以講,例如鬧佢唔識禮貌,同人講野唔望人,不過諗落都係算啦,適可宜止。
我:「我諗我地都係傾到呢度喇,再傾落去我認為都無意思,麻煩你比埋Nicole既成績表我地吖。」
Miss:「哦哦..」
佢好似見到我幫佢搵到下台階,馬上就拎左Nicole既成績表出黎交俾Cherry。
我:「好,麻煩哂你,Chase我地走。」
我講完就拖住Chase走,同埋Cherry佢地離開左呢個班房。
出到門口我先發現..
我到底做左D乜蠢事…
![](https://lihkg.com/assets/faces/normal/banghead.gif)
![](https://lihkg.com/assets/faces/normal/banghead.gif)
死喇頭先我同個miss撐到咁行,之後會唔會影響到Chase同Nicole架…
個Miss之後會唔會更加針對Chase架…死喇仆街啦…Sorry呀魯路修,害到你兩個仔女。
![](https://lihkg.com/assets/faces/normal/cry.gif)
我一轉身望到Cherry,唔知點解就好驚。
我:「Sorry!我又講錯野!」
Cherry:「唔?你講錯D乜?」
Eh? 我仲以為佢會直接鬧我添。
我:「唔係,我頭先兜口兜臉鬧個Miss喎...」
Cherry:「係吖但係你其實無講錯到啵,你講既都係岩呀。
![](https://lihkg.com/assets/faces/normal/wink.gif)
「我頭先睇到份成績表之後都想鬧佢架,不過比你搶先一步咋嘛。」
我:「咁你頭先又拉住我既?」
Cherry:「啊,頭先我拉住你係想叫你唔好講俾我講咋嘛。」
「放心喇無事無事,你頭先仲好型添。等我睇下Nicole份成績表先~嘩Nicole好叻喎科科都有頭三名,抵錫!」
「呀!差D唔記得左!Chase!頭先Miss話你上堂訓覺,功課交唔齊係咩事!一陣你要同我好好解釋!
![](https://lihkg.com/assets/faces/normal/angry.gif)
佢好似…無怪我。
仲以為佢一定會鬧到我死添,嚇得我。
Chase:「喂。
![](https://lihkg.com/assets/faces/normal/clown.gif)
Chase行左黎我旁邊,輕輕力咁打左我條腰一下。
我:「咩事?」
Chase:「頭先…多謝你幫我講說話,我以為一定要俾個阿嬸哦到傻添。」
我:「哦,唔洗客氣,你不如諗下一陣點同Cherry佢解釋好過。」
Chase:「唉真係麻煩,點解次次D唔好既預感都會中架。
![](https://lihkg.com/assets/faces/normal/dead.gif)
呼..原來順從自己既心都唔係咁差。