「奇幻，純愛」《我，總是會愛上妳》: 實驗
晨哥並無帶我進入棟大廈，而係同我去停車場，上左一架七人車離開，去唔知邊度。
我：「哇晨哥好勁喎，連司機都有。」
晨哥：「屌，我都想自己揸車呀，係我公司班人唔比，話有危險，都on9既。
」「而家連我放假想同阿欣揸車去下街拍下拖都唔得呀屌。
」「屌，咁我考個車牌托柒？唉遲早真係搵野鑲起個車牌算，反正都用唔著。
」哈哈…晨哥突然間就開始自己講起上黎，我連插嘴既機會都無。
好彩既係佢都需要抖氣換氣，我就食準呢一刻插嘴，問我想問既野。
我：「晨哥我地而家去緊邊？」
晨哥：「唔？啊…Sorry唔記得同你講，我地而家去緊研究所。」
「因為其實呢個project唔係我發起，我只係負責注資同對外既工作，所以研究所並唔係設係我公司。」
哦哦，原來係咁…
屌，我問黎做乜啫，唔通驚晨哥賣我豬仔咩。
晨哥：「啊，話咁快已經到左。」
聽到話到左，我就跟左晨哥落車，見到眼前有一棟好有科學感既建築物，一睇就知入面係做研究個d。
不過點解我第一眼會覺得咁似紅磡火車站既…
唔係因為呢度無人推喼同埋有一堆著住lab袍既人行黎行去的話，我真係會以為自己去左紅磡火車站…
之後有幾個人出黎為我地帶路，哇沿途見到好多人係呢棟野入面做野，好似好pro咁。
最後我地被帶到去其中一間房，入面有好多唔同既儀器，好似醫院咁。
係入面等緊我地既係一班睇落同我差唔多大既人。
「我地好耐無見啦lulu。
」邊位？我識既？
呢位同我打招呼既男人，好似識我…
晨哥：「喂阿明，叫你準備既野準備成點？」
阿明？邊個阿明？
我即刻係我腦入面搵所有叫「阿明」既人出黎，但都係都唔似眼前呢個人。
最後，我決定偷偷咁問晨哥。
估唔到我問完之後卻引黎佢既大笑。
晨哥：「唉呀你唔記得左佢嗱？阿明呀！陳煒明呀！」
陳煒明…？呀！！屌我有印象啦！！我中學個陣幫過晨哥手去幫佢！！
估唔到佢而家咁勁…做埋細胞研究喎…
晨哥：「唔係你諗既咁，D細胞唔係佢研究。」
我：「屌你我好肯定自己無講出聲…」
晨哥：「哈哈，我估到你諗咩啦。」
阿明：「哈哈，事實黎，D細胞的確唔係我研究。」
我：「咁你又係度既…？」
阿明：「無啊，想見下你啫話哂咁多年無見。」
「而且，我終於有機會報恩。」
我：「報恩？好地地報咩恩？」
阿明：「或者你已經唔記得，但好多年前你幫左我一個好大既忙，我一直都好想搵機會多謝你，而家終於有機會。」
有d咁既事咩？好大既忙？我印象中又無喎。
阿明：「好啦敘舊一陣先再敘，我估佢地都已經準備好D儀器，Yui麻煩你帶佢去隔離房啦。」
阿明講完就有位一身護士打扮既女人行左出黎，俾手勢我示意我跟佢行。
之後我就跟住佢去左隔離房，個度有幾位應該係醫生既人幫我做一系列既檢查，好似抽血啊，照X光之類。
搞完一大輪我再一次被帶返開頭同晨哥一齊果間房。
今次，我見到頭先見到頭先係阿明身後既女仔係度睇緊我張X光片，仲同阿明咬耳仔，臉色相當沉重。
唉，我知自己事…
相反，晨哥好似好輕鬆咁，一見到我返黎就撩我傾計。
晨哥：「唷，辛苦哂，飲杯野先啦。」
我接過晨哥杯野，坐係佢對面張梳化。
