「奇幻，純愛」《我，總是會愛上妳》: 複製
晨哥：「喂魯路修你知唔知自己係度講緊乜…複製你？先唔講可唔可以成功，如果真係複製到你又想做乜？」
我：「我想…」
「咳咳！！」
我只係岩岩開口，又忍唔住咳，咳到停唔到，被迫打斷左說話。
晨哥：「喂魯路修…你有無事？
」我：「暫時都無事既…不過之後就難講啦，唉真係麻煩…
」晨哥：「喂而家唔係講麻煩既時候呀，你到底發生咩事啊？
」我：「唔知呢，醫生都係咁講，話唔知道原因。」
「佢只係話我身體好多器官同時都有衰竭既跡象，哈哈講出黎真係好似韓劇咁呀可？
」可惜既係，呢個係事實。
我：「所以我想複製一個我，代替我去照顧Cherry佢地。」
晨哥：「搞咁多野，倒不如我諗辦法去醫好你…
」我：「如果係有辦法我早就已經用左啦晨哥..我自己知自己事…」
我咁講完，晨哥都無聲出，deadair左一陣。
咁其實諗深一層我呢個要求又真係過份左少少既，複製人好似係禁止既，無理由要晨哥做犯法野架。
我：「算喇晨哥，當我無講過啦，不過你可唔可以唔好話俾Cherry知？我怕佢擔心。」
我講完就轉身準備返去搵Cherry，但又比晨哥叫住。
晨哥：「魯路修。」
我：「得啦我知啦，我會自己再去搵醫生架啦。」
晨哥：「唔係，你聽日去呢個地址搵我，但記住保密，唔好話俾人知。」
晨哥塞左張卡片比我，上面有一個地址同公司名。
我：「晨哥…」
晨哥：「得啦，唔洗再講，返去啦，Cherry等緊你。」
我：「哦…」
我發現，晨哥臉色好凝重，好似入左認真mode咁，所以我都唔敢再多口。
不過講起認真mode…又係一個令人懷念既回憶呀…
之後大家就散band，我亦同Cherry坐車返屋企。Cherry：「頭先同晨哥傾咩傾咁耐吖傻佬？
」我：「無啊，都係敘下舊，講起以前D野啫。」
Cherry：「每次見佢地都會諗起以前中學既野，你話係咪啊？」
我：「係啊，你仲記唔記得晨哥個認真mode？
」Cherry：「梗係記得啦！以前晨哥一出認真mode你地班男仔就會投哂降，個個都聽哂晨哥支笛。」
之後Cherry講既野我都無留心聽，只係一味望住外面既風景同埋諗返今日既事。
Cherry，對唔住…
我好想講出口，但我知道我唔可以，因為我一旦講出黎，Cherry佢一定會問到底。
到時我就會被迫和盤托出成件事，最後只會令佢唔開心。
所以，就比我講多一次大話啦Cherry。
反正，今次都會係最後一次大話啦。
Cherry：「lulu？
」佢突然咁樣叫我，一下拉左我返現實。
我：「咩事？
」Cherry：「做咩呀你，今晚你好似怪怪地咁既。
」我：「無事~可能係飲左少少酒見攰啫。」
係鬼，我一啖酒都無飲過。
Cherry：「傻佬，明知自己唔飲得仲飲咁多，黎啦挨住我訓陣先啦。
」我：「嗯…」
我無推卻佢既好意，挨係佢膊頭訓著左。
我真係好唔想離開佢…
明明以前經歷左咁多野先可以去到而家呢一步，點解我咁唔爭氣呀…
對仔女而家先七歲…我仲想睇佢地大架…點解偏偏係我呀…
Cherry：「喂起身喇傻佬，我地到左啦。」
哦…咁快就已經返到屋企嗱…
我跌跌碰碰咁落左車，好似飲醉酒咁，仲差d仆左係度，好彩佢扶一扶我咋。
Cherry：「咁大個人連照顧自己都唔識既你。
」我：「Sorry…麻煩到你…」
Cherry：「傻啦我講下笑咋，我地兩夫妻黎架嘛邊有咩麻煩唔麻煩吖。
」兩夫妻…
聽到佢咁講，我忍唔住行上前緊緊攬住佢。
Cherry：「呃..？lulu..？唔好咁啦好多人望住架。
」我：「無所謂啦，我地夫妻黎架嘛，你自己講既。」
Cherry：「傻佬lulu..」
就係咁，我同佢兩個人係條街上面攬埋一舊，完全無視身邊有無其他人。
我本身係攬到唔想放手，但無理由咁樣攬住返屋企架嘛，所以最後就變到拖住佢一齊返屋企。
明明而家已經成十一點，但我地一返到屋企兩個小怪獸就衝左出黎迎接我地，Nicole更加係一下撲左去Cherry度。
Nicole：「媽咪！！
」Cherry：「唉唷Nicole豬，做乜咁夜都未訓啊？」
Nicole：「我掛住媽咪嘛！
」Cherry：「抵錫！等媽咪錫啖先！
」講完Cherry就錫左Nicole一啖，引到Nicole笑到咔咔聲。
呢一切，全部都係我同Chase面前上演，佢地兩個好似當我地兩父子無到咁。
我：「喂Chase咁你又因咩事咁夜都未訓。
」Chase：「唔好諗太多啦你，唔係等你地門，只係聽日放假我唔想咁早訓啫。
」果然係我個仔啊…把口衰到…真係好有親切感。
我忍唔住，摸下佢個頭。
Chase…你大個之後一定要搵個好似你阿媽咁好既女人啊知唔知？
唉屌我做乜好似係度交代身後事咁，我又唔係聽日就死。
不過，可能今次真係會係最後一次見佢地…
我捉緊每一分每一秒，好好咁記住我眼前呢三個人既樣。
好喇，就咁喇。
第二日，我去到晨哥比我既地址，係一座商業大廈黎。
仆街啦，張卡片無寫幾樓添。我而家要點搵晨哥呢？
「唷，魯路修，我等左你好耐啦。」
咦！原來晨哥已經企左係度等我！
我：「喂Sorry晨哥，黎遲左。」
晨哥：「唔緊要，行啦我地。」
我吞左一啖口水，之後就跟左晨哥行。
老實講，我而家真係好驚。