「奇幻，純愛」《我，總是會愛上妳》: 學校
Chase：「好耐喎，頭先咪叫左你唔好傾咁耐。」
我：「嗯…Sorry。」
Chase：「唔..？算啦我講下笑啫，返去啦，如果唔係媽咪會擔心。」
Cherry會擔心呀…
聽完頭先魯路修講既野，我內心就激起好嚴重既矛盾。
其實發生咁大件事，照道理我好應該同Cherry講，一來魯路修係佢老公，Cherry有絕對既知情權。
二來，話左俾佢知，佢一定會去陪魯路修，咁或者會對魯路修既病有所幫助。
但令我感到矛盾既地方就係呢度。
如果我講左出黎，Cherry一定會好擔心，分分鐘日日以淚洗臉。
咁就同魯路修所期望既相違背。
唉我應該點做好呀…
Chase：「自己想點做就點做，咁樣做人會好過d。」
「唔好成日諗如果我係佢我會點做，咁樣好難。」
「用自己既判斷，信下自己既感覺。」
佢又語出驚人，嚇到我即刻望住佢，只見佢仍然望住前面行路，完全無理我。
呢個細路真係…
由我去做判斷的話…我會點做呢？
我沉思左兩秒，算喇都係唔講住。
Chase：「睇你個樣你應該已經做左個決定啦？」
我：「係，多謝你。」
Chase：「唔洗，不過返去之前買盒玩具比我先，咁媽咪就只會以為我地出去係買玩具。」
佢真係好聰明，連掩飾計劃都識準備埋。
不過點解聽落硬係覺得怪怪地？
之後我就按照佢既所謂「計劃」，同佢去左買左盒玩具。
嘩呢個細路果然係公器私用，揀左份五百幾蚊既玩具，唔怪得我頭先會覺得怪怪地啦。
不過算啦，反正又唔係我錢。而且見佢買到個下咁開心，由佢啦。
呢個細路將來要背負既野太沉重啦，而家有得比佢開心就盡量滿足佢啦…
買完玩具，就係時候要返屋企。
我拎住條鎖鑰企係門口，成個人呆左。
可唔可以話係呆左呢？因為我個腦一直都係度轉緊。
我係度諗既然Chase都已經發現左，Cherry會唔會都察覺到有所異樣呢？
我可唔可以做好呢…
Chase：「放心啦，有乜事我會幫你兜既，快D開門啦，我好想去廁所呀。」
我：「哦哦…而家開而家開。」
係喎，仲有Chase係度，之前魯路修拜託過佢幫我，Chase咁聰明，咩問題都一定可以拆掂既。
估唔到一個三十歲有多既人居然要個七歲既細路幫，好似好無用咁添我。
不過講時講，我到底算係幾多歲呢？
唉呢D仆街問題又會諗死我架啦，都係唔好再諗好D。
Cherry：「你地終於肯返黎嗱？到底去左邊！
」唉呀，果然如我所料，Cherry佢係度捕緊我地返黎。
嗱，係你發揮作用既時候啦Chase。
Chase：「我好急，要去洗手間，家姐幫我拎住先。
」Chase你算計我！！
Chase一交左盒野比Nicole就一支箭跑左去廁所，快到連尾燈都見唔到。
廳入面，而家就得返我，Cherry同Nicole三個，今次真係孤軍作戰啦我。
Cherry佢一見到Chase盒玩具表情就更加不悅，好似隨時準備鬧人咁。
Cherry：「又買玩具比Chase！？你寵壞哂佢啦！
」我：「嘛…想鼓勵下佢，等佢俾心機讀書嘛。
」Nicole：「咁點解唔買埋比我？只係買俾細佬既？
」屌！係囉點解既！
我：「eh…Nicole你本身就已經好叻嘛。
」Cherry：「肯定又係Chase佢唔知用咩手段屈到你買啦？一陣真係要同你傾下先得。
」岩啦岩啦，有乜都去搵Chase啦。
Cherry：「你快D去換衫洗臉啦，我已經煮好飯啦。」
我：「好好..辛苦哂。」
呼，總算Safe。
之後我換完衫出黎餐檯已經放左一碟碟意粉，卡邦尼意粉。
我：「又話飯？意粉黎既？
」Cherry：「我以為係你煮飯架嘛，返到黎先發現屋企無人，Nicole又話肚餓喎，我咪唯有煮意粉囉，唔滿意呀？
」我：「唔係，好滿意，黎啦食啦唔好等啦。」
我係食之前環顧四周，見到Chase塊臉黑到咩咁，肯定係比Cherry鬧左一餐。
哈哈，抵你既，岩岩借尿遁吖嗱？
我圈起左一抽意粉，直接放入口。
呢種感覺係咩…死喇我做乜無啦啦會喊既？
Cherry：「哇lulu你做乜呀？好食到喊吖哈哈？
」我：「邊係，我覺得辣啫。
」Cherry：「低能！卡邦尼又點會辣呢？嗱俾紙巾你。
」我：「唔該。」
我接過紙巾之後就即刻抹走d眼淚。
卡邦尼意粉當然唔會辣，不過我自己都解釋唔到點解我會喊。
同樣，我無深究呢個問題，因為我已經知道我最後搵到既答案會係乜。
魯路修既記憶。
食到咁上下，Cherry突然講左句野，令我知道我又有新既任務。
Cherry：「啊係喎，下星期就家長日，你唔會唔記得架可？」
Shit，真係麻煩。