我無即刻飲杯野，而係開口講野。
我：「晨哥…」
晨哥：「唔洗講，我應承得你既野一定會做。」
「不過，你都要應承我一件事。」
我：「咩事..？」
晨哥個樣好認真，我見到佢咁認真我自己都無啦啦緊張起上黎。
佢要我做d咩呢？唔通佢想問我拎錢？
咁都正常啫，做手術都要俾手術費啦係咪先。
希望佢唔好收太多啦，我怕我俾唔起呀…
「你要接受我地準備既療程。」
無錯，晨哥講既就係呢句短短既說話，我聽到之後成個人呆左，一時之間唔識俾反應。
我：「晨哥…你講既療程係…」
晨哥：「就係字面上既意思，醫返你既療程。」
我：「喂唔好玩啦晨哥，你應該都有睇我份報告架…我已經…」
晨哥：「我連複製你呢d咁高難度兼離哂譜既事都有把握做到，更何況係救返你？」
「魯路修，我係唔會比你死架。」
「你條命，一早唔係只屬於你一個。」
我：「晨哥…」
晨哥：「而且，絕好既研究材料點可以咁輕易放過呢？阿明你話係咪呀？」
阿明：「當然啦，難得有人自願做白老鼠喎，你睇下Ellie佢而家幾投入。」
阿明佢一路講一邊指住頭先同佢咬耳仔，而家猛係度㩒電腦既女仔。
佢地講得咁輕鬆，唔通佢地真係有辦法？我真係可以有機會醫返好？
我個心突然鬆左一鬆，係一種好耐都無過既感覺。
我：「不過你地會用咩方法？好多醫生都話無可能…」
「的確你既情況用藥同手術都係唔可以，但係我有方法可以幫到你。」
藥同手術都唔得既情況下，你仲有辦法？小姐你講黎聽下好喎。
無錯，講野既人係個個猛係度㩒電腦既女仔。
晨哥：「講黎聽下啦Ellie，我呢個朋友好蠢但又好有好奇心，你唔介紹清楚佢肯定會心煩到傻。」
晨哥...你真係太了解我...
Ellie：「好啦咁就等我講下啦，其實就係將你所有有問題既器官用我研究既細胞複製一次，再移植返去你度。」
「不過一定要快，你既情況已經好嚴重，而家要同時間競賽。」
「你呢段時候都係留係呢度，等我地既醫療團隊監察你既情況好d。」
我：「咁事不宜遲…」
Ellie：「已經做緊啦，你既複製品都已經準備緊。」
「不過講起複製人…我都要好小心處理，因為我本身無諗過會咁用呢D細胞。」
「原先既用法係病人既細胞為主，呢種細胞為副咁等新細胞可以複製到好似本體咁。」
「但而家既情況係岩岩相反，我怕出黎既會…」
「而且我地仲未有方法可以確保複製人都會有你既記憶…所以你不如都係…」
我：「唔洗啦…始終我都唔係有百分百把握可以醫返好，而且呢段日子我都無辦法係Cherry身邊…」
我講完之後大家都靜左落黎，無人出聲。
大約兩三分鐘之後，晨哥開聲。
晨哥：「就按佢既意思去做啦。」
Ellie：「明白，我而家就同Yui去準備病房。」
晨哥既說話總係有種力量，令人信服同行動既力量。
阿明：「辛苦你啦lulu，要你同時做兩個實驗既實驗對象…」
我：「我多謝你就真。你俾個新既希望我。」
講真既，多得阿明，我先有返少少既希望，可以唔洗死既希望。
阿明：「話時話，你既複製人聽Ellie講起碼要一星期先完成，你洗唔洗同你屋企人講聲先？」
啊…咁打個電話同Cherry講都好喎…
呢個電話，我應該要用咩心情打好呢...